Ximodo gucheechenu diidxaʼ ra nuu ca tienda ca
1. Xiñee galán gucheechenu diidxaʼ ra nuu ca tienda ca.
1 Ñuláʼdxiluʼ nucheecheluʼ diidxaʼ ra ridxagalúcabe binni galán ne ra qué riaadxaʼ tu iníʼneluʼ la? Zándaca gúniluʼ ni ra riucheecheluʼ diidxaʼ ne ca binni ridagulisaaneluʼ. Ximodo yaʼ. Ra chigánnaluʼ binni ra tienda. Cani rucheeche diidxaʼ ra tienda la? nabé huabeendúcabe stale ni galán.
2. Xi zanda gaca para ireeche diidxaʼ ra rutoocabe.
2 Nuu caadxi neza binni ridagulisaa rucheechecabe diidxaʼ neza ra nuu stale tienda. Bíchinu ni ruuyaʼ paraa gucheechecabe diidxaʼ ca naquiiñeʼ gápabe guiʼchihuiiniʼ ra cá neza ra rireeche diidxaʼ (tarjetas de territorio) para ra rutoo si binni. Lu ca guiʼchihuiiniʼ ra cá ra nabeza binni ne lade ni nuu ra ridoo la? naquiiñeʼ ucaabe de que cadi chúʼcabe ca lugar ra ridoo ca. Peru nuu lugar la? óraca chigánnacabe binni ra lidxi laaca zadíʼdicabe ca lugar ra cadoo ca. Pa qué huacheecheluʼ diidxaʼ ra cutoocabe la? zanda guzululuʼ ra nuu ca puestu ni jma nahuiiniʼ ca.
3. Xi zacané laanu gucheechenu diidxaʼ ra nuu ca tienda ca ne cueendunu ni galán yaʼ.
3 Biquiiñeʼ huaxiéʼ diidxaʼ ora guzulú iniʼluʼ. Para ganda gucheecheluʼ diidxaʼ ra nuu ca tienda ca la? bizuchaahuiʼ casi ora ñeluʼ ti guendaridagulisaa ndaaniʼ Yoo stiʼ Reinu. Laaca galán guyúbiluʼ ti hora ra qué gapapeʼcabe stale dxiiñaʼ. Pa ganda la? biuu ora maʼ irutiʼ tu cabeza guni tendércabe laa. Gunabaʼ iníʼneluʼ xaíque stini o ni cayapa ni ne cadi indaaluʼ. Xi zanda gaʼbuʼ laabe yaʼ.
4-6. Xi zanda gábinu dueñu o xaíque stiʼ ti tienda.
4 Ora iníʼneluʼ dueñu o xaíque stini zanda iniʼluʼ sicaríʼ: «Ca binni ni rutoo ca nabé nuu xhiiñacabe ne huaxiéʼ ridxéladu laacabe ra lídxicabe, nga runi zeeda gánnadu lii ra cayúniluʼ dxiiñaʼ. Ca rebista ni rizánedu riníʼ cani ximodo nga cani cayaca yanna riʼ». De racá zanda iniʼluʼ de xiixaʼ ni zeeda lu rebista ca.
5 Raríʼ nuu sti modo zanda iniʼluʼ: «Stale binni ñulaʼdxiʼ niziidiʼ jma de lu Biblia, peru huaxiéʼ tiempu nápacaʼ. Tratadu riʼ caníʼ ximodo rúʼndanedu binni sin quixe ne zacaneni lii gannuʼ cani racaláʼdxiluʼ gannuʼ de Biblia». Oraqueruʼ biluíʼ laabe yaza 4 ne 5 stiʼ tratadu ¿Le gustaría saber más de la Biblia?
6 Pa ni cutoo ca ruluíʼ nabé nuu xhiiñaʼ la? zanda gusaananeluʼ laabe ti tratadu ne iniʼluʼ: «Zadiideʼ stiʼ biaje ora maʼ cadi nuu xhiiñapeluʼ. Ñualaʼdxeʼ ñanna ximodo ruuyaluʼ tratadu riʼ».
7. Ximodo zanda acanenu ca binni ridxélanu ca lugar ra ridoo ca chuláʼdxicaʼ gánnacaʼ jma yaʼ.
7 Ucané binni chulaʼdxiʼ ganna jma. Laaca zanda gúʼndanenu binni de Biblia ca lugar ra ridoo ca. Ti precursor especial nabé yesaana rebista ra nuu ti binni ni rutoo. Ora bisihuinni binni que nabé riulaʼdxiʼ ni ruundaʼ luni la? precursor riʼ biluíʼ laabe ne foyetu Exige ximodo ndiʼ ruundanécabe binni de Biblia. Gudíxhecabe de que ra dxiiñaʼ que gúʼndanebe laa Biblia, ne cumu nánnabe cutoo binni que la? rindaabe biaʼ 10 o 15 minutu si cada gúʼndacabe. Gúninu casi modo bíʼnibe ca ne guyúbirunu cani naquiiñeʼ ucaadiágacaʼ ra gucheechenu diidxaʼ ca lugar ra ridoo ca.