PARA IQUIIÑEʼ

Gúʼndanenu binni modo ganda iniisi jma lu Stiidxaʼ Dios

Guiʼchiʼ riʼ neni cani huayeeda lu Xhiiñaʼ Reinu ni Rúninu, cani jma zanda iquiiñenu para gúʼndanenu binni modo ganda iniisi jma lu Stiidxaʼ Dios. Riquiiñeʼ gápanu ni ne gúʼndanu ni ora chigúʼndanenu binni Biblia. Laaca zanda iquiiñeʼ ni ora idagulisaanu para chigucheechenu diidxaʼ. Ca binnigola ni ruuyaʼ modo rireeche diidxaʼ ca zanda iquiiñeʼ cani para udiicaʼ libana ora chigánnacaʼ ca grupuhuiiniʼ ni ruundaʼ libru.

1 ndaa: Ximodo nga gúʼndanenu binni Biblia

Pa nabé riníʼneluʼ tuuxa de Biblia neca ti ratuhuiiniʼ modo maca rúninu ni ne ruʼnuʼ ni jneza ra iquiiñeluʼ Biblia si, o iquiiñeluʼ ti folletu ne Biblia o ti libru ni nápanu para gúʼndanenu binni la? maʼ zanda ucaaluʼ ruundaneluʼ laabe Biblia. Zanda ucaaluʼ cayuundaneluʼ tuuxa pa maʼ biindaneluʼ laa chupa biaje despué de dxi biluiʼluʼ laabe ximodo rúʼndanenu binni ne guʼyuʼ dxandíʼ nápabe gana iziidirube jma (km-ZPI 7/04 yaza 4).

Folletu o libru ni zanda iquiiñeluʼ

◼ Xi canabaʼ Dios lii guʼnuʼ

◼ El conocimiento que lleva a vida eterna

◼ Adoremos al único Dios verdadero

◼ Folletu Ximodo zanda gaca xhamíguluʼ Dios, zanda iquiiñeni para ca binni ni huaxiéʼ uzá scuela o para cani huaxiéʼ nanna guʼndaʼ.

2 ndaa: Ximodo gúʼndaluʼ ti chigusiidiluʼ binni

Naquiiñeʼ usíʼdinu jneza ti chindá cani ndaaniʼ ladxidóʼ ni cayúʼndanenu ca. Para ganda gúninu nga la? naquiiñeʼ guʼndaʼ chaahuinu ne gúʼyanu xi caquiiñebe ti ganda acanenu laabe (km-ZPI 8/04 yaza 1).

Ximodo zanda gúniluʼ ni

◼ Biindaʼ xi lá ra chiguundaneluʼ laabe, biiyaʼ xiná ca letra yaasehuiiniʼ nuu luni, ca dibuju ne ca cuadru ni zeeda luni.

◼ Biyubi ra ricabi ni canabadiidxani ne bizaa raya xaʼnaʼ ca diidxaʼ ni jma risaca zeeda luni.

◼ Biyubi ca textu ni cadi cá xiná ni racaláʼdxiluʼ gúʼndaneluʼ laabe. Bicaa xiixa ni zanda iquiiñeluʼ uriá yaza stiluʼ.

◼ Biyubi cani jma naquiiñeʼ guietenaláʼdxitu de ni bíʼndatu.

Bisiidiʼ laabe modo ganda guiénebe ni

◼ Ora guni orarluʼ bizeeteʼ lá binni cayuundaneluʼ ca luni ne xi caquiiñebe.

◼ Biiyaʼ xi zaca nagana para laabe guiénebe o icaabe ni na.

◼ Gunabadiidxaʼ laca lii: «Xi naquiiñeʼ guiénebe o xi naquiiñeʼ gúnibe ti ganda iniisibe lu Stiidxaʼ Dios yaʼ. Ximodo zanda chindá cani caziidibe ca dede ndaaniʼ ladxidoʼbe yaʼ».

◼ Pa ganda la? udixhe ti ejemplu, bisiéneni laabe o unabadiidxaʼ laabe chupa chonna cosa ni acané laabe guiénebe ni caniʼtu o ti textu zeeda lu Biblia.

