Guenda ni jma naquiiñeʼ gapa ti binni ni nanna gusiidiʼ

1. Xi guenda naquiiñeʼ gapa ti binni ni nanna gusiidiʼ.

¹ Xi naquiiñeʼ gapa guiráʼ binni ni nanna gusiidiʼ de Biblia. Gápacabe scuela la? Gápacabe stale iza de rusiidicabe cani zeeda lu Biblia la? Gánnacabe gusiidicabe la? Ni caquiiñeʼ gapa binni nga guendarannaxhii. Laani nga guenda ni caquiiñeʼ gapa binni para guni guiráʼ ni na Ley, rusihuínnini tuu nga cani dxandíʼ xpinni Cristu, laani nga guenda ni jma risaca napa Jiobá ne ni jma riuulaʼdxiʼ binni (Juan 13:35; Gál. 5:14; 1 Juan 4:8). Zacá nga laani, para ganda gácanu ti binni ni nanna gusiidiʼ la? caquiiñeʼ gusihuínninu nadxiinu binni.

2. Xiñee nabé risaca nga gannaxhiinu binni.

² Gannaxhiinu binni. Jesús, Maestru ni Jma Nanna Gusiidiʼ, gunnaxhii binni ne pur ni biʼniʼ stale tu bicaadiaga laa (Luc. 5:12, 13; Juan 13:1; 15:13). Pa nadxiinu binni, zanínenu laacaʼ de Biblia ora tiisi. Gastiʼ qué zucueeza laanu: nin ca binni ni qué riná gucaadiaga, nin cani rizananda laanu ne nin ti clase guendanagana. Zusihuínninu rizaaláʼdxinu binni ora gucaadiaga chaahuinu laacaʼ ne guinínenu laacaʼ de ca cosa ni naguu xizaa laacaʼ ne cadi ni maca gudíxhenu guinínenu binni dxi ca. Ne zabeenu tiempu para gúʼndanenu binni de Biblia ne zadúʼndanu dede ante ni chigúʼndanenu laacaʼ.

3. Ra gannaxhiinu cani rusiidiʼ Biblia, ximodo racanécani laanu ora gucheechenu diidxaʼ.

³ Gannaxhiinu cani rusiidiʼ Biblia. Jesús laca gunnaxhii cani rusiidiʼ Biblia. Dede beeda gácacani para laabe casi tesoro (Mat. 13:52). Pa gannaxhiinu cani rusiidiʼ Biblia la? zucheechenu diidxaʼ né stale gana ne dede ca binni ni guinínenu ziuuláʼdxicaʼ gucaadiágacaʼ laanu. Guendarannaxhii ca zacaneni laanu cadi guidxíbinu, ne jma zacá íquenu pabiáʼ risaca cani chitídxinu binni ne cadi cani qué zanda gúninu.

4. Xi zacané laanu gannaxhiinu binni.

⁴ Xi zacané laanu gannaxhiinu binni. Ni zacané laanu gannaxhiinu binni nga guiníʼ íquenu pabiáʼ triste nabánicaʼ purtiʼ nuucaʼ zitu de Dios ne guiníʼ íquenu modo rusihuinni Jiobá ne Xiiñiʼ nadxiicaʼ binni (Mar. 6:34; 1 Juan 4:10, 11). Ne jma zannaxhiinu cani rusiidiʼ Biblia pa qué gusaana de gúʼndanu stúbinu ne guiníʼ íquenu de ni bidúʼndanu. Cadi guiaandaʼ laanu guendarannaxhii ca zeeda gaca tobi de ca guenda ni rudii espíritu stiʼ Dios (Gál. 5:22). Nga runi, para ganda gusihuínninu guenda riʼ, caquiiñeʼ guinábanu Jiobá gacané laanu ne gudii espíritu santu stiʼ laanu (Luc. 11:13; 1 Juan 5:14). Gastiʼ naca pa qué gápanu scuela, o pa qué gápanu stale iza de rusíʼdinu de Biblia, o huaxiéʼ nánnanu gúninu ni, guiranu zanda gácanu ti binni ni nanna gusiidiʼ Stiidxaʼ Dios pa gusihuínninu nadxiinu binni.