Gusaananenu binni revista ni cusiidiʼ de Dios
1. Xi para riquiiñenu revista Torre stiʼ ni rapa ne ¡Despertad! ora maʼ zigucheechenu diidxaʼ.
1 Revista Torre stiʼ ni rapa. Ni caníʼ de Reinu stiʼ Jiobá ne revista ¡Despertad!, laacani nga cani riquiiñenu para gucheechenu diidxaʼ ne para gacanenu binni gaca xpinni Cristu (Mat. 24:14; 28:19, 20). Nabé riéchenu chinenu guiropaʼ revista riʼ ne iquiiñenu cani ora tiica si para guinínenu binni de stiidxaʼ Dios.
2. Ximodo huadxaa revista Torre stiʼ ni rapa ne ¡Despertad!, ne xiñee.
2 Dede dxi biree ca revista riʼ cadxaa modo zeeda cani. Ximodo yaʼ. Dxiqué jma naroʼbaʼ cani, yanna maʼ coʼ, maʼ bidxaa cani zeeda lúcani ne cuchaʼnu modo cusaananenu cani binni. Cayaca cani zacá purtiʼ xquidxi Dios cuyubi modo chuulaʼdxiʼ binni cani jma ne chindá cani ndaaniʼ ladxidoʼcaʼ ti guilá «irá binni, ne ganna ca ni dxandíʼ» (1 Tim. 2:3, 4).
3. Ximodo zaquiiñenu ca revista ca ora maʼ zigucheechenu diidxaʼ.
3 Dede enero stiʼ 2006 bizulú caree ti ¡Despertad! si lu ti beeu. Laaca lu iza ca bizulú biree ti Torre stiʼ ni rapa lu ti beeu ne pur nga gunda bisaananenu cani binni gadxé gadxé modo. Yanna ora chigucheechenu diidxaʼ zusaananenu binni ti Torre stiʼ ni rapa. Ni caníʼ de Reinu stiʼ Jiobá cada chonna beeu, laaca zuyúbinu gadxé gadxé modo para gusaananenu ni binni. Lu últimu yaza stiʼ Xhiiñaʼ Reinu ni Rúninu zeeda caadxi modo zanda gúninu para gusaananenu ca revista riʼ binni. Neca jma riníʼ cani de tema ni zeeda lu primé yaza stiʼ revista ca, laaca riníʼcani de xcaadxi tema ni zeeda lu ca revista ca. Zanda chindanu ndaaniʼ ladxidóʼ binni pa gúʼndanu tema stiʼ revista ni chigusaananenu laacaʼ ra iquiiñenu tobi de ca modo zeeda lu últimu yaza stiʼ Xhiiñaʼ Reinu ni Rúninu ne gúninu ni casi ora cayuinu diidxaʼ.
4. Xiñee jneza guyúbinu sti modo para gusaananenu binni revista, ne cadi iquiiñenu puru si ni zeeda lu Xhiiñaʼ Reinu ni Rúninu.
4 Neca lu Xhiiñaʼ Reinu ni Rúninu zeeda chupa modo gusaananenu binni cada revista la? zanda guyúbinu xcaadxi modo para gusaananenu cani binni. Xiñee yaʼ. Purtiʼ nuu tiru ca binni ni rinínenu ora maʼ zigucheechenu diidxaʼ riuuláʼdxicaʼ sti tema gadxé. O purtiʼ jma galán runi sentirnu ora guiníʼnenu laacabe de ti tema ni guyuuláʼdxinu.
5. Xi naquiiñeʼ gúninu ante guyúbinu modo gusaananenu binni ti revista.
5 Ximodo gánnanu xi guininu. Primeru naquiiñeʼ ganna chaahuinu xi caníʼ tema ni gulinu para guinínenu binni ora maʼ zigucheechenu diidxaʼ, neca nuu tiru qué zanda gúʼndanu guidubi revista ca. Pa nánnanu xi caníʼ ca revista ca zusihuínninu nuunu nayecheʼ, ne guiráʼ ni guininu zaree cani dede ndaaniʼ ladxidoʼno.
