Modo chigucheechenu diidxaʼ ra jma riuu binni
1. Ximodo bicheeche ca xpinni Cristu ni bibani lu primé siglu que diidxaʼ.
1 Ca xpinni Cristu ni bibani lu primé siglu que, bicheechecaʼ diidxaʼ de yoo pur yoo, peru laaca guyécabe ca lugar ra jma riuu binni (Hech. 20:20). Nabé guyécabe ndaaniʼ yuʼduʼ purtiʼ nánnacabe zadxélacabe stale binni raqué (Hech. 5:42). Casi dxi guyuu apóstol Pablu ndaaniʼ guidxi Atenas la? guiráʼ dxi bicheeche diidxaʼ ra plaza stiʼ luguiaa que (Hech. 17:17). Yanna riʼ, modo jma rucheechenu diidxaʼ nga de yoo pur yoo ne zácaruʼ ni zacá. Peru laaca rucheechenu diidxaʼ ca lugar ra ruzuhuaacabe carru, ra nuu ca negocio, ra parque, ndaaniʼ ca calle ra nabé riuu binni, ne xcaadxi lugar guidxélanu binni. Neca huayábicabe guiranu gucheechenu diidxaʼ ra jma riuu binni, stale de laanu zúnini ndaaniʼ ca guidxi roʼ ca o ra rucheeche neza binni ridagulisaa sticaʼ diidxaʼ. Guidúʼyanu ximodo chigaca ni.
2. Xi bizulú biʼniʼ ca xpinni Cristu lu noviembre stiʼ 2011.
2 Gucheechenu diidxaʼ ra jma riuu binni ndaaniʼ ca guidxi roʼ. Lu Anuario 2013, yaza 16 ne 17 cayeeteʼ: lu noviembre 2011, bizulú biquiiñeʼ ca xpinni Cristu mexaʼ ne exhibidor ni zanda chiné binni guiráʼ ladu para gucheechecaʼ diidxaʼ ra jma riuu binni ndaaniʼ guidxi Nueva York (Estados Unidos). Ximodo bíʼnicabe ni yaʼ. Biyúbicabe ca lugar ra jma rizá binni ndaaniʼ guidxi que para bizuhuaacabe cani ne biquiiñecabe caadxi cartel ni zanda guʼyaʼ binni ne yenécabe libru ne revista de gadxé gadxé diidxaʼ. Mil binni biiyaʼ ca guiʼchiʼ stinu guiráʼ dxi, dede né ca binni ni nabeza ndaaniʼ ca edificiu ra qué rinácabe chuʼ binni ne ca binni ni huaxiéʼ riuu ralidxi. Nabé galán cani guleendúcabe pur ni bíʼnicabe que, purtiʼ lu ti beeu si gudiizicabe 3,797 revista ne 7,986 libru. Laaca gunabaʼ stale de ca binni ni ridiʼdiʼ raqué guʼndanécabe laacaʼ Biblia. Ne cumu nguepeʼ nga racalaʼdxiʼ ca Testigu que la? biseendacaʼ dirección stiʼ ca binni ni riuulaʼdxiʼ guiziidiʼ que ra nuu ca neza binni ridagulisaa ni rucheeche diidxaʼ neza ra nabézacabe para cheʼ tu chiganna laacabe.
3. Ximodo chigúnicabe para ganda guireeche diidxaʼ ra jma riuu binni ndaaniʼ ca guidxi roʼ ca.
3 Cumu nabé galán cani guleendúcabe pur ni bíʼnicabe que la? gudixhe xquidxi Dios gaca ni ndaaniʼ ca guidxi roʼ ni nuu lu guidubi naca Guidxilayú. Cada Betel primeru zuuyaʼ xi guidxi zanda gaca ni. Jma nga zanábacabe gaca ni ndaaniʼ ca guidxi ra riuu stale binni, casi ca guidxi ni napa terminal stiʼ carru o ni napa stale edificiu ra nabeza binni ne edificiu ni naca oficina. Ne Betel zuseendaʼ guiʼchiʼ ra nuu ca neza binni ridagulisaa para gabi laacaʼ ximodo zanda gúnicaʼ ni. Neca zabícabe ca precursor regular ne ca precursor especial para gúnicaʼ ni la? ziuu tiru laaca zacané ca precursor auxiliar.
4. Ximodo rucheechecabe diidxaʼ ca lugar ra riuu stale binni.
4 Ximodo gúnicabe para gucheechecabe diidxaʼ yaʼ. Ca precursor ni gulícabe para gucheeche diidxaʼ casi maʼ bizéʼtenu ca, ribézacaʼ guidxiña binni ra nuu mexaʼ o exhibidor sticaʼ, oracaruʼ rábicaʼ binni zanda guicaa intiisi guiʼchiʼ chuulaʼdxiʼ. Ne riquiiñecabe Biblia para guicábicabe guiráʼ ni guinabadiidxaʼ binni laacabe. Pa racalaʼdxiʼ tuuxa guicaa xiixa libru o revista la? qué rabidícabe laa ximodo riaxa saca cani. Peru pa guinabadiidxabe ximodo riaxa para gaca dxiiñaʼ stinu la? rusiénecabe laabe nuu tu ruseendaʼ bueltu dirección ni cá lu ca guiʼchiʼ ca. Ne pa gúʼyacabe zanda la? rinabadiidxacabe binni: «Ñuuláʼdxiluʼ niganna tuuxa lii la?» o «Ñuuláʼdxiluʼ nicá laluʼ para ñuundanécabe lii Biblia sin quíxeluʼ la?».
