Chinándanu ejemplu stiʼ misioneru ni jma risaca
«Lachinanda ejemplu stinne casi zinanda ejemplu sti Cristu.» (1 COR. 11:1.)
1. Xiñee riquiiñeʼ chinándanu ejemplu stiʼ Cristu.
APÓSTOL Pablu yenanda ejemplu stiʼ Jesucristu, misioneru ni jma risaca lade guiráʼ ni rucheeche diidxaʼ. Cumu gunda yenándabe ejemplu stiʼ Jesús la? gúdxibe ca bíʼchibe: «Lachinanda ejemplu stinne casi zinanda ejemplu sti Cristu» (1 Cor. 11:1). Jesús laaca gudxi ca apóstol stiʼ chinándacaʼ ejemplu stiʼ. Ni biʼniʼ Jesús ora gudiibiʼ ñeecabe ti biaje que la? bisihuínnini qué liica rudxiibaʼ laca laa, ngue runi gudxi laacabe: «Ma bilué laatu xi guni tu, ti casi bine laatu ca, zacaca guni tu» (Juan 13:12-15). Laanu laaca naquiiñeʼ chinándanu ejemplu stiʼ Jesús, ne napa xidé gusihuínninu ni lu guiráʼ ni rininu, ni rúninu ne ora gusihuínninu ca guenda ni riuulaʼdxiʼ Dios gápanu (1 Ped. 2:21).
2. Xi naquiiñeʼ guiale de ndaaniʼ ladxidoʼno gúninu neca cadi misioneru ni biseendaʼ Grupu ni Zaniruʼ laanu.
2 Lu tema ni gudídinu ca bizíʼdinu ti misioneru nga tuuxa ni ruseendacabe para gucheeche diidxaʼ nacubi ne galán. Nga runi guníʼ Pablu caadxi cosa ni naquiiñeʼ gucaa laanu guiníʼ íquenu (biindaʼ Romanos 10:11-15). Tobi de laacani nga ndiʼ: «Qué zanda guna diaga cabe ni pa qué chuʼ tu güi né ni laacabe». De raqué guniʼbe ca diidxaʼ ni guníʼ Isaías ni riguixhená que: «Dunabé sicarú ni cayuni ni canayuíʼ de evangeliu ni rusieche binni. Purti diidxa galán nga canayuíʼ cabe» (Isa. 52:7). Nécapeʼ qué huaseendacabe laanu de misioneru ti guidxi zitu la? laaca riquiiñeʼ guiale de ndaaniʼ ladxidoʼno gucheechenu ca diidxaʼ nacubi ne galán ca ne stale guendanayecheʼ, cásica biʼniʼ Jesús. Iza dxiiñaʼ gudiʼdiʼ ca guyuu 6,957,854 ni rucheeche stiidxaʼ Reinu ndaaniʼ 236 guidxi roʼ ni nuu lu guidubi naca Guidxilayú (2 Tim. 4:5).
«Ma bisaana du irá xixé ne ma beda nanda du lii»
3, 4. Xi bisaana Jesús guibáʼ, ne xi naquiiñeʼ gúninu para ganda gácanu discípulo stibe.
3 Para gunda biʼniʼ Jesús dxiiñaʼ stiʼ ndaaniʼ Guidxilayú riʼ la? «bisaana be [guiráʼ cani gúpabe guibáʼ] que para beda gaca be casi ti mozo», bireebe de guibáʼ ne bisaanabe puestu risaca gúpabe raqué (Fili. 2:7). Nin ti cosa de cani maʼ bisaananu qué zanda guchaaganu ne cani bisaana Jesús ora beeda ndaaniʼ Guidxilayú. Neca zacá, zanda chinándanu ejemplu stibe pa qué guibánanu ca cosa ni maʼ bisaananu lu guidxilayú stiʼ Binidxabaʼ riʼ (1 Juan 5:19).