3 ndaa: Modo iquiiñenu ca textu stiʼ Biblia jneza

Rúʼndanenu binni Biblia purtiʼ ni racaláʼdxinu nga chinándacabe Cristu, ne nga nga ni ribeendunu ora acanenu laacabe guiénecabe ne icaacabe cani riziidicabe lu Stiidxaʼ Dios ne gúnicabe ni (Mat. 28:19, 20; 1 Tes. 2:13). Nga runi, ora usíʼdinu laacabe la? naquiiñeʼ uluinu lu Biblia nga zeeda cani cayábinu laacabe (km-ZPI 11/04 yaza 4).

Biluíʼ laabe ndaaniʼ Biblia nga zeeda ni cusiidiluʼ

◼ Bisiidiʼ ni cayuundaneluʼ ca ganna uyubi ca textu ca ndaaniʼ Biblia stiʼ.

◼ Biyubi ne bisiene laabe ca textu ra cá cani runi crenu.

◼ Unabadiidxaʼ laabe xiixa de ni cayuundatu. Ne laabe nga naquiiñeʼ usiénebe ca textu ca lii, cadi lii diʼ usiéneluʼ cani laabe.

◼ Ora acaláʼdxiluʼ usiéneluʼ ti textu la? cadi usiéneluʼ xi guiráʼ nga riniʼni ti cadi ácani nagana para laabe. Bizeeteʼ ni caquiiñeʼ si para usiéneluʼ xiixa de ni caniʼtu.

◼ Biluíʼ laabe ximodo zanda gúnibe iráʼ ni caziidibe. Ucané laabe gúʼyabe ximodo zanda acané ca textu ca laabe lu endanabani stibe.

Ndaa 4: Ximodo usíʼdinu ni cayúʼndanenu guʼndaʼ dede ante

Ora ni cayúʼndanenu ca guʼndaʼ dede ante, uzaa raya xaʼnaʼ cani icabi ne iníʼ ique ximodo zanda iníʼ cani sin guʼndaʼ lu guiʼchiʼ la? jma nagueenda zaniisi lu Stiidxaʼ Dios. Nga runi, ora maʼ ruundatu Biblia gatigá la? biindané laabe idubi ti ndaa para usiidiluʼ laabe ximodo gúnibe ni. Ne jma galán nga gúʼndatu idubi ti capítulo o idubi ti ndaa stiʼ ti folletu (km-ZPI 12/04 yaza 1).

Uzaabe raya xaʼnaʼ cani icábibe ne ucaabe xiixa uriá yaza stibe

◼ Bisiene laabe ximodo idxélabe cani naquiiñeʼ si icábibe de ni canabadiidxaʼ ni.

◼ Biluíʼ laabe folletu o libru stiluʼ ra cayuundatu ca para gúʼyabe ximodo ruzaaluʼ raya xaʼnaʼ si cani jma zaquiiñeʼ.

◼ Ucané laabe guiénebe ca ndiʼ: cada textu ni cá luni caníʼ xiixa de ni zeeda lu párrafo ca, ne bisiidiʼ laabe gánnabe ucaabe uriá yaza ra cayuundatu ca cani jma zaquiiñeʼ si.

Gánnabe xi chiguieeteʼ ne guietenaláʼdxibe ni biziidibe

◼ Bisiidiʼ laabe gúʼyabe xi lá ra chiguundabe, xiná ca letra yaasehuiiniʼ nuu luni ne ca dibuju zedané ni.

◼ Gudxi laabe galán nga guietenaláʼdxibe ni jma risaca zeeda luni ora maʼ biluxe biindabe ni.

Ndaa 5: Pabiáʼ zanda gúʼndanenu ni caziidiʼ ca

Biaʼ gúʼndacabe ca zácani biaʼ ganda guiene ni caziidiʼ ca ne biaʼ tiempu nápabe ne biaʼ tiempu napa ni cusiidiʼ ca (km-ZPI 02/05 yaza 6).

Biʼniʼ fe stiʼ ni caziidiʼ ca naguidxi

◼ Cadi gúʼndaneluʼ laabe nagueenda pacaa maʼ qué ziene chaahuibe ni cusiidiʼ Biblia.

◼ Biquiiñeʼ tiempu biaʼ caquiiñeʼ para acaneluʼ ni caziidiʼ ca guiene ne icaa cani caziidiʼ.

