Jesucristu nga misioneru ni jma risaca
«De laabe zendaʼ, ne laabe biseenda be naa.» (JUAN 7:29.)
1, 2. Tuu nga ti misioneru, ne tuu nga misioneru ni jma risaca lade guiráʼ.
TU RINÍʼ íqueluʼ ora gunadiágaluʼ diidxaʼ misioneru. Nuu binni riníʼ ique de ca misioneru ni ruseendaʼ ca religión ni nacaʼ zinándacaʼ Cristu. Stale de laacabe riuucabe lu política stiʼ guidxi ra nuucabe ne laaca riuuláʼdxicabe guiníʼcabe xi zanda guni guidxi ca para gapa jma bueltu. Peru laanu, ca testigu stiʼ Jiobá la? ni riníʼ íquenu ora gunadiáganu misioneru nga cani ruseendaʼ Grupu ni Zaniruʼ para gucheechecaʼ ca diidxaʼ nacubi ne galán lu guidubi naca Guidxilayú (Mat. 24:14). Ca xpinni Cristu riʼ rudiicaʼ tiempu ne stipa sticaʼ sin guiáxacaʼ para gusiidicaʼ binni ximodo zanda chuʼ gaxha de Jiobá ne gaca xhamígucaʼ laabe (Sant. 4:8).
2 Dxandíʼ nga cadi zeeda diʼ diidxaʼ misioneru ca lu Traducción del Nuevo Mundo de las Santas Escrituras. Peru ni cá ñee yaza stiʼ Efesios 4:11 ni zeeda lu Biblia con referencias na ca diidxaʼ griegu ni bitiixhicabe casi «binni ni riníʼ diidxaʼ nacubi ne galán» laaca riniʼni «misioneru». Nécapeʼ Jiobá nga binni ni jma risaca ni huayabi laanu diidxaʼ nacubi ne galán la? qué zanda diʼ guininu laabe nga misioneru ni jma risaca. Xiñee yaʼ. Purtiʼ ti misioneru nga ti binni ni ruseendacabe para guni xiixa dxiiñaʼ, peru Jiobá qué huayuu dxi guseendacabe laa para guni dxiiñaʼ. Jesús peʼ guníʼ de laa sicaríʼ: «De laabe zendaʼ, ne laabe biseenda be naa» (Juan 7:29). Zacá nga laani, Jiobá biseendaʼ tobi lucha Xiiñiʼ ndaaniʼ Guidxilayú riʼ, ne bíʼnibe ni purtiʼ guizáʼ nadxiibe binni (Juan 3:16). Stobi de ca razón pur biseendabe Xiiñibe ndaaniʼ Guidxilayú nga para gusiidiʼ «binni xii nga ni dxandíʼ» (Juan 18:37). Nga runi zanda guininu Jesús nga misioneru ni jma risaca ne ni jma nanna lade guiráʼ misioneru. Stale cosa nga ni guleendú Jesús dxi bicheeche ca diidxaʼ nacubi ne galán stiʼ Reinu, ne dede yanna cabeendúrunu stale cosa galán de dxiiñaʼ bíʼnibe que. Xi cabeendunu yaʼ. Pa misioneru laanu o pa coʼ la? zanda gusíʼdinu casi bisiidibe ora gucheechenu diidxaʼ.
3. Xii nga cani chiguicábinu lu tema riʼ.
3 Ora guidúʼndanu modo bicheeche Jesús diidxaʼ la? galán gánnanu ca ndiʼ: Xi guiráʼ bidxaagalú Jesús dxi bicheeche diidxaʼ ndaaniʼ Guidxilayú riʼ. Xiñee guyuulaʼdxiʼ stale binni modo bisiidibe. Xiñee guleendube stale cosa ni galán ora bicheechebe diidxaʼ.
Guyuuláʼdxibe gúnibe ni na Dios sti lugar
4-6. Xi guiráʼ biʼniʼ Jesús para gunda bibani ndaaniʼ Guidxilayú riʼ.
