Gusihuínninu dxandíʼ ni na Stiidxaʼ Dios
1 Ndaaniʼ guidxilayú riʼ stale binni qué rusisaca diʼ Biblia, peru laanu cani dxandíʼ nácanu xpinni Cristu qué rusaananu de guininu dxandíʼ ni na Stiidxaʼ Dios. Cumu nánnanu «irá Xquiʼchi Dios, Espíritu Santu uníʼ xi icá» la? laaca rininu ca diidxaʼ ni gudxi Jesús Jiobá ora biʼniʼ orarbe laa: «Dxandíʼ stiidxa luʼ» (2 Tim. 3:16; Juan 17:17). Yanna, xi naquiiñeʼ gúninu para gusihuínninu dxandíʼ ni na Stiidxaʼ Dios yaʼ.
2 Guizíʼdinu ca textu zeeda lu Biblia. Nanna dxíchinu nabé guyuulaʼdxiʼ Jesús guʼndaʼ ne guiene Stiidxaʼ Dios. Ngue runi, gunda bisiidibe ni zeeda lu Stiidxaʼ Dios biaʼ dxi bicheechebe diidxaʼ (Luc. 4:16-21; 24:44-46). Ximodo zanda guiaana stale textu ni zeeda lu Biblia ca ndaaniʼ íquenu yaʼ. Naquiiñeʼ guidúʼndanu Biblia guiráʼ dxi, ne guiníʼ íquenu ti versículo ni zanda gacané laanu o ni zanda iquiiñenu ora maʼ chigucheechenu diidxaʼ. Ora gúʼndanu cani chitiidiʼ lu ca guendaridagulisaa ni chigápanu la? naquiiñeʼ guyúbinu ndaaniʼ Biblia stinu ca textu ni cadi cá xiná ne guiníʼ íquenu xi zanda guicábinu de laacani. Ora maʼ cayaca ca guendaridagulisaa ca naquiiñeʼ guyúbinu guiráʼ xixé textu guʼndaʼ ni cutiidiʼ libana ca. Pa guizíʼdinu ca textu stiʼ Biblia ca la? nga zacané laanu gusíʼdinu Stiidxaʼ Dios jneza (2 Tim. 2:15).
3 Guidúʼndanu de ndaaniʼ Biblia ora guinínenu binni. Naquiiñeʼ guidúʼndanu de ndaaniʼ Biblia ora maʼ canagucheechenu diidxaʼ. Pa gucaadiaga binni laanu, galán guidúʼndanenu laa neca ti textu. Pa chuʼ tu guinabadiidxaʼ laanu xiixa la? galán guicábinu ne Biblia. Pa nuu xhiiñaʼ binni ca zanda gábinu laa: «Racaláʼdxesiaʼ guundaniáʼ lii ti textu stiʼ Biblia». Guyúbinu modo guidúʼndanenu binni ti textu de lu Biblia ne chinándabe ra cadúʼndanu.
4 Ora biluíʼ ti ni rucheeche diidxaʼ ti hombre caadxi textu ni bisihuinni cadi dxandíʼ diʼ nga ni runi cré binni de Trinidad la? hombre que guníʼ: «Guidubi naca xquendanabaneʼ huayaa yuʼduʼ ne qué huayuudxi gannaʼ xi caníʼ Biblia de laani». Pur modo bisiene ni rucheeche diidxaʼ riʼ hombre que la? bidiibe lugar guʼndané Testigu que laabe. Jesús guníʼ cani naca dendxuʼ stibe zunadiágacaʼ stídxibe (Juan 10:16, 27). Para guni cré binni dxandíʼ ni cayábinu laa la? naquiiñeʼ gúʼyacabe ni de ndaaniʼ Biblia. Naquiiñeʼ gúninu zacá ti gusihuínninu dxandíʼ ni na Stiidxaʼ Dios.