Guendarucheeche diidxaʼ de yoo pur yoo
1. Xi zándaca guinabadiidxanu de guendarucheeche diidxaʼ de yoo pur yoo, ne xiñee.
1 «Ni maʼ runibiáʼ gadxé gadxé modo guiniʼné binni de Stiidxaʼ Dios la? zaníʼ guendarucheeche diidxaʼ ne libru La Aurora del Milenio nga ti modo jma galán de guireeche diidxaʼ yanna.» Zacá guníʼ revista Zionʼs Watch Tower (yanna Torre stiʼ ni rapa) ni biree 1 stiʼ julio iza 1893 pabiáʼ nga risaca gucheechenu diidxaʼ de yoo pur yoo. Ca dxi nabáninu riʼ, lu guidubi naca guidxilayú runibiáʼ binni ca testigu stiʼ Jiobá pur rucheechecaʼ diidxaʼ de yoo pur yoo. Peru cumu ndaaniʼ stale guidxi zeʼ dxi jma nagana raca para guidxélacabe binni ralidxi la? zándaca chuʼ tu guinabadiidxaʼ, ñee jneza nga gucheecherunu diidxaʼ de yoo pur yoo la?
2. Xi textu na naquiiñeʼ gucheechenu diidxaʼ.
2 Zeedani lu Biblia ne naquiiñeʼ gácani. Lu Biblia cá naquiiñeʼ guireeche diidxaʼ de yoo pur yoo. Jesús biseendaʼ 70 discípulo stiʼ de chupa chupa ralidxi binni (Luc. 10:5-7). Biblia riníʼ ca discípulo que «qué ñaana dxí cabe de ñuiʼ cabe stiidxa Cristu. Irá dxi bisiidi cabe ni ndaani yuʼdu roʼ ne ralidxi binni» despué de guti Maestru stícabe (Hech. 5:42). Apóstol Pablu laaca qué ñaanadxí de nucheeche diidxaʼ de yoo pur yoo (Hech. 20:20).
3. Bizeeteʼ chupa chonna cosa ribeendunu ora rucheechenu diidxaʼ de yoo pur yoo.
3 Guendarucheeche diidxaʼ de yoo pur yoo ca nácaruni ti modo nabé risaca para chinenu ca diidxaʼ nacubi ne galán ca ra nuu binni yanna. Racaneni laanu guyúbinu binni riuulaʼdxiʼ guiziidiʼ ne galán gúninu ni modo maca nexheʼ gácani (Mat. 10:11). Ora maʼ nuu binni ralidxi la? jma maʼ nuu dxi. Ora cadúʼyanu lu binni caninenu ca, cayunadiáganu stídxibe, ne cadúʼyanu cani nuu ralídxibe la? zanda gudiʼnu cuenta pa cayuuláʼdxibe de ni caninenu laabe ne xi riguu xizaa laabe. Zacá nga jma galán gúninu para guinínenu binni diidxaʼ xadxí.
4. Xi zanda gúninu para guidxélanu jma binni ora maʼ zigucheechenu diidxaʼ de yoo pur yoo yaʼ.
4 Bicheeche diidxaʼ gadxé gadxé hora. Apóstol Pablu gudixhe ique gucheeche stiidxaʼ Cristu gadxé gadxé hora para ganna guiráʼ binni ni (1 Cor. 9:23). Laanu laca zanda guchaʼnu hora maca naguíxhenu gucheechenu diidxaʼ ne gúninu ni ora maʼ nuu binni ralidxi casi ca huadxí ca, sábadu ne domingu ne ca dxi qué raca dxiiñaʼ. Bicaa lá cani qué guidxeʼluʼ ralidxi ne gudixhe ique guibiguétaluʼ sti dxi ndaaniʼ semana o sti hora para chigánnaluʼ laacabe.
5. Xi zanda gúninu para chinenu cani huará ora maʼ zigucheechenu diidxaʼ yaʼ.
5 Cani huará laaca zanda chigucheechecaʼ diidxaʼ. Xiñee qué quixhe íquenu chinenu cani huará ora maʼ zigucheechenu diidxaʼ, chinenu laacabe ra gaxha ne sanu chaahuidugá biaʼ ganda sácabe yaʼ. Ti bizáʼnanu ni huará, raca nagana para laabe guicaabe bi ne cada media hora si randa riniʼbe ti ra yoo ¡guizáʼ biéchebe ne bidxá tipa ladxidoʼbe ora yenécabe laabe yegucheechebe diidxaʼ!
6. Xiñee naquiiñeʼ quixhe íquenu cadi gusaananu de gucheechenu diidxaʼ de yoo pur yoo.
6 Cadxélarunu jma binni riuulaʼdxiʼ guiziidiʼ ora maʼ zigucheechenu diidxaʼ de yoo pur yoo. Sicaríʼ gúdxicabe ti ni rucheeche diidxaʼ: «Guyuu, maʼ nanna tu lii. Canábapiaʼ Dios guseendaʼ tuuxa para gacané naa, oracapeʼ bixhidxicabe ra puertaʼ stinneʼ. Laabe bicaadiágabe naa ne biseendabe lii». Ni bizaaca ca rusihuinni cuzabi ndaayaʼ Jiobá dxiiñaʼ ni cayúninu ra gucheechenu diidxaʼ de yoo pur yoo (Mat. 11:19). Nga runi, gudixhe ique cadi gusaanaluʼ de gucheecheluʼ diidxaʼ de yoo pur yoo.