4 Ca misioneru ni nuu ca dxi stinu, ne guiráʼ ca xpinni Cristu ni rié ra jma caquiiñeʼ tu gucheeche diidxaʼ la? napa xidé guiaacaʼ modo nabani ca binni ra riecaʼ, purtiʼ stale de ca lugar ca jma nagana para guidxela binni ni guibaniné. Peru qué zanda diʼ guiníʼ íquenu pabiáʼ gadxé modo bibani Jesús ndaaniʼ Guidxilayú ne modo bibánibe guibáʼ dxi guyuube cueʼ Bixhózebe ne gaxha de ca ángel ni ruzuubaʼ stiidxaʼ Jiobá (Job 38:7). Gadxé si gúcani para Jesús ora guyuu lade binni ruchee ni runi stale cosa malu, purtiʼ cadi zaqué diʼ biaabe guibánibe (Mar. 7:20-23). Laaca gupa xidé biʼniʼ huantarbe guiráʼ ca xiana ni gupa ca discípulo stibe ni jma gunnaxhiibe (Luc. 20:46; 22:24). Neca zaqué, guiráʼ ora gunna Jesús ximodo guidxaagalú ca guendanagana ni gupa dxi bibani ndaaniʼ Guidxilayú riʼ.
5 Dxi guca Jesús baʼduhuiiniʼ la? cadi casi zeʼ guníʼ purtiʼ si xiiñiʼ Dios laa, sínuque gupa xidé biziidibe chaahuiʼ chaahuiʼ cásica riziidiʼ guiráʼ baʼduhuiiniʼ. ¡Laandabe biʼniʼ mandarbe ca ángel ca dxi guyuube guibáʼ! Dxi bibani Jesús raríʼ guníʼ tobi de ca «idioma ni riníʼ irá binni guidxilayú», ne gadxé ni de «ni riníʼ ca ángel» (1 Cor. 13:1). Neca guniʼbe stiidxaʼ binni la? qué huayuu sti binni guiníʼ jma galán que biaʼ modo guniʼbe (Luc. 4:22).
6 Guiníʼ íquenu de xcaadxi cosa ni biʼniʼ Xiiñiʼ Dios para gunda biaa guibani ndaaniʼ Guidxilayú riʼ. Nécapeʼ qué ñálenebe donda stiʼ Adán la? gúcabe binni cásipeʼ cani gueeda gaca ca «biʼchi be», ca xpínnibe ni bibí pur espíritu (biindaʼ Hebreos 2:17, 18). Gueelaʼ ante gátibe que, qué ninádibe ninábabe Bixhózebe «nuseenda stale mil ángel para ñacané» laabe, laandabe nga Miguel, xaíque stiʼ ca ángel ca (Mat. 26:53: Jud. 9). Dxandíʼ biʼniʼ Jesús milagru ndaaniʼ Guidxilayú riʼ, peru huaxiéʼ nga ni gunda bíʼnibe raríʼ que biaʼ ni ñúnibe pa ñuube guibáʼ.
7. Xi qué ñuni ca judíu que ne Ley stiʼ Dios.
7 Ante gaca Jesús binni, «ni rabi cabe Diidxaʼ» que la? zándaca biquiiñeʼ Dios laabe para gábibe ca israelita que ximodo sacaʼ lu desiertu (Juan 1:1; Éxo. 23:20-23). Peru neca «bidii ca ángel sti Dios» ley laacabe, qué ñúnicabe ni na ni (Hech. 7:53; Heb. 2:2, 3). Ne lu primé siglu que la? ca xaíque stiʼ religión stiʼ ca judíu que gadxé modo bisiénecaʼ guiráʼ ni na Ley que. Tobi de ca cosa ni qué nusiidicabe jneza nga xi zanda o xi qué zanda guni binni dxi sábadu (biindaʼ Marcos 3:4-6). Ca escriba ne ca fariseu qué nulábicaʼ cani jma naquiiñeʼ ñúnicaʼ ni zeeda lu Ley que, casi ñúnicaʼ ni jneza, ñacaʼ binni ne ñuni crecaʼ Dios (Mat. 23:23). Neca zaqué laacabe la? qué nusaana Jesús de nusiidiʼ ni dxandíʼ de Dios.
8. Xiñee zanda gacané Jesús laanu.
8 Jesucristu guca ti hombre ni nabé guyuulaʼdxiʼ guni xiixa para binni. Cumu gunnaxhiibe binni la? ngue runi gucanebe laacaʼ, ne qué ñuu dxi niníʼ íquebe maʼ qué zucheecherube diidxaʼ. Zanda gacanebe guilá «irá cani uzuuba stiidxa be» purtiʼ qué nucheenebe Jiobá. «Biʼni binidxaba pur nuchee be, ne naná guca ni para laabe. Nga runi zanda acané be [binni casi laanu] cani cuquiinde binidxabaʼ.» (Heb. 2:18; 5:8, 9.)
Biziidiʼ chaahuibe gácabe ti maestru
9, 10. Tu bisiidiʼ Jesús guiráʼ ni naquiiñeʼ guni ante gueeda ndaaniʼ Guidxilayú riʼ.