4 Ti biaje gudxi apóstol Pedru Jesús ca diidxaʼ riʼ: «Ma bisaana du irá xixé ne ma beda nanda du lii» (Mat. 19:27). Ora gudxi Jesús, Pedru, Andrés, Santiagu ne Juan pa zinándacaʼ laabe la? oraqueca bisaanacaʼ tarraya sticaʼ para yenándacaʼ laabe. Bisaanacabe negocio de benda gúpacabe que ne bizulú bicheechecabe diidxaʼ, purtiʼ ngue nga ni jma bisaca para laacabe dede óraque. Evangeliu stiʼ Lucas, na guníʼ Pedru sicaríʼ: «[Maʼ] bisaana du irá xixé ni napa du, para canananda du lii» (Luc. 18:28). Stale de laanu qué huasaanadinu guiráʼ xixé ni nápanu para chinándanu Jesús. Ni maʼ bíninu nga maʼ bisiáʼndanu laca laanu para gúcanu discípulo stiʼ Jesús ne gúcanu xpinni Jiobá (Mat. 16:24). Ne maʼ gucuaanu stale ndaayaʼ pur nga (biindaʼ Mateo 19:29). Ridxá tipa ladxidoʼno nga ora rucheechenu diidxaʼ casi biʼniʼ Cristu, jmaruʼ si pa gacanenu neca caadxi si binni gunibiáʼ Dios ne Xiiñibe.
5. Xi riguixhe ique stale binni ni riguni dxiiñaʼ sti guidxi ora guiziidicaʼ ni zeeda lu Biblia. Bizeeteʼ ti ejemplu.
5 Valmir nga ti hombre de Brasil ni biʼniʼ dxiiñaʼ ra guleecabe oro ndaaniʼ guidxi Surinam, hombre riʼ nabé guxudxi ne gupa jnadxii. Laga nuube ndaaniʼ guidxi que guniʼné ca testigu stiʼ Jiobá laabe. Bizulú biindabe Biblia ne ca Testigu guiráʼ dxi, bichaabe modo nabánibe ne qué nindaa de ngue guyuunísabe. Ora bidiibe cuenta nagana cayaca para laabe gúnibe guiráʼ ni caziidibe pur dxiiñaʼ stibe que la? bisaanabe dxiiñaʼ ra runi ganarbe stale bueltu que ne bibiguétabe Brasil para gacanebe ca binnilídxibe guiziidicaʼ de Jiobá. Ngaca nga runi stale binni ni riguni dxiiñaʼ ndaaniʼ sti guidxi ra raca ganar stale bueltu ora guiziidicaʼ ni cá lu Biblia. Rusaanacabe dxiiñaʼ stícabe ne ribiguétacabe xquídxicabe para gusiidicabe binnilídxicabe ne xcaadxi binni guiráʼ ni maʼ nánnacabe. Guiráʼ cani rucheeche stiidxaʼ Reinu riʼ rusihuínnicaʼ dxandíʼ riale de ndaaniʼ ladxidoʼcaʼ gucheechecaʼ diidxaʼ.
6. Xi naquiiñeʼ gúninu pa qué zanda chuunu sti lugar ra jma caquiiñeʼ tu gucheeche diidxaʼ.
6 Nuu Testigu rié sti lugar ra jma caquiiñeʼ tu gucheeche diidxaʼ, ne nuu tu laa dede rié sti guidxi roʼ. Zándaca laanu qué zanda gúninu zacaca purtiʼ nuu xi cucueeza laanu, peru zanda chinándanu ejemplu stiʼ Jesús ne gúninu biaʼ gándatiʼ para gucheechenu diidxaʼ.
