Chuʼnu listu para gusiidiʼ chaahuinu binni
1. Xiñee galán gacanenu binni chuulaʼdxiʼ ni cá lu Stiidxaʼ Dios ora maʼ cayúʼndanenu laa.
1 Ora maʼ cadúʼndanenu binni riquiiñeʼ chuʼnu listu dede ante para gacanenu laabe gúnibe ni na Jiobá. Pa racaláʼdxinu cueendunu ni galán la? naquiiñeʼ gacanenu laabe chuuláʼdxibe cani zeeda lu Biblia, nga zucaa laabe gúnibe ni na Jiobá (Deu. 6:5; Pro. 4:23; 1 Cor. 9:26). Peru, ximodo zanda gúninu nga yaʼ.
2. Xiñee caquiiñeʼ guni orarnu ante guzulú gúʼndanu ni chigusíʼdinu binni.
2 Biʼniʼ orar Jiobá ora maʼ cayuundaluʼ ni chigusiidiluʼ binni. Cumu Jiobá nga rusiniisi semiá huiiniʼ ni gusábanu ndaaniʼ ladxidóʼ binni la? nga runi jma jneza guni orarluʼ ante gúʼndaluʼ ni chigusiidiluʼ binni. Lu oración ca zanda guzeeteluʼ binni ca ne xi guendanagana nápabe (1 Cor. 3:6; Sant. 1:5). Ora gúniluʼ zacá zacané nga lii guʼyaʼ chaahuiluʼ ximodo chindá stiidxaʼ Dios ndaaniʼ ladxidoʼbe (Col. 1:9, 10).
3. Xiñee galán guiníʼ íquenu binni ni cayúʼndanenu ca ora maʼ cayuʼnu listu para chigusíʼdinu laa.
3 Guníʼ ique ni caquiiñeʼ binni ni cayuundaneluʼ ca. Jesús guníʼ ique xi zanda gusiidiʼ cani cucaadiaga laa, ngue runi jneza modo bisiidiʼ. Guyuu chupa biaje ra gunabadiidxacabe laabe ti cosa si, nácabe: «Xi gune para gapa enda nabani ni qué zaluxe». Gadxé gadxé modo bicabi Jesús cada tobi de laacabe (Luc. 10:25-28; 18:18-20). Ni bíʼnibe ca rusiidiʼ laanu naquiiñeʼ guiníʼ íquenu xi caquiiñeʼ binni ni cayúʼndanenu ca ora maʼ cayuʼnu listu para chigusíʼdinu laa. Xi textu ni cá lu libru ca zanda guidúʼndanenu laabe. Panda párrafo zanda guidúʼndanu. Xi zándaca gaca nagana para laabe guiénebe o gúnibe de ni zeeda lu tema ca. Pa guiníʼ íquenu xi zándaca guinabadiidxabe laanu la? jma jneza zacábinu laabe.
4. Ximodo zanda chuʼnu listu ante chigúʼndanenu binni.
4 Biindaʼ tema ca dede ante. Neca stale biaje maʼ huayúʼndanu ni cá lu libru ca, peru para binni ni cadúʼndanenu ca primeruʼ nga chiguundabe ni. Ne pa racaláʼdxinu chindá cani cusíʼdinu ndaaniʼ ladxidoʼbe la? naquiiñeʼ gúʼndanu ni dede ante. Ne cumu nga nga ni rábinu laabe gúnibe la? nga runi laapenu nga naquiiñeʼ guidúʼndanu tema ca ne ca textu ni zaquiiñenu. Ora gúninu ni zacá, galán guiníʼ íquenu binni ca ne dede guyúbinu cani jma chiguzéʼtenu (Rom. 2:21, 22).
5. Ximodo zanda gúninu casi runi Jiobá.
5 Jiobá nabé rizaalaʼdxiʼ pabiáʼ caziidiʼ cada binni ni cayúʼndanenu (2 Ped. 3:9). Pa cueenu tiempu para gúʼndanu dede ante la? laaca zusihuínninu rizaaláʼdxinu binni ni cayúʼndanenu.