Ndaa 12: Ximodo acanenu ni cayúʼndanenu ca para uzulú usiidiʼ binni de Biblia
Gúʼndanenu binni modo ganda iniisi jma lu Stiidxaʼ Dios
1 Zándaca idxibi cani cayúʼndanenu ca ora uzulú ucheechecaʼ diidxaʼ ne ora gánnacaʼ laaca zuundanecaʼ binni Biblia. Ximodo zanda acanenu laacabe ti cadi idxíbicabe gúnicabe dxiiñaʼ risaca riʼ ora maʼ ziucheechenu diidxaʼ yaʼ. (Mat. 24:14; 28:19, 20.)
2 Binni ni cayúʼndanenu ni maʼ zanda chigucheeche diidxaʼ neca caʼruʼ chúʼnisa zándaca maʼ xadxíhuiiniʼ ridíʼdibe lu Scuela stiʼ Cani Rucheeche Diidxaʼ. Iráʼ ni riziidibe luni para cueebe libana stibe ne utiidibe ni zacaneni laabe gánnabe usiidibe binni chinanda Cristu, gúnibe dxiiñaʼ sin ituílube ne usiidibe Stiidxaʼ Dios jnézapeʼ (2 Tim. 2:15).
3 Bisiidiʼ laabe ne ejemplu. Jesús bisiidibe ca discípulo stibe ra gúdxibe laacaʼ xi gúnicaʼ ne ra gudíxhebe ti ejemplu sicarú nezalucaʼ. Nabe: Iráʼ tu iziidiʼ chaahuiʼ zanna biaʼ nanna maestru stiʼ (Luc. 6:40). Laanu laaca naquiiñeʼ gúninu casi biʼniʼ Jesús ne quíxhenu ti ejemplu sicarú ora maʼ ziucheechenu diidxaʼ. Ora guʼyaʼ ni caziidiʼ ca ni rúninu ora maʼ ziucheechenu diidxaʼ la? zánnabe ribiguétanu rigánnanu binni para uzulunu gúʼndanenu laacaʼ Biblia.
4 Bisiene laabe ora gábibe tuuxa binni pa zuundanebe laa Biblia cadi naquiiñeʼ diʼ iniʼbe xi iráʼ rúninu ora rusíʼdinu binni. Nuu tiru guʼndanésinu laacabe ti párrafo o chupa stiʼ folletu o libru ni chigúʼndanenu laacabe ca maʼ zuluinu ximodo nga rúʼndanenu binni. Zadxélaruluʼ xcaadxi ni zacané lii lu yaza 8 stiʼ guiʼchiʼ riʼ ne lu Nuestro Ministerio del Reino stiʼ enero 2002, yaza 6.
5 Ora guʼyuʼ maʼ zanda la? biʼniʼ invitar ni cayuundaneluʼ ca chiné lii o stobi ni rucheeche diidxaʼ ni nanna para chiguundanetu binni, ne gaʼbuʼ laabe zanda icábibe lu ti párrafo o iniʼbe de ti textu zeeda luni. Ne gúʼyasibe zaziidibe stale ximodo gúʼndanebe binni ti iniisi lu Stiidxaʼ Dios (Pro. 27:17; 2 Tim. 2:2). Uluu gana laabe ne gudxi laabe ximodo gúnibe ni jma galán.
6 Usíʼdinu cani nacubi cucheeche diidxaʼ para ácacaʼ maestru de lu Stiidxaʼ Dios zacaneni laacabe gánnacabe gúnicabe dxiiñaʼ sicarú de uzulú guʼndanécabe binni (2 Tim. 3:17). Dxandipeʼ izáʼ riéchenu ora laanu ne cani rúʼndanenu gábinu binni sicaríʼ: «Ni cayati nisa la? gueda gué nisa ni rudii enda nabani sin quixe gastiʼ» (Apo. 22:17).