Bicuudxi binni ora maʼ cusiidiluʼ laa
1. Xi naquiiñeʼ gúninu ti ganda iquiiñenu Stiidxaʼ Dios jneza ora gucheechenu diidxaʼ.
1 Ca xpinni Cristu ni nanna gucheeche diidxaʼ, cásica biʼniʼ apóstol Pablu la? rudiicaʼ cuenta naquiiñeʼ gusiidicaʼ «stiidxa [Dios] jneza», ne cadi guzeetesicaʼ xiixa textu ni zeeda lu Stiidxaʼ Dios (2 Tim. 2:15). Ximodo zanda iquiiñenu Stiidxaʼ Dios para ucuudxinu ca binni ni cusíʼdinu yaʼ (Hech. 28:23.)
2. Xi zanda gúninu para guni respetar binni ni caninenu ca Stiidxaʼ Dios.
2 Gudiʼnu lugar guiníʼ Stiidxaʼ Dios. Primé la? naquiiñeʼ guluiʼluʼ binni paraa cá ni caniʼluʼ ca lu Biblia, nga zacané laabe guni respetarbe ni cá lu Biblia purtiʼ zeedani de Dios. Ora guʼyaʼ tuuxa runi crenu ni cá lu Stiidxaʼ Dios la? zacaneni laa gucaadiaga laanu ora guidúʼndanenu laa ti textu (Heb. 4:12). Zanda guininu sicaríʼ: «Ni nabé huayacané naa nga gannaʼ xi riníʼ ique Dios de tema riʼ. Biiyaʼ xiná Stiidxabe». Cada biaje ganda gúninu ni la? gudiʼnu lugar guiníʼ Stiidxaʼ Dios ra guidúʼndanu ca textu ca de lu Biblia.
3. Guidúʼndasinu ti textu, xi zanda gúninu para guiene binni ni.
3 Guiropa la? naquiiñeʼ gusiénenu ca textu ca. Stale binni raca nagana para laa guiene ti versículo primé ca biaje gunadiaga ni. Nga runi, stale de ca biaje ca naquiiñeʼ gusiénenu laacabe ximodo ridxaaga textu ca ne tema ni caninu (Luc. 24:26, 27). Naquiiñeʼ guzéʼtenu ca diidxaʼ ni jma risaca zeeda lu textu ca. Ne pa guinabadiidxanu binni xiixa la? zacaneni laanu gánnanu pa cayénebe ni caninu (Pro. 20:5; Hech. 8:30).
4. Xii nga últimu cosa ni naquiiñeʼ gúninu para ucuudxinu binni.
4 Iquiiñenu Stiidxaʼ Dios para gusiénenu binni. Guionna la? naquiiñeʼ guyúbinu ximodo gacanenu binni guiníʼ ique ti chindá ni cusíʼdinu ndaaniʼ ladxidóʼ. Galán gusiénenu laabe ximodo zanda gacané textu ca laabe. Pa iquiiñenu Stiidxaʼ Dios la? zándaca ucuudxinu laabe ne guchaabe modo riníʼ íquebe (Hech. 17:2-4; 19:8). Casi pa guidúʼndanenu binni Salmo 83:18 la? zanda gábinu laabe risaca nga gánnanu lá tuuxa binni para ganda gaca xhamígunu laa. De racá zanda guinabadiidxanu: «Ñee raʼbuʼ jma galán zuni orarluʼ pa iquiiñeluʼ lá Dios la?». Ora gábinu laabe ximodo zanda gúnibe ni cá lu textu ca la? zudiibe cuenta pabiáʼ risácani. Ora riquiiñenu Stiidxaʼ Dios para gusíʼdinu la? rucaani binni ni nayá ladxidóʼ guni adorar Jiobá, Dios ni dxandíʼ (Jer. 10:10).