Gúʼndanenu binni modo ganda iniisi jma lu Stiidxaʼ Dios 1 ndaa: Ximodo nga gúʼndanenu binni de Biblia
1 Ca testigu stiʼ Jiobá ruundanecaʼ jma de xhoopaʼ miyón binni guiráʼ beeu lu idubi naca Guidxilayú. Pa iquiiñenu ca modo ni nápanu para gusíʼdinu ca la? zanda acanenu cani cayúʼndanenu iniisicaʼ lu Stiidxaʼ Dios dede gudiicabe laacabe Jiobá ne chuʼnísacabe ne laaca zacanenu laacabe para gánnacabe gusiidicabe stobi (2 Tim. 2:2). Ñuláʼdxiluʼ ñacaneluʼ laacabe para niziidicabe jma la? Dede lu beeu riʼ maʼ zuzulú zaree lu Xhiiñaʼ Reinu ni Rúninu ra chigusiene laanu xipeʼ nga naquiiñeʼ gúninu para ganda gúʼndanenu binni ti iniisi jma lu Stiidxaʼ Dios.
2 Pora ndiʼ zanda ucaanu maʼ cayúʼndanenu binni. Pa nabé riníʼneluʼ tuuxa de Biblia ne ruʼnuʼ ni jneza neca ti ratuhuiiniʼ si, ne riquiiñeluʼ Biblia, ti foyetu o ti libru ni nápanu para gúʼndanenu binni la? lii mápeca cayúʼndaneluʼ laabe . Ne zaqueca ni neca ra puertaʼ si gúnitu ni o guiniʼtu pur teléfono. Zanda ucaaluʼ de que cayúʼndaneluʼ tuuxa pa maʼ biindaneluʼ laabe chupa biaje despué de dxi biluiʼluʼ laabe ximodo rúʼndanenu binni ne guʼyuʼ de que dxandíʼ zuundarube.
3 Stale biaje ora rúʼndanenu binni riquiiñenu foyetu Exige ne libru Conocimiento. Ora ilúxenu cani ne laacabe la? zanda guʼndanerunu laacabe libru Adoremos a Dios pa rihuinni de que dxandíʼ caniisibe lu Stiidxaʼ Dios neca nanene, ne rusisácabe ni caziidibe. Ne foyetu Lii zanda gaca xhamíguluʼ Dios zanda iquiiñeʼ ni ora gusíʼdinu binni ni qué gápapeʼ scuela o ni huaxiéʼ nanna guʼndaʼ.
4 Gúʼndanenu binni ca nabé huabeenduni stale ni galán, purtiʼ zacá maʼ huayacanenu miyón binni ni dxandíʼ zinándacaʼ Jesucristu yanna (Mat. 28:19, 20). Pa chinándanu cani gueeda lu guiʼchiʼ riʼ lu xcaadxi beeu zeeda ca la? zánnanu ximodo gúʼndanenu binni para iniisi jma lu Stiidxaʼ Dios.