Rusiidiʼ Jiobá laanu guiráʼ ni naquiiñeʼ gánnanu
7. Gunáʼ nga ca scuela nápanu ni rusiidiʼ laanu gucheechenu diidxaʼ jma jneza.
7 Cásica biquiiñeʼ Jesús guiráʼ ni bisiidiʼ Bixhoze laa la? laaca zanda cueendunu stale cosa galán pur guiráʼ ni rusiidiʼ Jiobá laanu ca dxi riʼ. Jesús peʼ guníʼ ca diidxaʼ riʼ: «Zadxiña dxi guiene irá binni ni rusiidi [Jiobá]» (Juan 6:45; Isa. 54:13). Yanna riʼ nápanu caadxi scuela ra rizíʼdinu gucheechenu diidxaʼ jma jneza. Guiranu maʼ bizíʼdinu gucheechenu diidxaʼ jma jneza purtiʼ riuunu Scuela stiʼ cani Rucheeche Diidxaʼ ni raca ra ridagulisaanu. Ca precursor zanda checaʼ Scuela stiʼ ca Precursor Regular; ne cani maʼ xadxí de naca precursor la? maʼ guyecaʼ chupa biaje. Ca binnigola ne ca siervu ministerial randa riecaʼ Scuela stiʼ Xhiiñaʼ Reinu para gánnacaʼ ximodo gusiidicaʼ jma jneza ne guiziidicaʼ gacanecaʼ ca bíʼchicaʼ ne ca bizáʼnacaʼ. Ca hombre ni caʼruʼ guichaganáʼ zanda checaʼ Scuela ra Riziidicabe Gúnicabe Xhiiñaʼ Dios, scuela riʼ rusiidiʼ laacabe ximodo gacanécabe guiráʼ cani rucheeche diidxaʼ. Stale de ca bíʼchinu ne bizáʼnanu ni naca misioneru la? maʼ guyecaʼ Scuela stiʼ Galaad stiʼ Watchtower.
8. Pabiáʼ risaca para stale Testigu guiráʼ ni rusiidiʼ Jiobá.
8 Stale Testigu maʼ bisaanacaʼ caadxi cosa ni rúnicaʼ para ganda checaʼ tobi de ca scuela riʼ. Casi Yugu la? bisaana dxiiñaʼ stiʼ purtiʼ qué niná ca binni ra rúnibe dxiiñaʼ que nudii permisu laabe para chebe Scuela ra Riziidicabe Gúnicabe Xhiiñaʼ Dios, ni guca Canadá. Laabe guniʼbe: «Cadi nuaadiáʼ triste pur bisaanaʼ dxiiñaʼ que, purtiʼ pa nudiicabe permisu naa la? nibézacabe ñuneniaruáʼ laacabe dxiiñaʼ para niguixeʼ ni bíʼnicabe pur naa que. Peru yanna maʼ napaʼ tiempu para guicaa intiisi dxiiñaʼ ni gudii Jiobá naa ndaaniʼ xquidxi». Zacá nga rudiʼnu cuenta nuu stale tu maʼ bisaana xiixa ni risaca para laa ti ganda gusiidiʼ Dios laa guni xhiiñabe jneza (Luc. 5:28).
9. Bizeeteʼ ti ejemplu ni rusihuinni pabiáʼ risaca guiráʼ ni rusiidiʼ Biblia ora dxandíʼ rapa binni gana guiziidiʼ.
9 Ribeendú binni stale cosa galán pur cani riziidiʼ de lu Biblia ora de guidubi ladxidóʼ runi ni (2 Tim. 3:16, 17). Guzéʼtenu ejemplu stiʼ Saulo, ti hombrehuiiniʼ de Guatemala ni gulené ti guendahuará ndaaniʼ ique. Pur guendahuará que la? nagana cayaca para laabe guiziidibe gúʼndabe, ngue runi gudxi maestra que jñaabe cadi gucaa diʼ laabe gúnibe stipa para guiziidibe gúʼndabe, purtiʼ zabee gana laabe pa guni zaqué. Ngue runi bisaana Saulo de cheʼ scuela ne qué niziidiʼ guʼndaʼ. Peru bisiidiʼ ti Testigu laabe gúʼndabe, ne biquiiñeʼ folletu Biʼniʼ stipa gúʼndaluʼ ne gucaaluʼ. Ra gudiʼdiʼ dxi nabé biziidiʼ Saulo guʼndaʼ dede bizulú bidii libana lu Scuela stiʼ cani Rucheeche Diidxaʼ. Ti dxi, ora canagucheeche jñaa Saulo diidxaʼ la? bidxaagalube maestra que ne gúdxibe laa maʼ biziidiʼ xiiñibe que guʼndaʼ. Óraque gudxi maestra que laabe gueedanebe hombrehuiiniʼ que sti semana que. Ora yené jñaa Saulo laa sti semana que la? gunabadiidxaʼ maestra que laabe: «Xi chigusiiduʼ naa yaʼ, Saulo». Óraque bizulú biindané Saulo laabe ti párrafo stiʼ libru Xipeʼ ndiʼ cusiidiʼ Biblia. Guizáʼ bidxagayaa maestra que ne guníʼ: «¡Qué guiráʼ guneʼ cré maʼ lii nga cusiidiluʼ naa yanna!». Dede bidá nisa lu gunaa que ne gudiidxi laabe ora biʼyaʼ maʼ nánnabe gúʼndabe.
