Xi naquiiñeʼ gúninu para gusaananenu binni revista
1. Xiñee jma galán guyúbiluʼ modo guiniʼluʼ para gusaananeluʼ binni revista ne cadi guiníʼsiluʼ cásipeʼ modo cá ni.
1 Zándaca guinabadiidxaluʼ: «Xi para guyúbinu ximodo gusaananenu binni revista pa maca zeedani lu Xhiiñaʼ Reinu ni Rúninu». Dxandíʼ, stale tu huayacané cani laa, peru cadi pur nga diʼ guiníʼ íquenu maʼ qué zuyúbirunu modo gusaananenu binni revista. Ne cumu gadxé gadxé nga cada binni la? naquiiñeʼ guchaʼnu modo gusaananenu laacabe revista. Nga runi, cadi naquiiñeʼ guininu cásipeʼ modo zeedani lu Xhiiñaʼ Reinu. Ne pa iquiiñenu ni zeeda luni la? galán nga cadi guininu cásipeʼ modo cá ni.
2. Xi guiráʼ ndiʼ naquiiñeʼ gúninu para cuinu ti tema guinínenu binni.
2 Gulí ti tema. Primeru naquiiñeʼ gúʼndaluʼ revista ca, oracá gulí ti tema ni zanda guiníʼneluʼ binni neza ra rucheecheluʼ diidxaʼ ne ni guyuuláʼdxiluʼ. Guníʼ ximodo zacané revista ca laacabe, purtiʼ zacá zándaca chuuláʼdxicabe gúʼndacabe ni. Neca guiníʼ íqueluʼ iquiiñeluʼ ti tema ni ziuulaʼdxiʼ stale binni la? galán nga gúʼndaluʼ guiráʼ ni zeeda lu revista ca purtiʼ zacá zanda guiníʼneluʼ binni intiica tema ni jma chuuláʼdxicaʼ.
3. Xi huayúniluʼ para ganda gucaadiaga binni lii ne gusaananeluʼ laacaʼ revista.
3 Guníʼ ique xi guinabadiidxaluʼ. Biiyaʼ ximodo zanda guzulú guiníʼneluʼ binni diidxaʼ. Ca diidxaʼ guzuluneluʼ nabé risaca cani. Zanda guinabadiidxaluʼ binni ni caníʼneluʼ ca xiixa ni gucaa laabe guiníʼ íquebe tema ca ne chuuláʼdxibe ni. Ni jma galán nga guinabadiidxaluʼ laabe xi riníʼ íquebe de laani. Peru cadi guinabadiidxaluʼ xiixa ni guchiichi laabe ne guni nga gucaalube lii.
4. Xi rusihuínninu ora rúʼndanenu binni ti textu zeeda lu Biblia.
4 Biindaʼ ti textu. Últimu la? biyubi ti textu lu Biblia ni zeeda lu revista ca para gúʼndaneluʼ binni ca pa cucaadiaga lii. Ora gúʼndanu ti textu ni zeeda lu Biblia la? rusihuínninu lu Stiidxaʼ Dios nga zeeda guiráʼ ni rininu (1 Tes. 2:13). Ne zacá zúʼndanenu laabe ti textu neca qué guiaananebe revista ni culuinu laabe. Nuu bíʼchinu ne bizáʼnanu ruundacaʼ ti textu ante guinabadiidxacaʼ binni xiixa, ne zacá jma rucaadiaga binni laacabe. Xcaadxi riniʼcaʼ sicaríʼ ante gúʼndacaʼ ti textu ni zeeda lu Biblia: «Ñuuladxeʼ ñannaʼ xi riníʼ íqueluʼ de ca diidxaʼ ni cá lu Biblia riʼ». De racá la? ruluíʼcabe binni xi cusiene revista ca de textu ni bíʼndacabe ne ruluíʼcabe binni xiixa ni zeeda luni para uquiinde laa guiaanané ni.
5. Xi naquiiñeʼ guiníʼ íqueluʼ ora maʼ cuyúbinu modo gusaananenu binni revista.
5 Cadi purtiʼ cá ximodo zanda gusaananenu binni revista guiníʼ íquenu naquiiñepeʼ chinándanu modo ná cani. Ni jma jneza nga guiénecabe lii ne cadi guindaapeluʼ. Biyubi modo jma chuuláʼdxiluʼ guiniʼluʼ ti ganda gusaananeluʼ binni revista. Guníʼ ique pabiáʼ risaca ca revista stinu ne gudxi laacabe xiñee galán gúʼndacabe ni. Pa guʼndaʼ chaahuiluʼ ximodo zanda gusaananeluʼ binni revista La Atalaya ne ¡Despertad! la? cani racalaʼdxiʼ «icaa enda nabani ni qué zaluxe» ca ziuuláʼdxicaʼ guiaananecaʼ cani (Hech. 13:48).