6. Ximodo zanda guyúbiluʼ modo guiníʼneluʼ binni.
6 Biyubi xi guiniʼluʼ ni chuulaʼdxiʼ binni neca cadi guiniʼluʼ ca diidxaʼ ni maca gudixhe íqueluʼ guiniʼluʼ. Zanda guinabadiidxaluʼ laabe xiixa ni chuuláʼdxibe ne de ni caníʼ tema stiʼ revista zineluʼ. Cadi guiaandaʼ lii Stiidxaʼ Dios napa stipa para ganda chindá ca diidxaʼ ca ndaaniʼ ladxidóʼ binni (Heb. 4:12). Nga runi, biyubi ti textu ni caníʼ de tema stiluʼ, jma galán pa textu ca zeeda ni lu tema ni caníʼneluʼ binni ca. Guníʼ ique ximodo zanda gusiéneluʼ textu ca ne ni caníʼ tema ca.
7. Xi zanda gúninu ti ora gusaananenu binni revista jma chuuláʼdxicaʼ modo gusaananenu ni laacaʼ.
7 Cadi gunítiluʼ tiempu. Naquiiñeʼ iquiiñeluʼ ca modo nápanu para gusaananu revista, ti gúʼyaluʼ xi cueenduluʼ. Laaca naquiiñeʼ gucheecheneluʼ cani ridagulisaaneluʼ diidxaʼ ca sábadu ca para gusaanatu ca revista ca. Zanda gusaananeluʼ ni ca binni ni maca biaanané xiixa guiʼchiʼ stinu. Bisaanané cani binni ruundaneluʼ Biblia, ne ora guibiguetaʼ chigánnaluʼ ca binni guyuulaʼdxiʼ la? bisaanané cani ca binni nuu raqué. Laaca zanda gusaananeluʼ cani binni ni guiníʼneluʼ ora maʼ zisiluʼ, ora maʼ zeluʼ viaje o laga cabézaluʼ tídiluʼ ra nuu doctor. Biiyaʼ ximodo ra jma guiníʼneluʼ binni jma chuuláʼdxicabe modo gusaananeluʼ laacabe revista.
8. Xiñee zanda guininu, gástiruʼ sti revista casi Torre stiʼ ni rapa ne ¡Despertad!
8 Gástiruʼ sti revista casi Torre stiʼ ni rapa. Ni caníʼ de Reinu stiʼ Jiobá ne ¡Despertad! Rusisaca cani Jiobá casi ti Dios ni runi mandar guibáʼ ne lu guidubi naca Guidxilayú (Hech. 4:24). Riguixhedxí cani ladxidóʼ binni pur ca diidxaʼ nacubi ne galán stiʼ Reinu ne jma runi crecaʼ Jesucristu (Mat. 24:14; Hech. 10:43). Laaca caníʼ cani xi guiráʼ cayaca lu guidxilayú ti gánnanu cayaca guiráʼ ni maca cá lu Biblia (Mat. 25:13). Gucané ca binni nabeza neza ra rucheecheluʼ diidxaʼ ra guundaluʼ xi caníʼ ca revista ca ti gusaananeluʼ cani binni ra tiica nuuluʼ.
9. Xi zanda gúninu ti ganda guibiguétanu sti biaje ra nuu binni.
9 Maʼ para guilúxeluʼ la? guníʼ ique xi guinabadiidxaluʼ binni o xi gábiluʼ laacaʼ para guiníʼ íquecaʼ de ni caníʼneluʼ laacaʼ. Zacá, ora guidxélaluʼ tuuxa binni ni guiaanané ti revista o tuuxa ni guníʼneluʼ de xiixa tema zanda guibiguétaluʼ ra nuube sti biaje ne iquiiñeluʼ ca revista ca para guiníʼneluʼ laabe de stiidxaʼ Dios. Pa rusihuínninu nuunu nayecheʼ ora maʼ caninu de Dios la? zuxhaleʼ Jiobá ladxidóʼ ca binni ni riuulaʼdxiʼ ganna jma de laabe ne zudii gana laacaʼ gúnicaʼ ni nabe (1 Cor. 3:6).