Ti dxiiñaʼ ni bibí chigaca: 16 stiʼ octubre dede 12 stiʼ noviembre
1 «¡Mayaca guinitilú religión ni cadi dxandíʼ!» Zacá láʼ tratadu Ca diidxaʼ nacubi stiʼ Reinu núm. 37, ni chiguiaazi lu guidubi naca Guidxilayú sti beeu ca. Dede 1 hasta 15 stiʼ octubre zusaananenu binni revista La Atalaya ne ¡Despertad! Ne dede 16 stiʼ octubre hasta domingu 12 stiʼ noviembre zusaananenu binni puru si tratadu Ca diidxaʼ nacubi stiʼ Reinu núm. 37. Peru ca sábadu ne domingu bibí gúninu dxiiñaʼ riʼ la? zusaananenu binni tratadu riʼ ne revista.
2 Tu guiráʼ ndiʼ zanda guni dxiiñaʼ riʼ. Guiráʼ cani rucheeche diidxaʼ zúnicaʼ dxiiñaʼ riʼ ne stale gana; nuu tu laa zanda gaca precursor auxiliar. Ñee caniisi xiiñiluʼ o tobi de cani cayuundaneluʼ jma lu Stiidxaʼ Dios la? Gucané laabe para guiníʼnebe ca binnigola ne gúʼyabe pa maʼ zanda gácabe ti ni rucheeche diidxaʼ ni caʼruʼ chúʼnisa. Ca binnigola ca naquiiñeʼ guyúbicabe cani maʼ qué rucheeche diidxaʼ ne uguucabe gana laacaʼ para gúnicaʼ dxiiñaʼ riʼ ne zanda guireenecaʼ cani jma maʼ xadxí de cucheeche diidxaʼ.
3 Guiráʼ ca neza binni ridagulisaa zacaacaʼ stale tratadu Ca diidxaʼ nacubi stiʼ Reinu núm. 37 ti ganda guicaa cani rucheeche diidxaʼ ne ca precursor regular biaʼ 40 tratadu. Zanda gudiitu gaayuʼ tratadu riʼ cani rié guendaridagulisaa ne caʼruʼ gácacaʼ ni rucheeche diidxaʼ para gudiicabe ca binnilídxicabe o ca xhamígucabe. Cani rucheeche diidxaʼ ne ca precursor naquiiñeʼ ugábacaʼ panda tratadu gusaananecaʼ binni ne gucaacabeni deche guiʼchiʼ ra gucaacabe pabiáʼ dxiiñaʼ gúnicabe beeu octubre ne noviembre. Secretariu ca zugábabe panda tratadu bisaana guiráʼ ni rucheeche diidxaʼ nuu ra ridagulisaabe ne zuseendabeni Betel ora guiluxe cada beeu. Ca tratadu ni guiaana la? zanda iquiiñetu cani despué ora maʼ zigucheechetu diidxaʼ.
4 Xi zanda guiniʼluʼ. Cadi guiníʼneluʼ binni xadxí, purtiʼ zacá jma stale binni zusaananeluʼ tratadu riʼ. Zanda guiniʼluʼ: «Cayúnidu ti dxiiñaʼ lu guidubi naca Guidxilayú para gacanedu binni ganna ti cosa nabé risaca ora guʼndaʼ guiʼchiʼ riʼ. Chigusigaʼde lii tobi. Rinabaʼ lii gúʼndaluʼ ni». Ora maʼ zitiizitu tratadu riʼ jma galán cadi chinéditu bolsa nin portafolio. Pa guidxeʼluʼ tuuxa binni riuulaʼdxiʼ guiziidiʼ jma la? bicaaca lácabe lu ti guiʼchiʼ.
5 Ximodo zanda gusaananenu tratadu riʼ guiráʼ binni nabeza neza ra rucheechenu diidxaʼ. Cadi quíʼzitu tratadu riʼ lu calle, ni jma jneza gúnitu nga chetu ralidxi ca binni ca ne ra ridoo. Lagucaa lu ti guiʼchiʼ la cani qué guidxélatu ra lidxi ne laguni stipa guibiguétatu sti hora o sti dxi ndaaniʼ semana. Dede lunes 6 stiʼ noviembre maʼ zanda guibiguétatu ralidxi cani qué nidxélatu para chisaanatu tratadu riʼ ralídxicabe. Yanna, pa ra ridagulisaatu xiroobaʼ neza ra rucheechetu diidxaʼ ne qué zudii tiempu laatu chigánnatu guiráʼ binni dxi chigaca dxiiñaʼ riʼ la? ca binnigola zándaca guiniʼcaʼ pa zaa gusaanatu tratadu riʼ dede ora guzulú dxiiñaʼ riʼ neca qué guinni binni ra lidxi.
6 Guizáʼ nagueenda zeeda guidxiña dxi guinitilú Babilonia guidxi roʼ, ne binni naquiiñeʼ guiree de guidxi roʼ ca ante guinitilú ni (Apo. 18:8). Dede ca yanna, gudixhe ique ximodo zanda gacaneluʼ ne stale gana lu dxiiñaʼ ni bibí chigaca lu guidubi naca Guidxilayú para gacané guiráʼ binni ganna mayaca guinitilú religión ni cadi dxandíʼ.