9 Grupu ni Zaniruʼ ni nuu yanna riʼ rusiidiʼ guiráʼ ca misioneru stiʼ ante guseendaʼ laacabe ra chigúnicabe dxiiñaʼ. Ñee laaca guyuu tu bisiidiʼ Jesús zacaca ante cuícabe laa para gaca Mesías la? Guyuu pue, peru qué niziidibe ndaaniʼ ca scuela stiʼ ca maestru de ley que, ninla nusiidiʼ tuuxa ni guca xaíque stiʼ xiixa religión laabe (Juan 7:15; zanda gúʼndaluʼ Hechos 22:3). Yanna, ximodo beeda gácabe ti maestru ni jma nanna gusiidiʼ yaʼ.
10 Dxandíʼ nga bisiidiʼ María, jñaa Jesús laa, ne José ni gupa laabe casi xiiñiʼ, peru Jiobá nga bisiidiʼ laabe guiráʼ ni gúnnabe, purtiʼ Jiobá nga Dios ni nanna guiráʼ xixé cosa ne ni jma nanna gusiidiʼ que stobi. Jesús bisihuinni zacá ni ora guníʼ: «Purti cadi de naa siaʼ uniéʼ sínuque maca udixhe Bixhoze ni biseenda naa xi iniéʼ» (Juan 12:49). Racá ridúʼyanu gudxi Dios laabe xipeʼ nga ni naquiiñeʼ gusiidibe. Nga runi, ante gueeda Jesús ndaaniʼ Guidxilayú riʼ guyuube gaxha de Bixhózebe xadxí para bisiidiʼ laabe stale cosa. Ñee raʼbuʼ nuu stobi ni ñanda nusiidiʼ laabe zacaca la?
11. Ximodo bisihuinni Jesús nadxii binni cásica nadxii Bixhózebe laacaʼ.
11 Dede primé dxi bizáʼ Jiobá laabe nabé guyuube gaxha de laa. Dxi guyuu Jesús guibáʼ biiyaʼ xi guiráʼ biʼniʼ Bixhoze pur binni ne bidiibe cuenta xi runi sentir Dios pur laacaʼ. Nga runi gunnaxhiibe binni cásica gunnaxhii Bixhózebe laacaʼ, dede guniʼbe sicaríʼ: «Cani gunnaxhiee nga ca xiiñiʼ binni guidxilayú» (Pro. 8:22, 31).
12, 13. 1) Xi biziidiʼ Jesús ora biiyaʼ guiráʼ ni biʼniʼ Bixhoze pur ca israelita. 2) Xi biʼniʼ Jesús ndaaniʼ Guidxilayú riʼ para bisihuinni dxandíʼ biziidiʼ dxi guyuu guibáʼ.
12 Jesús biiyaʼ ximodo runi chaahuiʼ Jiobá guendanagana, nga nga tobi de ca cosa ni biziidibe. Ti ejemplu ni rusihuinni zacá ni nga stiʼ ca israelita ni qué nuzuubaʼ diidxaʼ que. Nehemías 9:28 caníʼ de laacabe sicaríʼ: «Ora maʼ nuudxícabe la? rúnicabe cosa malu nezaluluʼ [Jiobá], ne rusaanuʼ laacabe lu naʼ ca xhenemígucabe, ne laacaʼ rutuñeecaʼ laacabe. Óraque ribiguétacabe ra nuuluʼ ne rucaacabe ridxi lii para gacaneluʼ laacabe, ne dede guibáʼ rucaadiágaluʼ ne rulaluʼ laacabe cada biaje, purtiʼ guizáʼ rilaseláʼdxiluʼ laacabe». Cumu guyuu Jesús gaxha de Bixhoze ne biʼniné laabe dxiiñaʼ la? gunda biabe guiráʼ ca binni ni guyuu neza ra bicheechebe diidxaʼ, cásica biʼniʼ Dios (Juan 5:19).
