Carta stiʼ Grupu ni Zaniruʼ

Bíchidu ne bizánadu ni nadxiidu:

¡Ti ndaayaʼ naroʼbaʼ nga runibiáʼcabe laanu casi testigu stiʼ Jiobá, Dios ni jma nandxóʼ guibáʼ ne lu guidubi naca Guidxilayú! Qué ziuu dxi gusiaandaʼ binni tu labe, qué zanda guchaaganu ni ne stobi ne laasibe nga labe zacá. Laaca Jiobá nga gudixhe guiree lanu zacá para gunibiáʼ binni laanu, ne dede lu iza 1931 jma runibiáʼcabe laanu zacá (Isa. 43:10). Nga runi, guizáʼ riéchenu nga nácanu testigu stiʼ Jiobá.

Binidxabaʼ cuyubi stale modo para cadi ganna binni tu láʼ Dios. Ca guidxi roʼ ni nuu ndaaniʼ nabe ruuyacaʼ lá Jiobá casi xiixa ni qué risaca. Babilonia guidxi roʼ, ni zeeda gaca guiráʼ ca religión ni cadi dxandíʼ ca, maʼ guleecaʼ lá Dios lu stale Biblia purtiʼ nanaláʼdxicaʼ ni. Peru Jesús qué ñuni diʼ zacá. Bisihuínnibe pabiáʼ risaca lá Dios, purtiʼ primé ca laani guniʼbe lu oración ni bisiidibe ca discípulo stibe, laabe guniʼbe: «Peru laatu la? sicarí nga lainíʼ né Dios: Bixhoze du ni nuu ibáʼ, rinaba du gusisaca irá binni [laluʼ]» (Mat. 6:9). Ne sti biaje guniʼbe sicaríʼ ora biʼniʼ orarbe Jiobá: «Cani ulee chu lu lade binni guidxilayú bidii lu naa la? ma bisiide laaca [tu laluʼ]» (Juan 17:6). Cumu zinándanu ejemplu sicarú stiʼ Jesús la? nga runi maʼ gudixhe íquenu gusíʼdinu binni tu láʼ Dios lu guidubi naca Guidxilayú.

Textu biquiiñeʼ iza 2009 que na: «Gucheechenu guiráʼ ca diidxaʼ nacubi ne galán ca», ne bicaani laanu gucheechenu diidxaʼ biaʼ gándatiʼ (Hech. 20:24, NM). Ne rihuinni modo guluu Jiobá ndaayaʼ dxiiñaʼ bíninu iza gudiʼdiʼ ca, purtiʼ gunda bisíʼdinu stale binni lu guidubi naca Guidxilayú, para guisaca lá Jiobá jma. Lu iza ca guyuu 7,313,173 ni rucheeche diidxaʼ, deruʼ ndiʼ nga primé biaje guyuu biaʼ ca. Laacabe guniʼnécabe guiráʼ binni nayá ladxidóʼ ne bisiidicabe laacaʼ ximodo zaca chaahuiʼ ca guendanagana cadíʼdicaʼ guiráʼ dxi. Dxi bietenaláʼdxinu guendaguti stiʼ Cristu que guyé 18,168,323 binni, nga rusihuinni ziuuruʼ millón de binni ni zaziidiʼ tu láʼ Dios ne zuni adorarcaʼ laabe ante guinitilú ca cosa malu nuu yanna riʼ.

Biaʼ ra gudii Jiobá lugar laanu, zucheecherunu ca diidxaʼ nacubi ne galán ca ne stale gana, ne zuyúbirunu modo gusíʼdinu guiráʼ ca binni ni nuu neza ra rucheechenu diidxaʼ (Mat. 24:14; Mar. 13:10). Gúninu stipa pur gusíʼdinu guiráʼ binni lá Dios, Jiobá, ne cani naguixhe ique guni, ne zanda gúninu ni de yoo pur yoo, lu calle, pur carta, pur teléfono ne ratiica nuunu.

Nápanu stale razón para guininu mayaca gusisaca Jiobá lá (Eze. 36:23). Nabé nagueenda cadxiña dxi gunitilú Jiobá guiráʼ cani riníʼ mal de labe. ¡Guizáʼ ziecheʼ ca xpinni Jiobá dxi ca, purtiʼ bisiidicaʼ binni tu láʼ Dios ne bisihuínnicaʼ laasibe nga nápabe derechu de guni mandarbe!

Modo rapa Jiobá xquidxi rusihuínnini pabiáʼ nadxiibe laacaʼ. Ne bihuinni zacá ni lu ca guendaridagulisaa de chonna gubidxa ne cani guca para stale guidxi roʼ ni biree lá: «¡Lagataná!» ne stale de laacani guca cani lu iza 2009. Laanu, ca Testigu ni nabáninu yanna, qué ziuu dxi gusiáʼndanu ca guendaridagulisaa riʼ, laaca gucanécani laanu para biénenu pabiáʼ naquiiñeʼ gatananu ca dxi riʼ, purtiʼ maʼ gaxha nuu dxi stiʼ Jiobá (Mar. 13:37; 1 Tes. 5:1, 2, 4).

Zanda guininu dxandí nachaʼhuiʼ Jiobá ne laanu, purtiʼ ruchabe ladxidoʼno de guendanayecheʼ, ne casi riné ti pastor ca dendxuʼ stiʼ ra nuu guixi gaʼ para gocaʼ ne ra daʼ ziáʼ nisa para guecaʼ la? zacaca nga runi Jiobá ne laanu (Sal. 23:1, 2; 100:2, 5).

Bíchidu ne bizánadu ni nadxiidu, laganna qué ziuu dxi gusaana Jiobá de cuʼ ndaayaʼ laatu pa gúnirutu xhiiñaʼ Reinu ca beeu zeeda ca.

Laganna nadxiidu laatu.

Ca bíʼchitu ne bizáʼnatu,

Grupu ni Zaniruʼ stiʼ ca Testigu stiʼ Jiobá