Ximodo uzulú gúʼndanenu binni Biblia ra puertaʼ lidxi ne pur teléfono
1, 2. Ximodo zanda acanenu ca binni nuu xhiiñaʼ ti ganda gúʼdanenu laacaʼ Biblia.
1 Ca binni de ca dxi stinu riʼ nabé nuu xhiiñacabe. Neca zacá la? stáleruʼ de laacabe riuulaʼdxiʼ ucaadiaga Stiidxaʼ Dios. Ximodo zanda acanenu laacabe gánnacabe de laani yaʼ. (Luc. 11:28.) Stale de cani rucheeche diidxaʼ ca maʼ bizulú cayuundanecaʼ binni Biblia ra puertaʼ yoo ne pur teléfono. Ñee zanda gúninu sicaríʼ ti gúninu jma lu xhiiñaʼ Dios la?
2 Pa racaláʼdxinu gúʼndanenu binni la? naquiiñeʼ chuʼnu listu para uluinu laacabe ximodo rácani ratiica nuunu. Ximodo ne paraa zanda gúninu ni yaʼ.
3. Xiñee zanda uluinu binni ximodo riuundaʼ Biblia ora primé zigánnanu laa ne ximodo zanda gúninu ni.
3 Ra puertaʼ yoo. Ora idxélanu binni ucaadiaga laanu de ni na Biblia la? naquiiñeʼ uluinu laabe ti párrafo ni maca bíʼndanu, casi párrafo 1 ni cá lu primé ndaa stiʼ folletu Xi canabaʼ Dios lii guʼnuʼ. Gúʼndanu ni, gúʼyanu xi canabadiidxaʼ ni ne uxhélenu tobi o chupa textu ni zeeda luni. Ni guʼnuʼ ra puertaʼ yoo riʼ zandaa ni biaʼ gaayuʼ o chii minutu. Pa binni ni caninenu ca cayuuláʼdxibe la? zanda gábinu laabe pa zaa gúʼndanenu laabe xcaadxi párrafo ca sti dxi. (Lu Nuestro Ministerio del Reino stiʼ beeu enero 2002, yaza 6 zadxélanu xcaadxi modo ni zanda acané laanu gúninu zacá para gúʼndanenu binni.)
4. Ximodo zanda uzulú gúʼndanenu binni ra puertaʼ lidxi ora ibiguetaʼ chigánnanu laa.
4 Laaca zanda gúninu casi maʼ uninu riʼ para uzulunu gúʼndanenu binni ora ibiguetaʼ chigánnanu laa. Ora primé chigánnanu binni la? zanda uluinu laacabe tu láʼ Dios ra iquiiñenu iropa ndaa stiʼ folletu Xi canabaʼ Dios lii guʼnuʼ párrafo 1 ne 2. Ora ibiguétanu sti biaje la? maʼ zanda gúʼndanu párrafo 3 ne 4 ti usíʼdinu binni xi caníʼ Biblia de ca guenda stiʼ Jiobá. Guionna biaje ibiguétanu la? zanda gúʼndanu párrafo 5 ne 6 ne uluinu foto ni cá lu yaza 5 para usiénenu laabe zunibiáʼ chaahuibe Jiobá ra gúʼndabe Biblia. Cani bieeteʼ riʼ zanda gúninu ni ra puertaʼ lidxi binni ca.
5, 6. 1) Xiñee nuu binni jma ziuulaʼdxiʼ guʼndaʼ Biblia pur teléfono. 2) Xi zanda ininu ti ganda gúʼndanenu binni Biblia pur teléfono.
5 Pur teléfono. Zándaca nuu binni jma ziuulaʼdxiʼ iziidiʼ de Biblia pur teléfono. Idúʼyanu ni bizaaca ti bizánanu. Ti dxi ora cucheechebe diidxaʼ de yoo pur yoo uníʼnebe ti gunaa ni nabé nuu xhiiñaʼ ne laaca runi dxiiñaʼ sti ladu. Cumu qué nidxélabe gunaa riʼ ora bibiguetaʼ yegánnabe laa la? uníʼ íquebe iníʼnebe laa pur teléfono. Gunaa riʼ gudxi laabe qué gapa diʼ tiempu para guʼndaʼ Biblia. Peru bizánanu que gudxi laabe: «Ne chii o quince minutu zanda iziidiluʼ xiixa nacubi, ne laaca zanda gúniluʼ ni pur teléfono». Para na gunaa que rabi laabe: «Pa pur teléfono la? zaa». Qué nindaa diʼ bizulú bizánanu que biindané laabe pur teléfono.
6 Nouʼ nuu binni ñuulaʼdxiʼ ñúʼndanenu laa pur teléfono la? Zanda gúninu casi bizánanu ni maʼ bizeetenu ca o laaca zanda ininu sicaríʼ: «Pa naluʼ la? zanda gúʼndanu Biblia pur teléfono. Ñee jma riuulaʼdxuʼ zacá la?» Pa uyúbinu ximodo gúʼndanenu ca binni nuu xhiiñaʼ ca zanda acanenu laacabe gunibiáʼ chaahuicabe Dios (Pro. 2:5; 1 Cor. 9:23).