Gastiʼ sti dxiiñaʼ jma risaca que gucheechenu diidxaʼ
1. Xi guiráʼ riquiiñenu para gusihuínninu risaca para laanu gucheechenu diidxaʼ.
1 Xiñee nabé rábicabe laanu iquiiñenu tiempu stinu, stipa ne cani nápanu para gucheechenu diidxaʼ. ¡Purtiʼ gástiruʼ sti dxiiñaʼ jma risaca ni gaca lu Guidxilayú riʼ que laani! Ora guiníʼ íquenu xi guiráʼ ribeendú binni pur rucheechenu diidxaʼ la? rucaani laanu gúninu jma lu dxiiñaʼ ni qué ziuu dxi gaca sti biaje riʼ (Hech. 20:24).
2. Ximodo racanenu guisaca lá Jiobá ora rucheechenu diidxaʼ.
2 Rusisácani lá Jiobá. Ora rucheechenu diidxaʼ racanenu binni ganna napa Jiobá ti Reinu. Lu Reinu ca cayuni mandar Cristu, ne ziuuni lugar stiʼ ca gobiernu nuu yanna ne laaca zuni chaahuini guiráʼ ca guendanagana cadiʼdiʼ binni (Mat. 6:9, 10, NM). Ora rucheechenu diidxaʼ laaca ranna binni Jiobá Dios si nga zanda cuee ca guendahuará ca ne gulá laanu de guendaguti (Isa. 25:8; 33:24). Ne cumu nácanu testigu stiʼ Jiobá la? rucaani binni gusisaca laabe, ora ruuyacaʼ ximodo laanu ne pabiáʼ riéchenu gucheechenu diidxaʼ (1 Ped. 2:12). ¡Guizáʼ nayecheʼ runi sentirnu ora rusíʼdinu binni ni nuu lu guidubi Guidxilayú lá Jiobá, Dios ni jma nandxóʼ! (Sal. 83:18.)
3. Xi ribeendú binni ora riziidiʼ cani zeeda lu Biblia.
3 Rulani binni. Jiobá cabeza «inaba irá binni perdón laabe, purti qué racalaʼdxi be initilú nin tobi» (2 Ped. 3:9). Peru, pa guirutiʼ gusiidiʼ laacabe la? qué zanda diʼ gánnacabe xii nga ni ruuyaʼ Dios jneza ne xii nga ni ruuyabe cadi jneza (Jon. 4:11; Rom. 10:13-15). Ora riziidiʼ binni de ca diidxaʼ nacubi ne galán ca ne gusaana guiráʼ cosa malu biʼniʼ dxiqué la? ribani jma galán, peru cadi ngasi, sínuque laaca zanda cueza guidxiña dxi guibani sin gati (Miq. 4:1-4). Nga runi, ora qué rusaana de gucheechenu diidxaʼ racaneni laanu para guilanu ne para guilá cani gucaadiaga laanu (1 Tim. 4:16). ¡Naroʼbaʼ nga ndaayaʼ nápanu purtiʼ rúninu dxiiñaʼ ni nabé risaca riʼ!
4. Xiñee cadi naquiiñeʼ gusaana de gucheechenu stiidxaʼ Reinu ne gacanenu binni gaca discípulo.
4 Maʼ cadi candaa diʼ para gueeda ca dxi jma nagana ca, ne tobi si tiru zanitilú guiráʼ binni ni cadi cayuni ni jneza, peru cani cayuni ni na Jiobá la? zalacaʼ. Nga runi, dxiiñaʼ de gucheechenu diidxaʼ ne gacanenu binni gaca discípulo nga ni jma caquiiñeʼ gaca nagueendaca. Risaca dxiiñaʼ ca ne ribeendú binni stale cosa galán de laani ca dxi riʼ. ¡Quixhe íquenu gúninu dxiiñaʼ riʼ primé lu xquendanabáninu! (Mat. 6:33.)