5. Xi guníʼ ti guendaxheelaʼ pur modo careeche diidxaʼ ra jma riuu binni.
5 Nabé ridxá tipa ladxidóʼ ca xpinni Cristu ora iquiiñecaʼ mexaʼ o exhibidor para gucheechecaʼ diidxaʼ. Ti guendaxheelaʼ bicaa ca diidxaʼ riʼ: «Ora maʼ zuhuaadu cueʼ exhibidor ca, ne gúʼyadu maʼ cadiʼdiʼ mil binni raqué, rudiʼdu cuenta pabiáʼ naroʼbaʼ stipa cayaca para ganda guiziidiʼ binni de Dios lu guidubi naca Guidxilayú. Ora guiníʼ íquedu pabiáʼ cazaalaʼdxiʼ Jiobá cada tobi de ca binni ca racaneni laadu gudiʼdu cuenta, ni jma naquiiñeʼ gúnidu lu xquendanabánidu nga gucheechedu diidxaʼ. Ora tiidiʼ binni ra nuu exhibidor ca, riníʼ íquedu: cayuuyaʼ chaahuiʼ Jiobá ladxidóʼ ca binni ca ne cuyubi gunáʼ nga binni ni caquiiñeʼ guiziidiʼ stiidxaʼ. Raríʼ nga jma ridúʼyadu pabiáʼ cayacané ca ángel laadu».
6. 1) Ximodo cucheeche ca neza binni ridagulisaa ca diidxaʼ, ne xi rusihuinni gadxé ni de modo cucheechecabe diidxaʼ ndaaniʼ ca guidxi roʼ. 2) Ximodo caquiiñeʼ gacanesaa ca neza binni ridagulisaa ca para ganda gucheechecaʼ diidxaʼ ra jma riuu binni.
6 Modo quixheʼ neza binni ridagulisaa guireeche diidxaʼ ra jma riuu binni. Peru cadi zacá si nga modo careeche diidxaʼ, ndaaniʼ stale neza binni ridagulisaa laaca maʼ caguixhe ca binnigola ximodo guireeche diidxaʼ ra jma riuu binni neza ra rucheechecaʼ diidxaʼ. Ximodo rúnicabe ni yaʼ. Cani rucheeche diidxaʼ ni nuu ndaaniʼ ti neza binni ridagulisaa ruzuhuaacaʼ ti mexaʼ o ti exhibidor ca lugar ra jma riuu binni, peru rúnicabe ni biáʼ ra nexheʼ si gucheechecabe diidxaʼ. Ne gadxé ni de ni cayaca ndaaniʼ ca guidxi roʼ, purtiʼ cani cayuni ni ndaaniʼ ca lugar ca de gadxé gadxé neza binni ridagulisaa laacaʼ ne nuucaʼ ti lugar si ra gulí Betel gaca ni (biiyaʼ cuadru ra na: «Naquiiñeʼ gacanésaanu»).
7. Pa guʼyaʼ ca binnigola zanda guireeche diidxaʼ ca lugar ra nabé ridiʼdiʼ binni, ximodo gúnicabe ni.
7 Ca binnigola naquiiñeʼ gúʼyacaʼ pa nuu lugar ra nabé riuu binni neza ra nexheʼ gucheechecaʼ diidxaʼ ne gúʼyacaʼ pa zanda gucheechecaʼ diidxaʼ ca lugar ca. Pa ruuyacabe zanda la? zuzuhuaacabe mexaʼ o exhibidor ra terminal stiʼ carru, ra nuu xiixa plaza, ra parque, ndaaniʼ ca calle ra nabé ridiʼdiʼ binni, ca lugar ra nuu stale tienda, ra nuu ca universidad, ra aeropuerto ne ca lugar ra ridagulisaa binni cada iza. Ne jma galán quíxhecabe xi dxi guzuhuaacabe exhibidor ca ne gaca ni tobi si lugar ne ngueca hora. Laaca huahuinni jma galán guzuhuaacabe mexaʼ ndaaniʼ ca lugar ra nuu stale tienda que guzuhuaacabe ni ra nuu ti tienda si ra riuu binni risíʼ ne maca zeʼ. Casi ruaa ca calle ra nabé ridiʼdiʼ binni la? jma galán iquiiñecabe ti exhibidor nahuiiniʼ que ti mexaʼ. Nuu caadxi archivu ni zanda guindeteʼ ca binnigola lu Internet para gúnicaʼ cartel stiʼ revista Torre stiʼ ni rapa ne ¡Despertad¡ ne libru Xipeʼ ndiʼ cusiidiʼ Biblia para iquiiñecaʼ. Cani gucheeche diidxaʼ casi maʼ bizéʼtenu ca, laaca zúnicabe ni casi runi cani rucheeche diidxaʼ ra jma riuu binni ndaaniʼ ca guidxi roʼ, zinándacabe modo gusiene binnigola ni ruuyaʼ modo rireeche diidxaʼ laacabe. Ora guicaacabe dirección stiʼ ti binni ni riuulaʼdxiʼ guiziidiʼ, ni nabeza ra runi tender sti neza binni ridagulisaa, nagueendaca naquiiñeʼ guchácabe guiʼchiʼ ni láʼ Sírvase visitar (S-43-S) ne gudiicabe ni secretariu stícabe.
