Gúʼndanenu binni modo ganda iniisi jma lu stiidxaʼ Dios ra puertaʼ lidxi ne pur teléfono
1. Xi pur nga rusíʼdinu binni de Biblia yaʼ.
1 Izáʼ nga riéchenu ora uzulú gúʼndanenu binni de Biblia, peru ora idxélanu ti binni riuulaʼdxiʼ iziidiʼ la? oracá nga ruzulú dxiiñaʼ stinu. Rusíʼdinu binni de Biblia para gueeda gaca tobi de cani dxandíʼ zinanda Cristu (Mat. 28:19, 20). Xi zacané laanu gúninuni jneza yaʼ.
2. Ximodo ndiʼ ridúʼndanenu binni Biblia ra puertaʼ lidxi o pur teléfono, ne xiñee jneza gúninu zacá.
2 Ne cani nuu xhiiñaʼ. Ca binni ni nabani yanna zeʼ dxi jma nuu xhiiñacabe. Nuu lugar huaxieʼ si binni nga riná guʼndanécabe laa ti hora neca primeruʼ zécabe ra nuu. Para acanenu binni la? riquiiñeʼ uzulú gúʼndanenu laacabe Biblia ra puertaʼ lídxicabe o pur teléfono. Ora uzulunu, zándaca gúʼndanenu laacabe ti ratuhuiiniʼ si, ne gúʼndanu chupa chonna textu stiʼ tobi o chupa párrafo stiʼ xiixa libru casi libru Xipeʼ ndiʼ cusiidiʼ Biblia. Sicarupeʼ nga dxiiñaʼ cayuni cani rucheeche diidxaʼ purtiʼ maʼ cayuundanecaʼ binni Biblia ra puertaʼ lidxi ne pur teléfono.
3. Xiñee naquiiñeʼ ndiʼ gúninu pur guiaananu jma tiempu ora cayuundanenu ti binni ra puertaʼ lidxi yaʼ.
3 Ñee Jneza nga gúʼndanenu binni Biblia puru si ra puertaʼ lidxi la? Coʼ. Neca cadi galán diʼ nga guiaananu stale tiempu ora deruʼ cuzulunu cayuundanenu ti binni de Biblia la? Nuestro Ministerio del Reino stiʼ mayo 1990, lu yaza 8, ruzeeteʼ: «Ora maʼ cayuundanenu binni Biblia ne chuláʼdxibe iziidibe jma la? zanda guiaananu jma tiempu para idúʼndanenu laabe». Nabé risaca nga gúninu zacá. Casi ora chiguyáʼnanu ti baʼduhuiiniʼ ni maʼ xadxí qué rizaa ni go. Primé la? caadxigá endaró nga zudiʼnu laabe para ixaleʼ ladxidoʼbe. Peru qué zabézadinu chuʼ stipa ládibe ne iniisibe galán pa puru zacá uyáʼnanu laabe. Zacaca nga ne binni cayuundanenu ca caquiiñeʼ guiaananu jma tiempu ra nuube, purtiʼ naquiiñeʼ iziidibe jma para ácabe xpinni Dios ne gánnabe xii nga ni jneza ne ni cadi jneza (Heb. 5:13, 14).
4. Xi iráʼ ndiʼ ribeendunu ora idúʼndanenu binni Biblia ndaaniʼ lidxi yaʼ.
4 Ora idúʼndanenu binni ndaaniʼ lidxi. Jma jneza nga gúʼndanenu binni ti lugar ra irútipeʼ uchiiña laanu casi ndaaniʼ lídxibe o sti lugar ra zanda ácani, purtiʼ zacaneni laabe iziidibe ne guiénebe jma de Stiidxaʼ Dios (Mat. 13:23). Laaca racaneni ni cusiidiʼ ca guʼyaʼ ximodo zanda iquiiñeʼ ni caziidiʼ ca ni cayuundanebe laa. Ra cueetu jma tiempu para gúʼndatu la? zacaneni para guiene chaahuibe jma stiidxaʼ Dios ne zuquídxini fe stibe (Rom. 10:17).
5. Pa ruundanenu ti binni ra puertaʼ lidxi, xi zanda gúninu para gúʼndanenu laabe ndaaniʼ lídxibe yaʼ.
5 Pa ruundanenu ti binni ra puertaʼ lidxi, xi zanda gúninu para ganda gúʼndanenu laabe ndaaniʼ lídxibe yaʼ. Pa maʼ chupa chonna biaje biindaneluʼ binni riʼ ti ratuhuiiniʼ, xiñee qué gábiluʼ laabe pa zanda gúʼndaneluʼ laabe jma tiempu yaʼ. Laacaʼ zanda uyúbiluʼ ximodo inabadiidxaluʼ laabe: «Ñee napuʼ tiempu yannadxí para cuinu ne idúʼndanu tema riʼ la?» o «Pabiáʼ tiempu napuʼ yannadxí para ininu de tema riʼ yaʼ». Nécapeʼ qué cueenduluʼ xiixa ra inabadiidxaluʼ laabe, cadi usaanaluʼ de gúʼndaneluʼ laabe ra puertaʼ lídxibe neca ti ratu. Ora guʼyuʼ maʼ zanda la? gudxi ni laabe sti biaje.
6. Xii nga naquiiñeʼ quixhe íquenu gúninu ora maʼ ziucheechenu diidxaʼ, ne ximodo zanda acané cani zeeda lu guiʼchiʼ riʼ laanu gúninu ni yaʼ.
6 Ora maʼ canayúbinu ca binni ni riuulaʼdxiʼ iziidiʼ de stiidxaʼ Dios, cadi guiaandaʼ laanu ni naguixhe íquenu nga uzulú gúʼndanenu laacabe Biblia ne acanenu ca binni ni riuulaʼdxiʼ iziidiʼ ca ácacaʼ xpinni Jiobá para udiicaʼ xquendanabánicaʼ laabe ne chúʼnisacaʼ. Nanna dxiichinu zaguu ndaayaʼ Jiobá stipa stinu pur acanenu binni ora maʼ ziucheechenu diidxaʼ (2 Tim. 4:5).