Gusisácanu ndaayaʼ ni nápanu de gúninu xhiiñaʼ Jiobá
1. Xi riníʼ stale binni de dxiiñaʼ ni rúninu ora rucheechenu diidxaʼ.
1 Ndaaniʼ guidxilayú ni nuu lu naʼ Binidxabaʼ riʼ, stale binni riníʼ ique nahuati cani rucheeche diidxaʼ ne qué riuucaʼ razón (1 Cor. 1:18-21). Pa qué chuʼnu cuidadu né cani riníʼ binni la? zándaca cueecani gana laanu ne maʼ qué ziuʼnu nayecheʼ ora gúninu xhiiñaʼ Dios (Pro. 24:10; Isa. 5:20). Yanna, xi razón nápanu para gusihuínninu risaca para laanu gácanu testigu stiʼ Jiobá yaʼ (Isa. 43:10).
2. Xiñee zanda guininu Dios nga bidii laanu dxiiñaʼ de gucheechenu diidxaʼ.
2 Ti dxiiñaʼ ni bidii Dios laanu. Apóstol Pablu bisiene xhiiñaʼ Dios nga rúninu ora rucheechenu diidxaʼ (Rom. 15:15, 16). Ra gúninu dxiiñaʼ riʼ cayacanenu Dios ne racanenu guisaca labe (1 Cor. 3:9; 1 Ped. 1:15). Guendarucheeche diidxaʼ ca ruuyaʼ Jiobá ni casi ti dxiiñaʼ ni rusisaca laa, nga runi naquiiñeʼ gúninu ni para gusihuínninu cayuni adorarnu Dios (Heb. 13:15).
3. Xiñee gástiruʼ sti dxiiñaʼ jma risaca que gucheechenu diidxaʼ.
3 Ti ndaayaʼ naroʼbaʼ nga gucheechenu diidxaʼ, ne huaxiéʼ si tu laa zanda guni dxiiñaʼ sicarú riʼ. Ca ángel ca guizáʼ ñuuláʼdxicaʼ ñúnicaʼ dxiiñaʼ riʼ (1 Ped. 1:12). Laanu nánnanu ñúnicabe ni jnézapeʼ. Ne neca zeeda gácanu casi «guisu de yu», peru bidii Jiobá dxiiñaʼ risaca riʼ laanu, ne gástiruʼ sti dxiiñaʼ casi laani (2 Cor. 4:7).
4. Ximodo zanda gusihuínninu dxandíʼ risaca para laanu gucheechenu diidxaʼ.
4 Ni jma caquiiñeʼ gaca. Pa guiníʼ íquenu ti ndaayaʼ nga gucheechenu diidxaʼ la? zadúʼyanu ni casi ti dxiiñaʼ «ni dxandí risaca» lu xquendanabáninu ne zaguixhe chaahuinu tiempu stinu guiráʼ semana para gúninu ni (Fili. 1:10). Guiníʼ íquenu nácanu músicu stiʼ ti orquesta ni runibiáʼ binni ndaaniʼ stale guidxi roʼ. Cumu ti dxiiñaʼ risaca ni la? ziuʼnu listu cada biaje gaca caber orquesta ca guxhidxi ne guiráʼ biaje zúninu stipa para gúninu ni jma galán. Ngaca nga ni naquiiñeʼ gúninu cada biaje chigucheechenu diidxaʼ, naquiiñeʼ chuʼnu listu ti ganda iquiiñenu «stiidxa [Dios] jneza» ne gúninu stipa pur gusíʼdinu jneza (2 Tim. 2:15; 4:2).
5. Tuu nga cani rusisaca dxiiñaʼ ni rúninu.
5 Cadi guireʼnu gana pur cani riníʼ binni. Nuuruʼ stale binni neza ra rucheechenu diidxaʼ ni riuulaʼdxiʼ chigánnanu laa. Peru ni jma racaláʼdxinu nga gusiéchenu Jiobá ne cadi binni. Zanda guni crenu rusisaca Jiobá stipa cayúninu pur gúninu xhiiñaʼ (Isa. 52:7).