8. Pa gastiʼ lugar ra jma riuu binni para gucheechetu diidxaʼ, paraa zanda gucheecheluʼ diidxaʼ.
8 Ximodo gúniluʼ para gucheecheluʼ diidxaʼ ra jma riuu binni. Laga pa gastiʼ lugar ra nabé ridiʼdiʼ binni para guzuhuaa ti mexaʼ o ti exhibidor para gucheechetu diidxaʼ yaʼ. Neca zacá, zanda guyúbiluʼ modo gucheecheluʼ diidxaʼ ra jma riuu binni, casi pa ra rucheechetu diidxaʼ nuu stale negocio, nuu chupa chonna tienda o nuu ti tienda ra nabé rié binni la? zanda gucheecheluʼ diidxaʼ ca lugar ca. O pa nuu xiixa parque, ti plaza o sti lugar casi laacani ne xcaadxi lugar ra ridagulisaa stale binni gatigá la? laaca zanda cheluʼ ca lugar ca ne ziécheluʼ ora guʼnuʼ ni.
9. Xiñee naquiiñeʼ gúninu stipa para gucheechenu diidxaʼ ratiica nuu binni.
9 Jiobá racalaʼdxiʼ guilá «irá binni, ne ganna ca ni dxandíʼ» (1 Tim. 2:3-4). Nga runi, cayúninu stipa para gucheechenu stiidxaʼ Reinu ra nuu guiráʼ binni ni ganda guinínenu ante guinitilú guidxilayú malu riʼ (Mat 24:14). Dxandíʼ, stale lugar nabé nagana para guidxélanu binni ralidxi, peru zándaca guidxélanu laacabe xiixa lugar ra nabé riuu binni para guinínenu laacabe. Ne zándaca zacatiʼ nga gunadiágacabe stiidxaʼ Dios. Nga runi, naquiiñeʼ gucheechenu diidxaʼ ratiica nuucabe, ti gúninu «irá ni bisaana Dios» ladxinanu (2 Tim. 4:5).
[Cuadru ni zeeda lu yaza 5]
Naquiiñeʼ gacanésaanu
Nuu biaje rié ca xpinni Cristu de gadxé gadxé neza binni ridagulisaa, tobi si lugar ra jma riuu binni, casi ndaaniʼ tobi si calle, ra ruzuhuaa carru ne ra puertaʼ stiʼ xiixa negocio o ra terminal stiʼ carru para gucheechecaʼ diidxaʼ. Ne laaca huahuinni nuu de cani rucheeche diidxaʼ de gadxé gadxé neza binni ridagulisaa tobi si lugar ra rusaanacaʼ revista, casi ndaaniʼ ca sala ra ribézacabe binni ne huahuinni rucheechecaʼ diidxaʼ ndaaniʼ ngueca negocio. Ne neca cadi juntu rizá cani rucheeche diidxaʼ ca, peru stale de ca binni ca nuu tiru ridxiichicaʼ. Nga runi, dxi nexheʼ gucheechenu diidxaʼ ra jma riuu binni, galán gúninu ni biaʼ ra nexheʼ si gucheeche neza binni ridagulisaa stinu diidxaʼ.
Pa racalaʼdxiʼ ca xpinni Cristu gucheechecaʼ diidxaʼ ti lugar ra jma riuu binni, peru gadxé neza binni ridagulisaa rucheeche diidxaʼ lugar ca la? naquiiñeʼ guiniʼnécabe binnigola ni ruuyaʼ modo rireeche diidxaʼ ra ridagulisaacabe. Ne maʼ laa guinabadiidxaʼ binnigola ni ruuyaʼ modo rireeche diidxaʼ lugar ca pa zanda chécabe. Ora nuu chupa chonna neza binni ridagulisaa de gadxé gadxé diidxaʼ tobi si lugar la? ca binnigola ni ruuyaʼ modo rireeche diidxaʼ ndaaniʼ cani naquiiñeʼ güicaʼ diidxaʼ ti cadi guiree binni gana gucaadiaga laacabe. Pa gacanésaanu la? zanda «gaca [guiráʼ ca cosa ca] jneza» (1 Cor. 14:40).
[Foto ni zeeda lu yaza 6]
[Fot ni zeeda lu yaza 6]