Modo naquiiñeʼ gucheechenu diidxaʼ lu calle
1. Bizeeteʼ ti modo zanda gúninu cásica biʼniʼ Jesús.
1 Dxi bicheeche Jesús diidxaʼ lu Guidxilayú, guníʼnebe guiráʼ binni ni bidxaagabe neza zebe ne xcaadxi lugar ra riuu stale binni (Luc. 9:57-61; Juan 4:7). Ni gucalaʼdxiʼ Jesús nga pa ñanda si ñacané guiráʼ binni niziidiʼ de Stiidxaʼ Dios. Ca dxi stinu riʼ racanenu binni guiziidiʼ de Dios, ne ti modo rúninu ni nga ora rucheechenu diidxaʼ lu calle (Pro. 1:20). Pa guidxíñanu binni para guinínenu laacaʼ de Dios ne guyúbinu modo gúninu ni la? jma stale ni zabeendunu.
2. Xiñee laanu nga naquiiñeʼ guidxíñanu binni ora gucheechenu diidxaʼ lu calle.
2 Naquiiñeʼ guidxíñanu laacabe. Jma galán pa laanu guidxíñanu ca binni ni cadiʼdiʼ lu calle ne cadi guzuhuaʼnu ti lugar si o cuinu paxaraa para cuézanu gueedacabe ra nuunu. Bixidxi huiiniʼ, biiyadxí lú binni ne guníʼ né diidxaʼ nadóʼ. Pa chineluʼ xcaadxi ni rucheeche diidxaʼ la? cadi galán diʼ guidxiña guiratu binni. Ne pa guiníʼneluʼ tuuxa ni riuulaʼdxiʼ guiziidiʼ jma de Dios la? laaca galán guyúbiluʼ modo gacaneluʼ laabe guiziidibe jma. Ora maʼ biluxe guníʼneluʼ binni, gunabadiidxaʼ laabe ximodo zanda guiníʼneluʼ laabe sti biaje, pa ruuyaluʼ zanda gúniluʼ ni. Nuu de ca xpinni Cristu gatigá rucheechecaʼ diidxaʼ ndaaniʼ ti calle si, pur nga randa riníʼnecaʼ laca ca binni ni maca guníʼnecaʼ ne zacá randa racanecaʼ laacabe chuuláʼdxicabe guiziidicabe jma de Dios.
3. Ximodo gusihuínninu nácanu binni nuu xpiaaniʼ ora gucheechenu diidxaʼ lu calle.
3 Gusihuínninu nácanu binni nuu xpiaaniʼ. Biiyaʼ chaahuiʼ paraa zanda gucheecheluʼ diidxaʼ ne tu laa zanda guidxíñaluʼ. Cadi guirá diʼ binni tiidiʼ lu calle ra zuhuaaluʼ ca nga naquiiñeʼ guiníʼneluʼ. Primeru, biiyaʼ pa zanda guidxíñaluʼ laabe. Casi pa gúʼyaluʼ zebe nagueenda la? jma galán cadi gucueezaluʼ laabe. Ne pa cucheecheluʼ diidxaʼ gaxha de ti negocio, biyubi modo gúniluʼ ni ti cadi guchiichiluʼ gerente stini. Jma galán guiníʼneluʼ binni ora maʼ ziree ndaaniʼ negocio ca. Biyubi modo guidxíñaluʼ ti cadi guchíbiluʼ binni. Laaca naquiiñeʼ gánnaluʼ pora nga zanda gusaananeluʼ binni libru ne revista. Pa huaxiéʼ riuulaʼdxiʼ binni ni caníʼneluʼ gucaadiaga la? cadi gudiiluʼ laabe ti revista, jma galán gudiiluʼ laabe ti tratadu.
4. Xiñee galán gucheechenu diidxaʼ lu calle.
4 Ora gucheechenu diidxaʼ lu calle neca ti ratu si la? rinínenu stale binni (Ecl. 11:6). Zándaca guinínenu tuuxa binni ni qué nidxélanu ora yegucheechenu diidxaʼ neza ralidxi. Ñee zanda quixhe íqueluʼ gucheecheluʼ diidxaʼ modo bizéʼtenu ca la? ziécheluʼ stale ora gúniluʼ ni ne zanda gacaneluʼ stale binni.