13 Dxi guzané Jesús ca discípulo stiʼ la? biabe laacaʼ, zaqué nga bisihuínnibe dxandíʼ biziidibe gúnibe ni bisiidiʼ Dios laabe. Huaxhinni bigaabe para guuticabe laabe que, «bixooñe irá ca» discípulo stibe ni jma nadxiibe ne «bisaana ca laabe» (Mat. 26:56; Juan 13:1). ¡Dede guníʼ apóstol Pedru qué runibiáʼ laabe chonna biaje! Nin ne bíʼnicabe zaqué bisihuinni Jesús zanda guibiguétacabe ra nuu sti biaje. Ngue runi gúdxibe Pedru: «Ma unaba lu Dios pur lii cadi guiaadxa fe lii. Ne ora ma biasa lu sti tiru la? ucané ca hermanu stiuʼ uzuhuaa chaahui caʼ» (Luc. 22:32). Ca «apóstol ne ca profeta» que ca nga ca primé binni ni beeda gaca Israel stiʼ Dios. Laaca cá lá doce apóstol ni bizuubaʼ stiidxaʼ Jesucristu, Dendxuhuiiniʼ que, lu ca guié ra zuba lindaa stiʼ Jerusalén Cubi. Yanna riʼ, ca xpinni Cristu ni bibí ne ca xcompañérucaʼ ni nuu lade «xcaadxi dendxu» ca, nácacabe ti grupu de binni ni cucheeche stiidxaʼ Reinu jneza, ne Dios ne Xiiñiʼ nga cayabi laacabe ximodo gúnicabe dxiiñaʼ ca (Efe. 2:20; Juan 10:16; Apo. 21:14).
Modo bisiidiʼ Jesús
14, 15. Ximodo rudiʼnu cuenta gadxé modo bisiidiʼ Jesús que ca escriba ne ca fariseu que.
14 Ora bisiidiʼ Jesús binni, laaca bisihuinni dxandíʼ bisiidiʼ Bixhoze laa. Ora guchaaganu modo bisiidiʼ Jesús ne modo bisiidiʼ ca xaíque stiʼ religión stiʼ ca judíu que la? ridúʼyanu jma nánnabe gusiidibe que laacaʼ. Ca escriba ne ca fariseu que gúpacaʼ «stiidxa Dios casi xiixa de enda riguite» pur guiráʼ ca costumbre sticaʼ. Peru Jesús qué ñuu dxi nusiidiʼ ni beeda si ndaaniʼ ique, sínuque bisiidibe guiráʼ ni gudxi Bixhózebe laabe (Mat. 15:6; Juan 14:10). Ngaca nga ni naquiiñeʼ gúninu.
15 Nuuruʼ sti cosa ra rihuinni nabé gadxé Jesús de ca xaíque stiʼ ca religión ni guyuu dxi bibánibe. Laabe guniʼbe: «Pa gabi [ca escriba ne ca fariseu] laatu chi nanda tu xiixa la? lachinanda ni, ne laguni ni. Peru qué chi guni tu casi runi cabe, purti riníʼ cabe peru qué runi cabe» (Mat. 23:3). Peru Jesús biʼniʼ guiráʼ ni bisiidiʼ. Guidúʼyanu ti ejemplu ni rusihuinni zacá ni.
16. Ximodo nánnanu biʼniʼ Jesús casi na ca diidxaʼ ni cá lu Mateo 6:19-21.
16 Jesús gudxi ca discípulo stiʼ gucaa íquecaʼ gápacaʼ cosa risaca guibáʼ (biindaʼ Mateo 6:19-21). Yanna, bíʼnibe ni na ca diidxaʼ ca la? Bíʼnibe, ngue runi guniʼbe sicaríʼ: «Ca mistu guiʼxhi la? napa ca cueva ra riaana caʼ, ne zaqueca ca mani huiini napa ca lidxi caʼ. Peru naa nga Hombre Biseenda Dios, ne qué gapa nin ra quixhe iqueʼ» (Luc. 9:58). Laabe qué ñápadibe stale cosa; ni jma bisaca para laabe nga gucheechebe ca diidxaʼ nacubi ne galán stiʼ Reinu. Ejemplu stiʼ Jesús ca rusihuinni zanda guibani binni dxilaʼdxiʼ ora qué gucaa ique gutale bidxichi ndaaniʼ Guidxilayú riʼ. Ne guniʼbe jma risaca nga gapa binni cosa ni risaca guibáʼ, «purti ngue qué zo bandaa laa ne qué zacá tini ne qué ziuu gubaana cuana laa». Yanna laanu yaʼ. Ñee cutálenu cosa risaca guibáʼ casi guníʼ Jesús que la?
Guyuulaʼdxiʼ binni chuʼ gaxha de laabe pur ca guenda gúpabe
17. Gunáʼ nga ca guenda ni biluíʼ Jesús si nga jma jneza bicheeche diidxaʼ.
17 Xiñee qué huayuu sti binni ndaaniʼ Guidxilayú riʼ gucheeche diidxaʼ casi biʼniʼ Jesús yaʼ. Purtiʼ laasibe nga gadxé modo gucanebe binni. Jesús guca casi Bixhoze purtiʼ qué nudxiibaʼ laca laa, gunnaxhii binni ne biá laacabe. Nga runi stale binni guyuulaʼdxiʼ chuʼ gaxha de Jesús pur ca guenda ni gupa. Yanna, guininu de ca guenda ca.
