Ora qué guidxélanu binni ra lidxi
1. Xi nabé ridúʼyanu ora maʼ zigucheechenu diidxaʼ de yoo pur yoo.
1 Ndaaniʼ stale guidxi jma nagana raca para guidxélacabe binni ra lidxi. Ca dxi nabáninu riʼ nabé nagana cani ne cucaacani binni guni dxiiñaʼ guidubi dxi para ganda gapa ni guibaniné (2 Tim. 3:1). Nuu xcaadxi binni qué guínnicaʼ ra lídxicaʼ purtiʼ canasicaʼ ndaaniʼ ca tienda ca o nuu tiru zizacaʼ. Xi naquiiñeʼ gúninu ti ganda guinínenu ca binni riʼ de stiidxaʼ Jiobá yaʼ.
2. Xi zanda gúninu ti guibiguétanu chiyúbinu ca binni ni qué nidxélanu.
2 Bicaa pa neza lidxi binni ca. Ni naquiiñeʼ gúninu primé nga gucaʼnu xi yoo qué nidxélanu binni. Naquiiñeʼ gúninu ni pa gatigá rigucheechenu diidxaʼ neza ra lidxi ca binni ca. Ñee rucaaluʼ xi calle nga nuu yoo ra qué nidxélaluʼ binni, pa neza bicheecheluʼ diidxaʼ, laluʼ ne xi dxi qué nidxélaluʼ binni ca la? Bisaana ti lugar lu guiʼchiʼ ca para gucaaluʼ xcaadxi cosa o gucaa sti ni rucheeche diidxaʼ ni chiganna ca yoo ra qué nidxélaluʼ guirutiʼ. Guiluxe si gucheecheluʼ diidxaʼ, bisaanané ca guiʼchiʼ ra cá ca yoo ra qué nidxélaluʼ binni ca binnigola o siervu ministerial ni napa ca tarjeta stiʼ neza ra rucheechetu diidxaʼ. Peru pa guiaanatu lii chiyúbiluʼ ca binni ca la? zanda guiaananeluʼ ca guiʼchiʼ ca. Pa guidxélaluʼ ti binni ni riuulaʼdxiʼ guiziidiʼ jma de lu Biblia la? biquiiñeʼ sti guiʼchiʼ para gucaaluʼ labe.
3. Xi zanda gúninu para guidxélanu ca binni ni qué guinni ra lidxi.
3 Bibiguetaʼ sti hora. Zándaca qué guinni ca binni ca ra lídxicaʼ purtiʼ cayúnicaʼ dxiiñaʼ, peru pa chigánnaluʼ laacabe huaxhinni o sábadu ne domingu la? zándaca guidxélaluʼ laacabe. Ñee zanda guchaaluʼ hora maca nexheʼ chigucheecheluʼ diidxaʼ para ganda guidxélaluʼ binni ra lidxi la? (1 Cor. 10:24.) Pa qué ganda la? zanda gudiiluʼ guiʼchiʼ riʼ sti ni rucheeche diidxaʼ ni zanda cheʼ sti hora. Sti cosa ni zanda gaca nga, gucaaluʼ ra nuu binni ca o guiníʼneluʼ laa pur teléfono. Cani rucheeche diidxaʼ ni huará ne maʼ qué randa rigucheeche diidxaʼ de yoo pur yoo la? ziéchecaʼ pa gábiluʼ laacaʼ gacanecaʼ lii.
4. Xi ejemplu rusihuinni naquiiñepeʼ guibiguétanu ca yoo ra guirutiʼ guinni.
4 Guidúʼyanu ti ejemplu ni culuíʼ pabiáʼ nga riquiiñeʼ guyúbinu modo guinínenu cani qué guinni ra lidxi. Cani rucheeche diidxaʼ bixhidxinacaʼ ra puertaʼ stiʼ ti yoo cada tiidicaʼ neza que, peru guirutiʼ qué riree. Gudiʼdiʼ si chonna iza de rúnicabe zaqué gunda guninécabe gunaa ni nabeza raqué. Gunaa riʼ maca biindanécabe laa ante chibíʼ neza que ne cabézabe tiidiʼ ca Testigu para guʼndané laabe Biblia sti biaje.
5. Pora nga zanda guininu maʼ guninenu guiráʼ binni nabeza neza ra rucheechenu diidxaʼ.
5 Guinínenu guiráʼ binni nabeza neza ra rucheechenu diidxaʼ. Pora nga zanda guininu maʼ guninenu guiráʼ binni nabeza neza ra rucheechenu diidxaʼ yaʼ. Ora maʼ bíninu stipa pur guinínenu neca ti binni ni nabeza ndaaniʼ guiráʼ ca yoo ca. Zanda gusaananu ti tratadu o xiixa revista ni cadi tan nacubi biree ndaaniʼ ca yoo ra qué guinni binni, peru sin guʼyaʼ binni laanu, ne naquiiñeʼ gúninu ni neza ra qué rucheechepenu diidxaʼ. Lu tapa beeu naquiiñeʼ guinínenu guiráʼ ca binni ni nabeza neza ra rucheechenu diidxaʼ. Óraca naquiiñeʼ gábinu ni ruuyaʼ ca lugar ra rucheechenu diidxaʼ ca maʼ bilúxenu ti guni chaahuiʼ ca guiʼchiʼ ni napa.
6. Xiñee naquiiñeʼ guyúbinu modo guinínenu guiráʼ binni nabeza neza ra rucheechenu diidxaʼ de stiidxaʼ Dios.
6 Ni racaláʼdxinu nga pa ñanda guiráʼ binni niziidiʼ ñuni ni na Jiobá ne nilacaʼ (Rom. 10:13, 14). Cani qué ridxélanu laacaʼ ra lídxicaʼ ora maʼ ziuunu de yoo pur yoo laaca naquiiñeʼ guiziidicaʼ. Cásica Pablu, ni racaláʼdxinu nga gusiidiʼ chaahuinu binni ca diidxaʼ nacubi ne galán stiʼ Dios ti ganda guilacaʼ (Hech. 20:24).