◼ Ulee tiempu para usiéneluʼ ca textu ni jma zacané laabe guiénebe ni caziidibe.

Cadi iree cueʼluʼ de tema stini

◼ Pa ni caziidiʼ ca nabé riulaʼdxiʼ güíʼ diidxaʼ de sti cosa la? galán gábiluʼ laabe zanda iniʼtu de laani ora maʼ biluxe biindatu.

◼ Cadi galán diʼ nga iniʼluʼ stale ora maʼ cayuundatu. Cadi tan uzeeteluʼ de xiixa ni bizaaca o de sti cosa ni cadi caquiiñepeʼ ora maʼ cayuundaneluʼ laabe, pacaa zucueeza cani laabe de guiene chaahuibe cani jma naquiiñeʼ gánnabe de Biblia.

Ndaa 6: Ora ni caziidiʼ ca inabadiidxaʼ xiixa

Ora maʼ ruundaneluʼ tuuxa la? jma jneza nga gúʼndaneluʼ laabe cani rusiidiʼ Biblia ca casi maca zeeda cani lu libru o folletu ni caquiiñeluʼ ne cadi ichésaluʼ lu sti tema. Zacá zaniisibe lu Stiidxaʼ Dios, purtiʼ caziidibe cani naquiiñeʼ gánnabe primeru (km-ZPI 3/05 yaza 4).

Uníʼ ique ante icábiluʼ

◼ Cani inabadiidxabe de ni caniʼtu la? zanda icábiluʼ ni laabe oraqueca.

◼ Pa inabadiidxabe xiixa gadxepeʼ de ni cayuundatu o de ni caquiiñeʼ gúʼndaluʼ jma la? galán icábiluʼ cani laabe sti ora, ne laaca galán ucaaluʼ cani.

◼ Pa raca nagana para ni caziidiʼ ca icaa ni cusiidiluʼ laa la? jma galán iquiiñeluʼ xcaadxi libru o revista stinu para gúʼndaneluʼ laabe xi riníʼ Biblia de laani.

◼ Pa neca zacá ni caziidiʼ ca qué naʼ icaani la? zanda usiéneluʼ ni laabe sti ora ne laguundaʼ ra maca zetu.

Bicabi ora nannuʼ

◼ Pa qué gannuʼ xi icábiluʼ la? cadi iniʼluʼ ni raʼbuʼ biaʼsi jneza.

◼ Bisiidiʼ laabe chahuidugá gánnabe iquiiñebe ca libru ne revista ni ricaanu.

Ndaa 7: Oración ni rúninu ora rúʼndanenu binni

Riquiiñenu ndaayaʼ stiʼ Jiobá para iniisi cani cayúʼndanenu ca lu Stiidxabe. Nga runi, galán nga gúninu ti oración ora uzulú gúʼndanenu laabe ne ora ilúxenu (km-ZPI 4/05 yaza 4).

Ximodo uzulú guni orárnenu laabe

◼ Ca binni ni maca riulaʼdxiʼ iziidiʼ de Dios la? dede primé ca biaje gúʼndanenu laacabe zanda guni orarnu.

◼ Ne xcaadxi binni la? naquiiñeʼ uyúbinu ximodo uzulú guni orárnenu laacaʼ.

◼ Zanda iquiiñeluʼ Salmo 25:4, 5 ne 1 Juan 5:14 para usiéneluʼ xiñee naquiiñeʼ aca orar.

◼ Zanda gúʼndaneluʼ laabe Juan 15:16 para guiénebe pabiáʼ nga risaca guni orarnu Jiobá de lu lá Jesucristu.

Xi uzeeteluʼ lu oración

◼ Bisisaca Jiobá purtiʼ ra nuube nga cadá iráʼ ni cazíʼdinu.

◼ Bizeeteʼ xiixa ni usihuinni racaláʼdxiluʼ iniisi ni cayuundaneluʼ ca lu Stiidxaʼ Dios.

◼ Bidii xquíxepeʼ Jiobá pur xquídxibe ni caquiiñebe yanna.

◼ Unabaʼ Jiobá uguu ndaayaʼ stipa ni cayuni ni caziidiʼ ca pur guni iráʼ ni maʼ ziziidiʼ lu xquendanabani.

