Gucheechenu diidxaʼ ra nuu ca negocio sin guidxíbinu
1. Xiñee cadi naquiiñeʼ chuʼluʼ xizaa pa ridxíbiluʼ gucheecheluʼ diidxaʼ ra nuu ca negocio.
1 Ñee ridxíbiluʼ gucheecheluʼ diidxaʼ ra nuu negocio la? Pa zacá ni, cadi chuʼluʼ xizaa, nuuruʼ tu runi sentircaʼ zacá. Dede apóstol Pablu, neca guca ti hombre nadxibalú, laaca biʼniʼ stipa para cadi nidxibi ora biʼniʼ dxiiñaʼ riʼ (1 Tes. 2:2). Yanna chiguzéʼtenu chonna cosa ni nabé riguu xizaa cani rucheeche diidxaʼ ora chiguiníʼnecaʼ ca binni ni nuu ndaaniʼ ca negocio ne laaca zuzéʼtenu xi zanda gacané laanu gúninu ni.
2. Xiñee cadi naquiiñeʼ guiníʼ íquenu qué zaná ca binni ni rutoo ndaaniʼ ca negocio gucaadiágacaʼ laanu.
2 Ñee zaníʼ ique ca binni ni rutoo ndaaniʼ ca negocio cabeeʼ xtiémpucaʼ la? Ca binni ni runi dxiiñaʼ ndaaniʼ stale negocio maʼ biaacaʼ gusaanacaʼ ni cayúnicaʼ para guni tendercaʼ binni. Ne zaniʼnécabe lii né diidxaʼ nadóʼ, purtiʼ riníʼ íquecabe zándaca siluʼ xiixa. Ne pa gáculuʼ lari jneza ne guiniʼluʼ né diidxaʼ nadóʼ la? jma nagueenda gácacabe nachaʼhuiʼ né lii.
3. Xi zanda gúniluʼ para cadi guchiiñaluʼ ca binni ni zisíʼ.
3 Ñee naquiiñeʼ gucheecheʼ diidxaʼ nezalú stale binni ni zisíʼ la? Galán chuunu ora gástipeʼ binni ni zisíʼ, casi ora caxaleʼ ca negocio. Ante guidxíñaluʼ gerente o binni ni cayuni dxiiñaʼ ndaaniʼ xiixa negocio, guleza dede ora maʼ nuube stúbibe para guiniʼluʼ, ne cadi guindaaluʼ ora guiníʼneluʼ laabe.
4. Xi zanda guiniʼluʼ ora gucheecheluʼ diidxaʼ ndaaniʼ ca negocio.
4 Xi zanda guiniʼluʼ. Pa stale binni runi dxiiñaʼ ndaaniʼ xiixa negocio la? galán guiníʼneluʼ binni ni ruuyaʼ gaca dxiiñaʼ ndaaniʼ ni. Zanda gábiluʼ laabe: «Huaxiéʼ si biaje randa ridxéladu binni runi dxiiñaʼ ndaaniʼ xiixa negocio ralidxi, nga runi rigánnadu laacaʼ ra rúnicaʼ dxiiñaʼ. Cumu nannaʼ nuu xhiiñaluʼ la? qué zandaadiáʼ». Para cadi guiníʼ íquecabe canagutooloʼ xiixa la? zándaca jma galán cadi gábiluʼ laacabe pa zudiicabe lii xiixa pur dxiiñaʼ ni rúninu, peru zanda gúniluʼ ni pa chuʼ tu guinabadiidxaʼ ni lii. Nuu negocio ra naquiiñeʼ guinabadiidxaluʼ binni ni ruuyaʼ gaca dxiiñaʼ ndaaniʼ ni pa zanda guiníʼneluʼ xcaadxi ni runi dxiiñaʼ raqué neca ti ratu huiiniʼ si. Zanda gábiluʼ laacabe ni maca bizéʼtenu ca. Pa gúʼyaluʼ nabé nuu xhiiñaʼ tobi de laacabe, cadi guiniʼluʼ xadxí ne bisaanané laabe ti tratadu. Ne pa qué zanda guiníʼneluʼ sti binni raqué la? gunabadiidxaʼ pa zanda gusaanaluʼ revista o tratadu ra riziilaʼdxiʼ cani runi dxiiñaʼ raqué o sti lugar.
5. Xi razón nápanu para cadi guidxíbinu gucheechenu diidxaʼ ra nuu ca negocio.
5 Jesús ne Pablu gúcacaʼ nadxibalú ora bicheechecaʼ diidxaʼ ca lugar ra runi binni dxiiñaʼ, lii laaca zanda gúniluʼ zacaca (Mat. 4:18-21; 9:9; Hech. 17:17). Gunabaʼ Jiobá quixhedxí ladxidoʼloʼ ne gucheecheluʼ diidxaʼ né stale gana (Hech. 4:29). Ora rucheeche binni diidxaʼ ndaaniʼ ca negocio nabé ribeendú ni galán purtiʼ qué riaadxaʼ binni ndaaniʼ cani. Xiñee qué gúniluʼ stipa pur gucheecheluʼ diidxaʼ ndaaniʼ ca negocio yaʼ.