Rindá ni rusiidiʼ Jiobá ladxidoʼno
10. Xi libru sicarú nápanu para gusíʼdinu ni cá lu Biblia.
10 Jesús bisiidiʼ guiráʼ ni bisiidiʼ Jiobá laa ne ni biziidiʼ lu Stiidxaʼ Dios (Luc. 4:16-21; Juan 8:28). Rinándanu ejemplu stibe ora rúninu ni nabe ne ora riquiiñenu ni zeeda lu Biblia para gusíʼdinu. Ora rúninu zacá la? rusihuínninu rusíʼdinu de ti cosa si ne riníʼ íquenu ti modo si, ca nga nga racané para chuʼnu tobi si (1 Cor. 1:10). «Mozo ni nuu xpiaaniʼ ne ni runi jneza» ca rudii laanu libru ne revista ni rusiene ni cá lu Biblia para gacané laanu gusíʼdinu ti cosa si guiráʼ binni nuu lu guidubi naca Guidxilayú ne para ganda gucheechenu diidxaʼ. Cadi dxandíʼ rudiʼnu xquíxepeʼ pur guiráʼ cani rúnicabe para laanu la? (Mat. 24:45; 28:19, 20.) Tobi de cani maʼ bidiicabe laanu nga libru Xipeʼ ndiʼ cusiidiʼ Biblia ni maʼ biree lu 179 diidxaʼ.
11. Ximodo biquiiñeʼ ti Testigu libru Xipeʼ ndiʼ cusiidiʼ Biblia ora bicaalú ti gunaa laa.
11 Nuu binni rucaalú laanu, peru zanda guchaacabe modo riníʼ íquecabe ora guidúʼndanenu laacabe libru Xipeʼ ndiʼ cusiidiʼ Biblia. Guininu ni bizaaca ti precursora de Etiopía ni láʼ Lula. Ora cusiidibe ti gunaa de Biblia la? bedandá sti gunaa, xfamilia ni cayuundanebe que, ne guníʼ cadi caquiiñepeʼ guiziidicabe ni cusiidiʼ Testigu que. Qué nidxiichi diʼ Lula pur ni guníʼ gunaa que, sínuque biyubi ximodo gusiene laabe xiñee jneza ngue ni caziidiʼ familia stibe que, ne biquiiñeʼ Lula ejemplu stiʼ bueltu ni qué ridiʼdiʼ ni zeeda lu capítulo 15 stiʼ libru ca. Maʼ qué niniʼruʼ gunaa que ne bidii lugar guʼndarúcabe. Sti biaje guyé Lula para guʼndané gunaa ni maca caziidiʼ que la? guyuu sti gunaa que raqué, gunabaʼ guʼndanécabe laa dede guníʼ zaguixe para gusiidicabe laa. Qué nindaa de ngue maʼ biindanécabe laabe chonna biaje lu ti semana ne bihuinni caniisibe lu Stiidxaʼ Dios.
12. Guníʼ ti ejemplu ni rusihuinni zanda gusiidiʼ ca hombrehuiiniʼ ne ca dxaapahuiiniʼ ca ni zeeda lu Biblia.
12 Ca hombrehuiiniʼ ne ca dxaapahuiiniʼ ca laaca zanda gacanecaʼ binni ora iquiiñecaʼ libru Xipeʼ ndiʼ cusiidiʼ Biblia. Guzéʼtenu xi biʼniʼ Keanu, ti hombrehuiiniʼ de Hawai ni napa 11 iza. Ora cayuundabe libru ca ra scuela stibe la? bidxiña tobi de ca xcompañérube ra nuube ne gunabadiidxaʼ laabe xiñee qué riuube lu ca saa runi xcaadxi baʼduscuela que. Oraqueca bixheleʼ Keanu libru ca lu apéndice ra na «Ñee nápanu xidé gúninu ca saa ca la?» para biluíʼ laabe xi pur qué riuu lu ca saa que. Guca si ngue gudxi Keanu laabe gunáʼ de ca tema ni zeeda lu apéndice que ñuuláʼdxibe ñuundabe ne bizulú biindaneni laabe. Iza dxiiñaʼ gudiʼdiʼ ca biindané ca testigu stiʼ Jiobá 6,561,426 binni, stale de ca binni ca biindanécabe laacaʼ libru Xipeʼ ndiʼ cusiidiʼ Biblia. Yanna lii yaʼ, ñee caquiiñeluʼ libru riʼ ne ca binni ni cayuundaneluʼ la?