Ndaa 8: Acanenu cani cayúʼndanenu chuʼcaʼ ndaaniʼ xquidxi Jiobá

Ora rigúʼndanenu binni Biblia la? cadi para usíʼdisinu laacabe de laani, ni racaláʼdxinu nga chúʼcabe ndaaniʼ xquidxi Jiobá. Ulee ti tiempuhuiiniʼ iráʼ semana para usiidiluʼ laacabe ximodo nga xquidxi Jiobá (km-ZPI 4/05 yaza 8).

Ca endaridagulisaa

◼ Gudxi laabe ximodo raca cada tobi de ca endaridagulisaa stinu. Biʼniʼ invitar laabe chebe dede primé ca biaje chigannuʼ laabe.

◼ Gudxi laabe cani jma risaca ni bieeteʼ ra ridagulisaanu.

◼ Ucané laabe chuláʼdxibe chebe ora maʼ chiguietenaláʼdxinu guendaguti stiʼ Cristu, chebe ca guendaridagulisaa roʼ ne chebe ora gueeda ganna binnigola ni riganna ca binni ridagulisaa laanu.

◼ Biquiiñeʼ ca foto ni cá lu ca libru o lu ca revista ca ti gúʼyabe ximodo raca cani.

◼ Gudxi laabe gúʼndabe folletu Los testigos de Jehová: ¿quiénes son y qué creen?

Biquiiñeʼ ca videu ni ucaa laabe usihuínnibe riuláʼdxibe xquidxi Jiobá

◼ Los testigos de Jehová... la organización tras el nombre

◼ Toda nuestra asociación de hermanos

◼ Unidos gracias a la enseñanza divina

◼ Hasta los cabos de la Tierra

Ndaa 9: Ximodo acanenu ni cayúʼndanenu ti iniʼné binni ratiica si nuu

Ora ni cayuundaʼ Biblia ca gapa fe lu ni caziidiʼ la? nga zucaa laabe iniʼbe de laani (km-ZPI 5/05 yaza 1).

Gudxi laabe galán ucheechebe diidxaʼ

◼ Ñee napa ni caziidiʼ ca xhamigu o binnilidxi ni ñanda ñuni invitarbe laa ñuu ora chiguundaneluʼ laabe Biblia la?

◼ Ñee nuu tuuxa ni runinebe dxiiñaʼ, ni rinebe scuela o cani runibiaʼbe ni ruluíʼ riulaʼdxiʼ iziidiʼ jma de ca diidxaʼ nacubi ne galán riʼ la?

Bisiidiʼ laabe ximodo iniʼbe cani runi crebe

◼ Ora maʼ gúʼndatu cani jma naquiiñeʼ gánnabe, unabadiidxaʼ laabe: «Ximodo nusiéneluʼ ndiʼ ca binnilídxiluʼ ne iquiiñeluʼ Biblia yaʼ».

◼ Bisiidiʼ laabe gápabe respetu ne iniʼbe ne diidxaʼ nadóʼ ora usiidibe de Jiobá ne de cani chiguni.

◼ Ni caziidiʼ ca zanda iquiiñeʼ folletu Los testigos de Jehová: ¿quiénes son y qué creen? para usiene ca xhamigu ne ca binnilidxi ximodo rúninu dxiiñaʼ ne xii nga cani runi crenu zeeda lu Biblia.

Ndaa 10: Ximodo acanenu ni cayúʼndanenu Biblia ti ucheeche diidxaʼ de yoo pur yoo

Ora ca binnigola ca iniʼcaʼ maʼ cayuni binni ni cayúʼndanenu ca ni na Jiobá la? maʼ zanda ácabe tobi ni rucheeche diidxaʼ ni caʼruʼ chúʼnisa (km-ZPI 6/05 yaza 1).

Biindané laabe ximodo ucheechebe diidxaʼ

◼ Biluíʼ ni caziidiʼ ca paraa zanda idxela modo iniʼné binni.

◼ Ucané laabe cuibe modo iníʼnebe binni ne cadi ácani nagana ne ganda iquiiñeʼ ni neza ra rucheechetu diidxaʼ.

