Gucheechenu diidxaʼ pur teléfono

1. Xiñee galán nga guiníʼ íquenu gucheechenu diidxaʼ pur teléfono.

¹ Xiñee galán gúninu stipa pur gucheechenu diidxaʼ pur teléfono. Purtiʼ laani nga sti modo para gacanenu binni gunibiáʼ chaahuiʼ Dios ne ganda guilá (2 Ped. 3:9). Dxandíʼ nga jma rucheechenu ca diidxaʼ nacubi ne galán ca de yoo pur yoo. Peru cumu rápanu gana guinínenu ca binni ni qué ridxélanu ralidxi la? nga runi riquiiñenu xcaadxi modo para gúninu ni (Mat. 24:14; Luc. 10:1-7; Apo. 14:6).

2. Ximodo zanda gucheechenu diidxaʼ pur teléfono.

² Ximodo gácani. Cásica maca nexheʼ paraa nga gucheechenu diidxaʼ de yoo pur yoo la? zacaca nga rácani ora gucheechenu diidxaʼ pur teléfono. Pa rápaluʼ gana gucheecheluʼ diidxaʼ pur teléfono la? gudxi ca binnigola gábicaʼ lii paraa zanda gúniluʼ ni, ne zanda gábiluʼ stobi o xhupa ni rucheeche diidxaʼ para gúnitu ni. Lugar ra chuʼtu para guiníʼnetu binni cadi naquiiñeʼ diʼ gaca ridxi ne cadi chuʼ xiixa ni guchiiñaʼ laatu. Nuu xpinni Cristu ruuyacaʼ jma galán nga iquiiñecaʼ ti mexaʼ ra quíxhecaʼ libru ne xcaadxi cosa ni riquiiñenu ora maʼ zigucheechenu diidxaʼ de yoo pur yoo.

3. Xi naquiiñeʼ gánnanu ora gucheechenu diidxaʼ pur teléfono.

³ Xi guininu ne ximodo. Lu Xhiiñaʼ Reinu ni Rúninu, lu libru Razonamiento ne lu tratadu Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? zadxélaluʼ caadxi cosa de ni zanda guiníʼneluʼ binni. Primeru gulí ti tema, de racá guníʼ ique xi zanda guinabadiidxaluʼ ne biyubi chupa chonna textu guicabi ni guinabadiidxaluʼ ca. Laaca ni cusaananenu binni ora maʼ ziuunu de yoo pur yoo nga ni iquiiñenu ora guininu pur teléfono. Guniʼné binni ca casi ora niníʼneluʼ tuuxa zuhuaa nezaluluʼ. Cani qué huacheeche diidxaʼ pur teléfono zándaca nacaʼ jma galán gúʼndacaʼ ni chiguiniʼcaʼ lu ti guiʼchiʼ, peru naquiiñeʼ gúnicabe ni casi ora cayuíʼcabe diidxaʼ. Cadi gusiaandaluʼ ca ndiʼ: Ora gúniluʼ ni cadi gusihuínniluʼ cadxíbiluʼ ne cadi guiniʼluʼ nagueenda. Bisihuinni napuʼ respetu, napuʼ paciencia ne guniʼné laabe casi ti xhamíguluʼ, purtiʼ zudii binni cuenta ximodo caniʼluʼ. Bicaadiaga ora guicábibe lii ne gudxi laabe risaca para lii ni caniʼbe. Cadi guzeeteluʼ ricaanu bueltu rudii binni, ti cadi guiníʼ ique binni cutooloʼ xiixa pur teléfono.

4. Xi zanda cueendunu ra gucheechenu diidxaʼ pur teléfono.

⁴ Xi ribeendunu ora gucheechenu diidxaʼ pur teléfono yaʼ. Zándaca guinínenu tuuxa binni ni qué randa riree ralidxi purtiʼ huará o purtiʼ qué ridxélanu laa ralidxi pur dxiiñaʼ stiʼ. Ne laaca nuu binni ni nabeza ndaaniʼ ca lugar ra ruquíxecabe yoo o ca lugar ra qué zanda guiuʼnu. Nga runi, tobi de ca modo ra zanda cueendunu stale ni galán nga gucheechenu diidxaʼ pur teléfono.