13. Xi runi binni ora maʼ caziidiʼ ni cá lu Biblia.
13 Ora caziidiʼ binni xiná Biblia ne libru Xipeʼ ndiʼ cusiidiʼ Biblia laaca racaneni laacaʼ gúnicaʼ ni riuulaʼdxiʼ Dios. Ndaaniʼ guidxi Noruega nuu ti guendaxheelaʼ ni naca precursor especial, laacabe bizulú cayuundanécabe sti guendaxheelaʼ de Zambia ni napa chonna dxaapahuiiniʼ. Guendaxheelaʼ riʼ maʼ qué racalaʼdxiʼ gáparuʼ jma xiiñiʼ, ngue runi, ora guca xiiñiʼ gunaa que la? biaanacabe gutiidiʼ gunaa que baʼduʼ que. Chupa chonna gubidxa ante chécabe ra nuu doctor para gúnicabe ni guníʼcabe que la? biindacabe capítulo ra na «Biiyaʼ guendanabani casi ruuyaʼ Dios ni». Foto stiʼ ti baʼduriʼniʼ ni nuu ndaaniʼ jñaa ni cá lu libru que bicaa laacabe guchaacabe modo caníʼ íquecabe que. Laacabe qué nusaana de niziidicabe, ne ora gule baʼduhuiiniʼ que la? gulee lácabe laa lá Testigu ni cayuundané laacabe que.
14. Bizeeteʼ ti ejemplu ni rusihuinni xiñee galán gúninu guiráʼ ni rusíʼdinu.
14 Jesús biʼniʼ guiráʼ ni bisiidiʼ, nga nga tobi de ca cosa ni jma bisihuínnibe. Cumu zinándanu ejemplu stibe la? nga runi stale binni riníʼ jneza modo nabáninu. Guzéʼtenu ti ejemplu. Ti biaje bixheleʼ gubaanaʼ carru stiʼ ti hombre ni runi negocio de Nueva Zelanda ne zinecaʼ maletín stibe. Ora guyebe ra nuu ca pulicia para gábibe laacaʼ gulaʼnaʼ binni stibe la? gudxi ti pulicia ni nuu raqué laabe: «Zabiguetaʼ ni biniti stiluʼ ca pa gueeda guidxela ti testigu stiʼ Jiobá ni». Bidxela ti Testigu ni risaana periódicu maletín que. Ora gúdxicabe hombre que maʼ bidxela ni la? guyebe ralidxi gunaa Testigu ni bidxela maletín que. Dede gutadxí ladxidoʼbe ora biiyabe qué niniti ti guiʼchiʼ nabé risaca nápabe ndaaniʼ ni. Gunaa que gudxi laabe: «Nannaʼ naquiiñeʼ gudxiguetaʼ ca cosa stiluʼ, jmaruʼ si purtiʼ testigu stiʼ Jiobá naa». Dede nin qué nidxela hombre que xi niníʼ, purtiʼ bietenalaʼdxiʼ ni gudxi pulicia que laabe siadóʼ queca. Rihuinni dxíchica zinanda cani dxandíʼ discípulo stiʼ Jesús ejemplu stiʼ Maestru sticaʼ, purtiʼ rúnicaʼ guiráʼ ni rusiidiʼ Biblia (Heb. 13:18).
Guinínenu binni cásica guniʼné Jesús laacaʼ
15, 16. Xi zanda gúninu para gacanenu binni guiziidiʼ ni dxandíʼ de Dios.