◼ Gudxi laabe iquiiñebe Biblia ora chigucheechebe diidxaʼ.

◼ Bisiidiʼ laabe ximodo gúnibe ni. Bisiidiʼ laabe ximodo icábibe binni sin uchiichibe laacaʼ cada inabadiidxacaʼ laabe xiixa.

Bicheechené ni caziidiʼ ca diidxaʼ

◼ Bizulú lii para gúʼyabe ximodo iquiiñeluʼ cani maʼ biindatu.

◼ Biiyaʼ ximodo laabe ne biiyaʼ xii nga zanda gúnibe. Nuu ora galán nga iniʼbe xiixa ora maʼ caniʼluʼ.

◼ Ucané ni nacubi rucheeche diidxaʼ ca gapa ti ora para iree lu guidxi.

Ndaa 11: Ximodo usíʼdinu ni cayúʼndanenu ganna xi iníʼ ora ibigueta chiganna binni

Dede primé ca chigánnabe tuuxa riquiiñeʼ gánnabe xi iniʼbe ti ganda ibiguétabe sti biaje. Gudxi ni caziidiʼ ca usihuinni dxandíʼ riulaʼdxiʼ acané ca binni iniʼné. Bisiidiʼ laabe gánnabe udiibe lugar iníʼ binni ne ucaadiágabe ora maʼ caniʼcaʼ ne gánnabe gúʼyabe xi riguu laacaʼ xizaa (km-ZPI 7/05 yaza 1).

Bisiidiʼ laabe ximodo iniʼbe ora ibiguétabe

◼ Guʼyanésiluʼ laabe xi iráʼ uníʼcabe primé biaje yegánnabe binni ca la? bisiidiʼ laabe cuibe xiixa ni chulaʼdxiʼ binni ca ucaadiaga.

◼ Irópatu naquiiñeʼ quixhe chaahuitu ximodo iníʼnetu binni chigánnatu ca, ne laguundané laabe ti textu ne ti párrafo stiʼ ti libru o ti folletu.

◼ Laguyubi xi inabadiidxatu ora maʼ biluxe uníʼnetu binni.

Bisiidiʼ laabe gúnibe ni nagueenda

◼ Gudxi laabe ibiguétabe nagueendaca ra nuu ca binni ni uyuulaʼdxiʼ iziidiʼ jma.

◼ Bisiene laabe cadi ireebe gana de chiyúbibe laacaʼ ralídxicaʼ.

◼ Bisiidiʼ laabe ximodo guiaananebe ca binni ca xi dxi ne pora nga ibiguétabe ra nuucaʼ ne bisiene laabe pabiáʼ risaca ibiguétabe hora biaananebe binni.

Ndaa 12: Ximodo acanenu ni cayúʼndanenu para uzulú usiidiʼ binni de Biblia

Risaca stale nga gúninu casi biʼniʼ Jesús ne quíxhenu ti ejemplu sicarú ora maʼ ziucheechenu diidxaʼ. Naquiiñeʼ guiene ni caziidiʼ ca ribigueta rigánnanu binni purtiʼ racaláʼdxinu gúʼndanenu laacabe de Biblia (km-ZPI 8/05 yaza 1).

Ora gábibe tuuxa pa zuundanebe laa de Biblia

◼ Bisiene laabe cadi naquiiñeʼ diʼ iniʼbe xi iráʼ rúninu ora rusíʼdinu binni.

◼ Nuu tiru zanda gúnibe ni ra guʼndanésibe laacaʼ tobi o chupa párrafo si stiʼ folletu o libru ni caquiiñebe.

◼ Biindaʼ ne biluíʼ laabe xiixa ni zanda acané laabe uzulú gúʼndanebe binni Biblia (biiyaʼ km-ZPI 8/05 yaza 8 ne km-S 1/02 yaza 6).

Bisiidiʼ laabe ti ácabe tobi ni nanna usiidiʼ

◼ Gudxi laabe zanda icá labe para tiidibe lu Scuela stiʼ cani Rucheeche Diidxaʼ.

◼ Biiyaʼ ximodo ganda chineluʼ ni nacubi rucheeche diidxaʼ ca ora chiguundaneluʼ xcaadxi binni, ne laaca zanda iniʼbe xiixa ora cusiidiluʼ.