Naquiiñeʼ guni orar ca xpinni Cristu ni rucheeche diidxaʼ
1. Xi naquiiñeʼ gúninu ti ganda gucheechenu diidxaʼ.
1 Qué zanda diʼ gucheechenu diidxaʼ pur stipa si stinu. Jiobá nga rudii stipa laanu para ganda gúninu dxiiñaʼ ca (Fili. 4:13). Ruseendabe ca ángel stibe para gacanecaʼ laanu guidxélanu ca binni ni nadóʼ casi dendxuʼ (Apo. 14:6, 7). Neca laanu nga rucheechenu diidxaʼ ne ribiguétanu ra nuu binni para gusíʼdinu laacaʼ jma la? Jiobá nga racané laacabe para guiniisicabe lu stiidxaʼ (1 Cor. 3:6, 9). Nga runi, para laanu ca xpinni Cristu, ¡risaca nga guni orarnu Bixhózenu ni nuu guibáʼ, purtiʼ zacá zusihuínninu laasibe nga zanda gacanebe laanu!
2. Xii nga cani zanda guzéʼtenu lu ca oración stinu.
2 Guinábanu Jiobá gacané laanu. Naquiiñeʼ guni orarnu guiráʼ biaje chigucheechenu diidxaʼ (Efe. 6:18). Xi zanda guinábanu lu ca oración stinu yaʼ. Lade ca cosa risaca ni zanda guinábanu nga: gacanebe laanu gácanu nadxibalú ne gacanebe laanu guiníʼ íquenu zadxélarunu binni ni riuulaʼdxiʼ guiziidiʼ de Dios neza ra rucheechenu diidxaʼ (Hech. 4:29). Zanda guinábanu Jiobá guluíʼ laanu ra nuu ca binni ni dxandíʼ racalaʼdxiʼ guʼndaʼ Biblia. Pa ora cucheechenu diidxaʼ guinabadiidxaʼ binni laanu xiixa la? zanda guni orarnu Jiobá ti ratu huiiniʼ si ndaaniʼ ladxidoʼno para gacanebe laanu gánnanu xi guicábinu (Neh. 2:4). Laaca zanda guinábanu gudiibe guendabiaaniʼ laanu para ganda gúninu xhiiñaʼ Reinu primé (Sant. 1:5). Laaca riuulaʼdxiʼ Jiobá gudiʼnu xquíxepeʼ laa pur dxiiñaʼ bidiibe laanu de gucheechenu diidxaʼ (Col. 3:15).
3. Ximodo zanda gacané ca oración rúninu pur xcaadxi para ganda guireecheruʼ diidxaʼ.
3 Guinábanu pur xcaadxi. Laaca zanda «iníʼ [nenu] Dios pur ca xcaadxi», dede zándapeca guzéʼtenu lá ca xpinni Cristu ora gánnanu cadíʼdicabe lu xiixa guendanagana (Sant. 5:16; Hech. 12:5). Ñee huaxiéʼ rucheecheluʼ diidxaʼ pur xiixa guendahuará nápaluʼ la? Pa zacá ni la? zanda guni orarluʼ pur ca xpinni Cristu ni jma nazaaca ti gucheechecaʼ diidxaʼ jma. ¡Qué chuʼ dxi guiníʼ íqueluʼ qué zanda gacané ca oración stiluʼ xcaadxi binni! Laaca zanda guni orarnu pur ca binni ni runi mandar ca guidxi roʼ ca, ti gudiicaʼ lugar gucheeche ca xpinni Cristu diidxaʼ ne «ganda chuʼ dxí xquidxi [caʼ], ne ibani [caʼ] sin cuʼ xa ique [caʼ] gastiʼ» (1 Tim. 2:1, 2).
4. Xiñee cadi naquiiñeʼ gusaana de guni orarnu.
4 Naroʼbaʼ nga dxiiñaʼ de guireeche diidxaʼ lu guidubi Guidxilayú riʼ. Peru pa qué «usaana [nu] de iníʼ [nenu] Dios» la? zacané Jiobá laanu para ganda gúninu ni (Rom. 12:12).