15 Modo guniʼné Jesús ca binni que bicaani laacaʼ chuuláʼdxicaʼ gucaadiágacaʼ laabe. Cumu gunnaxhiibe binni ne qué nudxiibabe laca laabe la? stale binni nachaʼhuiʼ guyé ra nuube. Biá Jesús laacabe ne guniʼné laacabe diidxaʼ sicarú para gudixhedxí ladxidóʼcabe; ne laaca bisianda guendahuará stiʼ stale de laacabe (biindaʼ Marcos 2:1-5). Qué zanda gúninu milagru casi bíʼnibe, peru zanda gusihuínninu nadxiinu binni, guianu laacaʼ ne cadi gudxíʼbanu laca laanu. Ca guenda riʼ nga cani zacané laanu para ganda guidxélanu binni ni chuulaʼdxiʼ guiziidiʼ de Dios.
16 Guzéʼtenu xi biʼniʼ ti precursora especial ni láʼ Tariua dxi canagucheeche diidxaʼ lu tobi de ca isla stiʼ Kiribati, ni nuu lu ni nisadóʼ Pacífico. Ora bixhidxi nabe ralidxi ti binnigolahuiiniʼ ni láʼ Beere la? gudxi laabe qué gapa diʼ gana gucaadiaga laabe. Ora biiyaʼ Tariua qué rizá hombre que galán la? biá laabe ne biuubaʼ ladxidóʼ. Óraque gunabadiidxaʼ Tariua laabe: «Ñee maʼ huayunadiágaluʼ xi maʼ guníʼ Dios chiguni para ca binni huará ne para ca binnigola la?». Óraque biindané laabe ni zeeda lu Isaías (biindaʼ Isaías 35:5, 6). Nabé bidxagayaa hombre que pur ni binadiaga que ne guníʼ: «Maʼ iza nga de ruundaʼ Biblia ne de reeda ganna ti misioneru stiʼ religión ra riaa ca naa, peru qué huayuu dxi guundaʼ ca diidxaʼ ca». Bizulú biindaʼ Beere Biblia ne biziidiʼ stale dede guyuunisa. Guyuu ti tiempu qué liica ñanda nizá binnigola riʼ, peru yanna laabe nga ruuyabe gaca ca guendaridagulisaa stiʼ ti grupu ni nuu raqué ne a pie rucheechebe diidxaʼ lu guidubi isla que.
Cadi gusaana de chinándanu Cristu
17, 18. 1) Xi naquiiñeʼ gúninu para gucheechenu diidxaʼ jneza. 2) Xi zacaa guiráʼ cani gucheeche diidxaʼ de guidubi ladxidóʼ.
17 Guiráʼ ni rieeteʼ de ca xpinni Cristu pur modo rucheechecaʼ diidxaʼ ca riguucani gana laanu, ne rusihuínnicani zanda gucheechenu diidxaʼ jneza pa gápanu ca guenda ni gupa Jesús. Nga runi chinándanu ejemplu stiʼ Maestru stinu ne gucheechenu diidxaʼ ne stale guendayecheʼ.
18 Dxi guca caadxi binni discípulo stiʼ Jesús lu primé siglu que la? gunabadiidxaʼ Pedru laabe: «Laadu yaʼ, xi zacaa du». Óraque bicabi Jesús laabe: «Tutiica gusaana lidxi o biʼchi o bizaʼna o bixhoze o jñaa o xheela o xiiñi o xquidxi pur naa la? zacaa ti gayuaa tantu de ni bisaana que, ne zapa enda nabani ni qué zaluxe» (Mat. 19:27-29). Ngapeʼ nga zacaanu pa qué gusaana de chinándanu ejemplu stiʼ Jesucristu, misioneru ni jma risaca lade guirá ni rucheeche diidxaʼ.
Xi nicábiluʼ
• Ximodo rusiidiʼ Jiobá laanu para gánnanu gucheechenu diidxaʼ.
• Xiñee nabé racané libru Xipeʼ ndiʼ cusiidiʼ Biblia binni.
• Ximodo zanda chinándanu ejemplu stiʼ Jesús ora guinínenu binni.
[Dibuju/foto ni zeeda lu yaza 17]
Ora gudxi Jesús Pedru, Andrés, Santiagu ne Juan pa zinándacaʼ laabe la? oraqueca bíʼnicaʼ ni
[Dibuju/foto ni zeeda lu yaza 19]
Libru Xipeʼ ndiʼ cusiidiʼ Biblia nga tobi de cani riquiiñenu para rusíʼdinu de ti cosa si guiráʼ binni nuu lu guidubi naca Guidxilayú