18. Xiñee zanda guininu qué nudxiibaʼ Jesús laca laa.
18 Para gunda beeda Jesús ndaaniʼ Guidxilayú riʼ ne biʼniʼ dxiiñaʼ stiʼ la? «bisaana be [guiráʼ ni gúpabe guibáʼ] que para beda gaca be casi ti mozo ra gule be ndaani guidxilayú» (Fili. 2:7). Ni bíʼnibe riʼ bisihuinni qué nudxiibabe laca laabe. Laaca qué ñuu dxi ñúnibe menu binni ne qué niniʼbe: «Napa xidé gucaadiágatu naa, purtiʼ zendaʼ de guibáʼ». Gadxé si de ni runi cani riníʼ mesías laacaʼ la? Jesús qué nizá niníʼ nezalú guiráʼ binni laa nga Mesías. Dede guyuu biaje gúdxibe binni cadi gabi stobi tu laabe nin xi bíʼnibe (Mat. 12:15-21). Ni gucaláʼdxibe nga guʼyaʼ binni pa zinanda laabe o pa coʼ pur cani cayuuyacaʼ cayúnibe. Jesús laaca qué ñuu dxi ñábibe ca discípulo stibe ñúnicaʼ guiráʼ cosa jnézapeʼ sin nucheecaʼ, casi runi ca ángel bibaninebe guibáʼ.
19, 20. Xi guiráʼ biʼniʼ Jesús pur gunnaxhii binni ne pur biá laacabe.
19 Jesús laaca gunnaxhii binni, nga nga tobi de ca cosa ni jma rihuinni runi Bixhózebe ni nuu guibáʼ (1 Juan 4:8). Bisiidibe binni purtiʼ gunnaxhiibe laacaʼ. Guiníʼ íquenu de hombre ni bidxiña ra nuube ti biaje que (biindaʼ Marcos 10:17-22). Gunnaxhii Jesús laabe ne gucalaʼdxiʼ ñacané laabe, peru últimu la? qué niná diʼ hombre que nusaana guiráʼ bidxichi stiʼ para ninanda laabe.
20 Jesús laaca nabé biá binni, ngue nga stobi de ca guenda ni guyuulaʼdxiʼ binni de laabe. Laabe bidiibe cuenta napa guiráʼ ca binni ni caziidiʼ que stale guendanagana, purtiʼ binni ruchee laacaʼ. Ngue runi biabe laacaʼ ne bisiidibe laacaʼ. Ti biaje, laabe ne ca discípulo stibe qué ñápacabe tiempu para ñócabe, purtiʼ guizáʼ guyuu xhiiñacabe. Peru, xi bíʼnibe ora bíʼyabe guiráʼ ca binni que yaʼ. Stiidxaʼ Dios na: «Biá [Jesús] laacabe purti nuu cabe casi dendxu sin pastor. Para bizulú bisiidi laacabe stale cosa» (Mar. 6:34). Biiyaʼ Jesús pabiáʼ naná nuu ladxidóʼ ca binni que, ngue runi dede qué niná ñuni stale cosa ni ñuulaʼdxiʼ ti zacá gapa tiempu gusiidiʼ laacabe ne gusianda ca guendahuará stícabe. Ca guenda ni bisihuínnibe riʼ nga cani bicaa caadxi de ca binni que chuulaʼdxiʼ chuʼ gaxha de laabe, ne cani bisiidibe que nga cani bicaa binni gaca discípulo stibe.
21. Xi zazíʼdinu lu sti tema ca.
21 Nuuruʼ stale cosa ni zanda guizíʼdinu de modo bicheeche Jesús diidxaʼ. Lu sti tema ca zazíʼdinu ximódoruʼ zanda chinándanu ejemplu stiʼ Jesucristu, misioneru ni jma risaca lade guiráʼ ni rucheeche diidxaʼ.
Xi nicábiluʼ
• Tu bisiidiʼ Jesús guiráʼ ni naquiiñeʼ guni ante gueeda lu Guidxilayú riʼ.
• Xiñee jma jneza modo bisiidiʼ Jesús que ca fariseu ne ca escriba.
• Xi guenda bisihuinni Jesús ni guyuulaʼdxiʼ binni de laa.
[Dibuju/foto ni zeeda lu yaza 15]
Ximodo ngue bisiidiʼ Jesús ca binni que