Carta stiʼ Grupu ni Zaniruʼ

Bíchidu ne bizánadu ni nadxiidu:

¡Nabé riéchedu nga gucaʼdu carta riʼ ra nuutu, ca xpinni Jiobá ni cadi cusaana de guni ni nabe lu guidubi naca Guidxilayú, ne yanna riʼ maʼ nácatu jma de gadxe millón! Ximodo runi sentirtu ora gunibiaʼtu ti Testigu de stiʼ guidxi. Cadi dxandíʼ nagueendaca runi sentirtu nannaxhiitu laabe la? (Juan 13:34, 35.) Ngaca zuni sentirtu ora gúʼndatu Anuario 2012 ra zeeda modo bisihuinni ca xpinni Cristu de xcaadxi guidxi fe sticaʼ ne xi bíʼnicaʼ para qué nusaanacaʼ Jiobá.

Huayánnadu nabé risaca para stale de laatu guni adorartu Dios né binnilídxitu. Casi cani napa xiiñiʼ la? ruyúbicaʼ modo gúnicaʼ ni ti cadi guiree ca xiiñihuiinicaʼ gana (Efe. 6:4). Ca guendaxheelaʼ ca maʼ huabeenducaʼ ni galán, purtiʼ ora runi adorarcaʼ Dios ne binnilídxicaʼ randa ruundacaʼ Biblia juntu (Efe. 5:28-33). Guiranu nga ribeendunu ni galán ora ribeenu tiempu para guʼndaʼ chaahuinu Stiidxaʼ Dios, cásica ora rúninu ni stúbinu, zaqueca ora rúninu ni né ca binnilídxinu (Jos. 1:8, 9).

Laaca riuubaʼ ladxidoʼdo ora gánnadu nuu de laatu huayuniná ca desgracia ni huayaca ca dxi riʼ laacaʼ, casi ca xu roʼ. Ne rudiʼdu xquíxepeʼ guiráʼ cani nuuca listu para chigacané ra guca xiixa desgracia (Hech. 11:28-30; Gál. 6:9, 10). Lade ca binni ridagulisaa, nuu de laatu ruuyaʼ xi caquiiñeʼ xcaadxi xpinni Cristu ne racanecaʼ laacabe. Zacá rusihuínnicaʼ nácacaʼ casi Dorcas (Hech. 9:36). Laganna dxichi cayuuyaʼ Jiobá dxiiñaʼ ni cayúnitu ne laa zaguixe laatu pur laani (Mat. 6:3, 4).

Ndaaniʼ stale guidxi nuu binni riquiiñeʼ ley para gucueeza dxiiñaʼ ni cayúninu, ne stale de laatu huayacanatu neca nápatu derechu gúnitu dxiiñaʼ ca (Sal. 94:20-22). Peru cumu nánnatu maca guníʼ Jesús zucaalúcabe ca xpinni la? nga runi rácatu nadxibalú para guni huantartu ne ruyúbitu gacané Jiobá laatu (Juan 15:19, 20). Laganna qué rusaanadu de guzéʼtedu laatu lu ca oración stidu ne rinábadu chuʼtu listu «para icabi tu cani racalaʼdxi ganna xii nga runi cre tu» (1 Ped. 3:13-15).

Laaca racaláʼdxidu gábidu laatu galán cayúnitu stipa pur guibánitu modo na Dios guiráʼ iza, neca runi Binidxabaʼ stale cosa para gucaa laatu gúnitu ni cadi jneza, casi chúʼnetu ni cadi xheelatu. Ca dxi nabáninu riʼ, jma rihuinni cadi jneza modo nabani binni, neca zacá cadi cusaanatu de chuʼnetu «Señor tobi si, [...] purti nabé nandxóʼ be ne zacané be laatu» (Efe. 6:10). Laaca caquiiñetu «irá ni ma bidii Dios laatu para cadi usaba binidxaba laatu ne enda nexhená stiʼ» (Efe. 6:11, 12). Qué chuʼ dxi guiaandaʼ laatu riquiiñeʼ Jiobá ejemplu stitu para guicabi Binidxabaʼ, ni cucaalú ne cuxidxi laa (Pro. 27:11).

Ne laaca riéchedu gábidu laatu guyé 19,374,737 binni dxi bietenaláʼdxinu guendaguti stiʼ Cristu lu iza 2011. Cumu nuu de laatu guca precursor auxiliar lu beeu abril la? gucanetu para gunda guyé guiráʼ binni riʼ. Nabé bisisaca guiráʼ ca Testigu Jiobá iza ca, ne millón de binni lu guidubi Guidxilayú gúnnacaʼ ni bíʼnicabe (Rom. 10:18). Lu beeu ca 2,657,377 de cani rucheeche diidxaʼ gúcacaʼ precursor auxiliar, ne stáleruʼ de ca xpinni Cristu bíʼnicaʼ stipa para bicheechecaʼ diidxaʼ jma. Nabé riéchedu ora gúʼyadu nuutu listu para gúnitu dxiiñaʼ riʼ né stale gana (Sal. 110:3; Col. 3:23).

Xquíxepeʼ Jiobá guyuunisa 263,131 binni iza gudiʼdiʼ ca. Ne laaca rudiʼdu xquíxepeʼ laatu pur gucanetu laadu para gábinu binni ca diidxaʼ ni cá lu Apocalipsis 22:17, ra na: «Na Espíritu Santu ne xheela Dendxu huiini que: Gudáʼ. Ne ni guna diaga la? iníʼ: Gudáʼ. Ni cayati nisa la? gueda gué nisa ni rudii enda nabani sin quixe gastiʼ». Ne lu guendaridagulisaa de chonna gubidxa stiʼ iza 2011, bieeteʼ stale cosa ni chiguni Reinu stiʼ Dios, nga runi jma nadipaʼ rininu ora rinábanu Dios: «Biseendaʼ reinu stiluʼ». Ne ora gudxi Jesús apóstol Juan «Zenda nagueenda», laa bicabi: «Zacá gaca ni. Gudáʼ Señor Jesús», laanu laaca rininu ca diidxaʼ ca (Apo. 22:20).

Laga cabézanu guizaaca ni la? laganna guizáʼ nadxiidu cada tobi de laatu, purtiʼ nadxiitu Jiobá de guidubi ladxidoʼto ne rusihuínnitu ni ora racanetu xcaadxi ni caquiiñeʼ chuʼ tu gacané laa (1 Juan 3:18).

Ca bíʼchitu ne bizáʼnatu,

Grupu ni Zaniru’ sti’ ca Testigu sti’ Jiobá