Ñee nápaluʼ ti lugar ra gucheecheluʼ diidxaʼ lii si la?
1. Xiñee ricaa ca xpinni Cristu ti lugar para gucheechecaʼ diidxaʼ stúbicaʼ.
1 Zándaca bidii ca binnigola lii ti lugar para gucheecheluʼ diidxaʼ lii si. Pa gudiicabe ni lii ne nuuni gaxha de ra lídxiluʼ la? zindaluʼ nagueenda lugar ca para gucheecheluʼ diidxaʼ, ne zanda cheluʼ stúbiluʼ o chineluʼ stobi. Ribeendunu stale ora rúninu stipa para gucheechenu diidxaʼ ne ca binni ridagulisaa. Peru pa gápanu ti lugar para gucheechenu diidxaʼ laasinu la? zusiidiʼ chaahuinu binni Stiidxaʼ Dios, jmaruʼ si pa xiroobaʼ ra rucheeche ca binni ridagulisaa diidxaʼ (Hech. 10:42).
2. Xi zabeendunu pa gápanu ti lugar ra gucheechenu diidxaʼ laasinu.
2 Ni zabeendunu. Nuu caadxi xpinni Cristu nacaʼ jma galán gucheechecaʼ diidxaʼ ora cuxhirini binni ne ora guireecaʼ de dxiiñaʼ pa gaxha de ra nuucaʼ nápacaʼ ti lugar para gucheechecaʼ diidxaʼ laasicaʼ. Ne laaca nuu tu laa riuulaʼdxiʼ gucheechené binnilidxi diidxaʼ biaʼ ti hora neza ra nabézacaʼ, ante checaʼ guendaridagulisaa ra riuundaʼ libru. Zacá la? riaanacaʼ gaxha de ca binni ni chigánnacaʼ ne qué rizacaʼ stale ne qué runíticaʼ bueltu para chindacaʼ ra nuucabe. Ne cumu zanda gucheechecabe diidxaʼ jma xadxí la? dede zanda gácacabe precursor auxiliar gatigá, o precursor regular. Gápanu ra gucheechenu diidxaʼ laasinu la? zacané nga laanu gunibiaʼnu binni jma, ne zanda gábicabe laanu xi riníʼ íquecabe o xi cayácacabe. Ne pa gánnanu iquiiñenu Biblia para gusiénenu laacabe de xiixa ni riguu xizaa laacabe la? zindá Stiidxaʼ Dios dede ndaaniʼ ladxidóʼcabe.
3. Xi guleendú ti precursora gunábasibe ti lugar ra gucheechebe diidxaʼ laasibe.
3 Ti binnigola ni riganna ca binni ridagulisaa gúdxibe ti precursora guinabaʼ ti lugar para gucheeche diidxaʼ laa si. Precursora que guníʼ sicaríʼ: «Bineʼ ni gúdxibe naa, ne nin qué nindaa binebiaʼyaʼ ca binni ni nabeza raqué ne galán modo gunieniáʼ laacabe diidxaʼ. Laaca yegannaʼ laacabe hora gúdxicabe naa chaa. Xi guleenduáʼ yaʼ. Ante gudiicabe naa ti lugar para gucheecheʼ diidxaʼ la? riaa biaʼ treinta y cinco lugar ra rigannaʼ binni, peru yanna riaa ochenta lugar ne gadxe lugar riguundaniáʼ binni».
4. Ximodo zanda guinábaluʼ ti lugar para gucheecheluʼ diidxaʼ ne ganda gúniluʼ dxiiñaʼ guidúbini.
4 Ximodo zanda guinábanu ni. Pa racaláʼdxiluʼ gápaluʼ ti lugar para chigucheecheluʼ diidxaʼ lii si la? gudxi ni bíʼchinu o bizáʼnanu ni rabi laanu paraa gucheechenu diidxaʼ. Ne zanda gábiluʼ stobi chigucheechené lii diidxaʼ. Bicaa gunáʼ nga ca yoo ra qué nidxélaluʼ binni ne biʼniʼ stipa pur gucheecheluʼ diidxaʼ guidubi ra gucuaaluʼ ca biaʼ tapa beeu. Pa gaca nagana para lii gunduuxeluʼ ni biaʼ tiempu ca la? gudxi binnigola ni rusiidiʼ ra riuundaʼ libru gacané lii o xcaadxi bíʼchinu ne bizáʼnanu. Ora maʼ bilúxeluʼ ni lu tapa beeu ca la? zanda gudxiguétaluʼ ni o zanda guinábaluʼ ni sti biaje. Peru cadi puru racá si nga gucheecheluʼ diidxaʼ, naquiiñeʼ gudiiluʼ ni tiidiʼ si ti tiempu ti ganda guinabaʼ stobi ni. Pa qué gápatu stale ra rucheechetu diidxaʼ ne pur nga qué zanda guinábaluʼ ti lugar la? zanda guiníʼneluʼ binnigola ni rusiidiʼ ra riuundaʼ libru ti guʼyaʼ paraa zanda guicaaluʼ.
5. Xi naquiiñeʼ gúninu ti ganda guinínenu jma binni de Stiidxaʼ Dios.
5 Nabé naroʼbaʼ dxiiñaʼ nga nápanu para gucheechenu diidxaʼ lu «idubi naca guidxilayú» riʼ (Mat. 24:14). Nga runi, naquiiñeʼ quixhe chaahuinu ximodo gúninu dxiiñaʼ riʼ. Pa nápanu ra rucheechenu diidxaʼ ne guiréʼnenu xcaadxi bíʼchinu ne bizáʼnanu la? zacané nga guidxélanu jma binni.