Ñee zanda gucheechenu diidxaʼ huadxí la?
1. Casi na ti libru, pora bicheecheʼ apóstol Pablu diidxaʼ de yoo pur yoo.
1 Ti libru na bicheeche apóstol Pablu diidxaʼ de yoo pur yoo «huadxí biaʼ las cuatro dede riaazibe gueelaʼ» (Daily Life in Bible Times). Neca qué gánnanu pa guiráʼ dxi bicheecheʼ Pablu diidxaʼ hora ca, peru ni nánnanu nga bíʼnibe stale cosa ti ganda «guni cre binni stiidxa Cristu» (1 Cor. 9:19-23). Zándaca gudixhe chaahuibe guiráʼ ni chigúnibe ti ganda gucheechebe diidxaʼ de yoo pur yoo ora jma zanda guidxélabe binni.
2. Xiñee galán gucheechenu diidxaʼ huadxí.
2 Ca xpinni Cristu ni nabeza ndaaniʼ stale guidxi maʼ biaacaʼ gucheechecaʼ diidxaʼ de yoo pur yoo siadóʼ ndaaniʼ semana. Yanna, ñee jma zadxélanu binni neza ra rucheechenu diidxaʼ óraca la? Ti precursor guníʼ sicaríʼ: «Qué ridxélapedu binni siadóʼ, jma nga ridxéladu laacabe huaxhinni». Óraca nga maʼ caziilaʼdxiʼ binni ne riuuláʼdxicaʼ güicaʼ diidxaʼ ne jma zanda guidxélanu ca hombre ca para guinínenu laacaʼ. Pa guʼyaʼ ca binnigola ca zanda guireeche diidxaʼ huadxí la? naquiiñeʼ quíxhecaʼ gaca guendaridagulisaa para guireeche diidxaʼ óraca.
3. Ximodo zanda gusihuínninu rápanu cuidadu ora gucheechenu diidxaʼ huaxhinni.
3 Gápanu cuidadu. Naquiiñeʼ gápanu cuidadu ora gucheechenu diidxaʼ huaxhinni. Pa chindanu ora nuu xhiiñaʼ binni, casi pa cayoxhí, zanda gábinu laa zabiguétanu despué. Pa maʼ nacahui la? galán guzuhuaʼnu ra zanda guʼyaʼ binni ni nuu ndaaniʼ yoo ca laanu, nagueendaca naquiiñeʼ guininu tu laanu ne gábinu laabe xi ziuunu. Laacaʼ galán chinenu sti xpinni Cristu o cadi guixélenu de grupu stinu, ne sanu ndaaniʼ ca calle ra nuu biaaniʼ ne ra ridiʼdiʼ binni. Cadi galán diʼ guxhidxinanu ralidxi binni pa maʼ huaxhínnipeʼ, purtiʼ zándaca maʼ chigásicabe óraca (2 Cor. 6:3). Galán gucheechenu diidxaʼ ante guicahui ca lugar ra nánnanu cadi galán guixhinni binni (Prov. 22:3).
4. Xi zabeendunu pa gucheechenu diidxaʼ huadxí.
4 Cani zabeendunu. Jma nayecheʼ ziuʼnu ora guidxélanu binni ni guinínenu de Dios ora maʼ cucheechenu diidxaʼ. Ne ra jma gucheechenu diidxaʼ la? jma zanda gacanenu binni ganna ni dxandíʼ de Dios ne ganda guilá (1 Tim. 2:3, 4). Ñee zanda quixhe chaahuinu tiempu stinu ti ganda gucheechenu diidxaʼ huadxí la?