Ti dxiiñaʼ izáʼ sicarú ni nápanu nga ucheechenu stiidxaʼ Reinu
1 Iráʼ binni ricaa iráʼ dxi cani rudii Jiobá laanu para ibáninenu (Mat. 5:45). Peru huaxiéʼ si nga tu napa ti dxiiñaʼ izáʼ sicarú de ucheeche Stiidxaʼ Dios para udii xquíxepeʼ laabe (Mat. 24:14). Ñee rusisácanu dxiiñaʼ sicarú riʼ la?
2 Ucheechenu stiidxaʼ Reinu la? rusisácani Dios, racaneni binni ganna xii nga cani galán chigúnibe ne rudiini endariuudxi cani nuu xizaa pur ca dxi izáʼ nagana riʼ (Heb. 13:15). Ne binni si ni ucaadiaga ca diidxaʼ riʼ nga zanda ibánicaʼ sin qué chuʼ dxi gáticaʼ (Juan 17:3). Xi sti dxiiñaʼ ni nuu lu guidxilayú riʼ zudii laanu stale cosa galán yaʼ. Apóstol Pablu izáʼ bisisácabe dxiiñaʼ gúpabe de ucheechebe diidxaʼ ne bisihuínnibe ni pur modo bíʼnibe ni. Biiyabe ni casi ti cosa izáʼ risaca (Hech. 20:20, 21, 24; 2 Cor. 4:1, 7).
3 Usisácanu dxiiñaʼ sicarú ni nápanu. Ti modo zanda usihuínninu rudiʼnu xquíxepeʼ Dios pur cudiibe lugar ucheechenu diidxaʼ nga, guʼyaʼ chaahuinu ximodo cayúninu ni. Ñee ribeenu tiempu para gúʼyanu ximodo inínenu binni ti ganda chindá ca diidxaʼ ca ndaaniʼ ladxidoʼcaʼ la? Nuuruʼ xiixa ni gúninu para gánnanu iquiiñenu Biblia jneza ne acanenu binni guiene ni la? Rininenu iráʼ binni ni nabeza ra rudiicabe laanu para ucheechenu diidxaʼ la? Nánnanu ximodo uzulunu gúʼndanenu binni Biblia la? Cásica ca xpinni Cristu ni guyuu dxiqué ne cani nuu yanna, laanu laaca riénenu xiñee rúninu dxiiñaʼ riʼ ne nga rucaa laanu usisácanu ni ne gúninu ni ne stale gana (Mat. 25:14-23).
4 Izáʼ riéchenu nga gánnanu rusisaca Jiobá stipa rúninu pur ucheechenu diidxaʼ neca cadiidinu ra nagana pur maʼ huaniisinu, huaranu o pur xiixa ni ácanu. Stiidxaʼ Dios cayabi laanu pabiáʼ rusisaca Jiobá ca stipa runi binni pur guni ni nabe, neca xcaadxi binni cadi guʼyaʼ ni zacá (Luc. 21:1-4).
5 Ucheechenu stiidxaʼ Reinu la? rusiécheni laanu stálepeʼ. Ti bizánanu ni napa 92 iza uníʼ sicaríʼ: «Izáʼ sicarupeʼ nga maʼ ziniáʼ ochenta iza de cayuneʼ ni na Dios ne stale gana. ¡Qué liica raca arrepentir! Pa ñaleʼ sti biaje la? laaca dxiiñaʼ riʼ ñuneʼ, purtiʼ endarannaxhii ni qué rusaana stiʼ Dios jma sicarú ni que endanabani» (Sal. 63:3). Laaca naquiiñeʼ usihuínninu rusisácanu dxiiñaʼ sicarú ni bidii Dios laanu de ucheechenu stiidxaʼ Reinu.