Gusisácanu dxiiñaʼ ni rúninu ndaaniʼ xquidxi Jiobá
1 Biaʼ dxi huabani binni lu guidxilayú riʼ, gadxé gadxé dxiiñaʼ huadii Jiobá ca xpinni ti gusisácacaʼ laabe. Huadiibe laacaʼ ca dxiiñaʼ riʼ sin gúʼyabe panda iza nápacaʼ, pa hombre o gunaa laacaʼ, pa nápacaʼ bueltu o coʼ (Luc. 1:41, 42; Hech. 7:46; Fili. 1:29). Xi dxiiñaʼ rudii Jiobá laanu ndaaniʼ xquidxi yanna riʼ yaʼ.
2 Caadxi guenda. Guidúʼyanu caadxi guenda ni rudii Jiobá laanu yanna. Primé la? laasinu nga rusiidibe (Mat. 13:11, 15). Ne laaca rudiibe lugar gusisácanu laabe ora guicábinu lu ca guendaridagulisaa ca (Sal. 35:18). Cumu maʼ nánnanu nga la? guiráʼ biaje guicábinu naquiiñeʼ gusihuínninu risaca cani para laanu, ne zaqueca ora gúninu xcaadxi dxiiñaʼ ra ridagulisaanu. Nga runi, naquiiñeʼ gúninu ni de guidubi ladxidoʼno ne stale gana. Ñee racanenu ora guiá ne ora gaca chaahuiʼ Yoo stiʼ Reinu la? Nga laaca ti dxiiñaʼ ni cudii Jiobá laanu.
3 Nécapeʼ stale binni qué ganna pa rucaadiaga Dios oración stiʼ, laanu nánnanu nuu tobi ni rucaa diaga ca oración stinu ne laa nga ni jma risaca ni nuu lu guidubi naca guibáʼ ne Guidxilayú (Pro. 15:29). Jiobá peʼ nga rucaadiaga oración ni runi ca xpinni (1 Ped. 3:12). Ne qué riguíxhebe panda biaje guinínenu laabe. Dxandipeʼ ti ndaayaʼ naroʼbaʼ nga guinínenu Dios ora tiica si (Efe. 6:18).
4 Racanenu gaca xhiiñaʼ Dios. Stobi de ca guenda ni jma risaca ni bidii Dios laanu nga gacanenu guireeche ca diidxaʼ nacubi ne galán stiʼ Reinu (1 Cor. 3:9). Dxiiñaʼ riʼ rudiini laanu stipa ne riuʼnu nayecheʼ ora rúninu ni (Juan 4:34). Neca ñanda niquiiñeʼ Jiobá xcaadxi modo para ñaca xhiiñaʼ, peru cumu nadxiibe laanu la? nga runi cudiibe gúninu ni (Luc. 19:39, 40). Ne cadi guiráʼ diʼ binni rudiibe guni dxiiñaʼ ca, purtiʼ para gucheeche binni diidxaʼ naquiiñeʼ gusihuinni nabani casi modo nabe (Isa. 52:11). Ñee rusihuínninu risaca dxiiñaʼ riʼ para laanu ora gúninu ni guiráʼ semana la?
5 Ca guenda ni rudii Jiobá laanu ca ruchá tipa cani ladxidoʼno (Pro. 10:22). ¡Qué chuʼ dxi guiníʼ íquenu qué risaca cani! Naquiiñeʼ gusihuínninu rusisácanu cani. Ora gúninu zacá zusihuínninu rudiʼnu xquíxepeʼ Jiobá, Dios ni rudii «irá ni nachaʼhui ne irá ni dxandí» (Sant. 1:17).