Nápanu doce razón para gucheechenu diidxaʼ

Xiñee rucheechenu diidxaʼ de yoo pur yoo ne rúʼndanenu binni Biblia. Ñee para si gacanenu binni gapa guendanabani ni qué zaluxe la? (Mat. 7:14.) Ndiʼ nga primé razón nápanu casi zeeda lu lista ni chidúʼyanu riʼ, peru cadi laa diʼ ni nga razón jma risaca nápanu para gucheechenu diidxaʼ. Lade doce razón ni cayeeteʼ luni, gunáʼ de laacani rábiluʼ jma risaca.

1. Zulani xquendanabani binni (Juan 17:3).

2. Pur laani cayanna ca binni malu xi chigaca (Eze. 3:18, 19).

3. Pur laani cayaca ni na ti diidxaʼ riguixhená (Mat. 24:14).

4. Rusihuínnini runi Dios ni jneza. Ora gunitilú Jiobá binni malu guirutiʼ zanda guiníʼ laabe nápabe donda purtiʼ qué nudiibe lugar ñaca arrepentircaʼ (Hech. 17:30, 31; 1 Tim. 2:3, 4).

5. Racaneni laanu gúninu dxiiñaʼ bisaanané Dios laanu ne zacá gacanenu ca binni ni bixuíʼ né rini stiʼ Cristu chuʼcaʼ gaxha de Dios (Rom. 1:14, 15).

6. Racaneni cadi gápanu donda pa gati binni malu (Hech. 20:26, 27).

7. Caquiiñeʼ gúninu dxiiñaʼ riʼ ti ganda guilanu (Eze. 3:19; Rom. 10:9, 10).

8. Racaneni laanu gusihuínninu nadxiinu binni (Mat. 22:39).

9. Racaneni laanu gusihuínninu ruzúʼbanu stiidxaʼ Jiobá ne stiidxaʼ Xiiñiʼ (Mat. 28:19, 20).

10. Laani nga sti modo rusihuínninu cayuni adorarnu Dios (Heb. 13:15).

11. Racaneni laanu gusihuínninu nadxiinu Dios (1 Juan 5:3).

12. Racaneni gusisaca binni lá Jiobá (Isa. 43:10-12; Mat. 6:9).

Peru cadi nga si nga ca razón ni nápanu para gucheechenu diidxaʼ. Laaca ruquidxi ni fe stinu ne racanenu Dios ra gúninu dxiiñaʼ ca (1 Cor. 3:9). Peru razón jma risaca nápanu nga ni cá lu númeru 12 ca. Pa gucaadiaga binni laanu o pa coʼ, peru ora rucheechenu diidxaʼ racanenu guisaca lá Dios. Ne laaca riquiiñeni para ganda guicabi Jiobá cani cucaalú ne cuxidxi laa (Pro. 27:11). Nga runi nápanu stale razón para cadi guiaanadxinu de güinu stiidxaʼ Dios ne gusíʼdinu binni ca diidxaʼ nacubi ne galán ca (Hech. 5:42).