Ñuuláʼdxiluʼ ñúniluʼ dxiiñaʼ gúpaluʼ dxiqué sti biaje la?
ÑEE gúpaluʼ xiixa dxiiñaʼ ndaaniʼ xquidxi Dios dxiqué, peru pur xiixa ni gúcaluʼ maʼ qué rúniluʼ ni la? Zándaca gúcaluʼ binnigola o siervu ministerial, o bíʼniluʼ jma lu xhiiñaʼ Dios casi precursor, ne guyuuláʼdxiluʼ gúniluʼ ni ne bisiécheni lii.
Peru zándaca bisaanuʼ ni purtiʼ maʼ nagólaluʼ, guca huaraluʼ o pur gúpaluʼ tuuxa binnilídxiluʼ. Pa zacá bizaacaluʼ cadi guiníʼ íqueluʼ pur nga maʼ qué zanda gúniluʼ xiixa (1 Tim. 5:8). Lu primé siglu que, guca Felipe misioneru ti tiempu, peru despué yendézabe Cesarea, ne raqué gúpabe binnilídxibe (Hech. 21:8, 9). Dxi maʼ nagola David, rey stiʼ Israel que, guniʼbe xi guiráʼ naquiiñeʼ gaca para ganda gaca Salomón xiiñibe rey (1 Rey. 1:1, 32-35). Neca bisaana Felipe ne David dxiiñaʼ gúpacaʼ la? gunnaxhiiruʼ Jiobá laacabe. Ne dede yanna, guiranu runi respetarnu guiropaʼ xpinni Dios ca.
Yanna, zándaca gabi ca binnigola ni nuu ra ridagulisaaluʼ lii maʼ qué zanda diʼ gúniluʼ xiixa dxiiñaʼ, purtiʼ maʼ cadi cayúniluʼ xiixa cosa jneza o pur xiixa guendanagana nápaluʼ ne ca binnilídxiluʼ (1 Tim. 3:2, 4, 10, 12). Zándaca qué ñuuláʼdxiluʼ ni gudxi ca binnigola lii ne dede yanna riníʼ íqueluʼ cadi jneza ni bíʼnicabe.
Zanda gúniluʼ dxiiñaʼ ni gúpaluʼ dxiqué sti biaje
Ñee zanda guni tuuxa ca dxiiñaʼ ni gupa ndaaniʼ xquidxi Dios dxiqué sti biaje la? Stale biaje zanda. Peru bietenalaʼdxiʼ naquiiñeʼ gúniluʼ stipaʼ para gápaluʼ ni sti biaje (1 Tim. 3:1). Xi naquiiñeʼ gucaa lii gúniluʼ ni yaʼ. Laaca ni bicaa lii gudiiluʼ lii Dios, bíʼniluʼ ni purtiʼ nadxiiluʼ laabe ne nadxiiluʼ ca xpínnibe. Pa nga gucaa lii gúniluʼ dxiiñaʼ ni gúpaluʼ que sti biaje la? naquiiñeʼ gánnaluʼ zaquiiñeruʼ Jiobá lii, purtiʼ maʼ biziidiluʼ dxi gúpaluʼ dxiiñaʼ ca ne dede yanna caziidiluʼ jma neca maʼ qué gápaluʼ ni.
Bietenalaʼdxiʼ ni gudxi Jiobá ca israelita despué de maʼ qué ñuucaʼ galán ne laabe: «Naa nga Jiobá; ne qué huachaadiáʼ modo naa. Ne laatu nga xiiñiʼ Jacob; dede yanna nuurutu» (Mal. 3:6). Qué nusaana Jiobá de ñannaxhii ca israelita que ne biquiiñerube laacaʼ. Ne laaca nadxii Jiobá lii. Yanna, xiruʼ zanda gúniluʼ ndaaniʼ xquidxi Dios yaʼ. Cadi guiaandaʼ lii jma risaca nga chuʼnu galán ne Jiobá para gúninu xhiiñabe ne cadi pur ca cosa ni nánnanu gúninu. Nga runi, biquiiñeʼ tiempu stiluʼ para gúniluʼ ca cosa ni zacané lii chuʼluʼ jma gaxha de Dios purtiʼ maʼ qué gápaluʼ stale dxiiñaʼ lade ca binni ridagulisaa.
Para ganda iguidxi fe stiluʼ la? biʼniʼ «stipa pur guidxéla[luʼ] Jiobá ne stipa stibe» (Sal. 105:4; 1 Cor. 16:13). Zanda gusihuínniluʼ cayúniluʼ zacá ora guni orarluʼ Dios de guidubi ladxidoʼloʼ. Ora gábiluʼ Jiobá ni cayácaluʼ la? gudxi laabe ximodo cayuni sentirluʼ ne gunabaʼ laabe gudiibe lii espíritu santu stibe. Nga zacané lii chuʼluʼ jma gaxha de Jiobá ne chuʼluʼ jma naguidxi ndaaniʼ xquídxibe (Sal. 62:8; Fili. 4:6, 13). Sti modo zanda iguidxi fe stiluʼ nga gúʼndaluʼ Stiidxaʼ Dios. Yanna, cumu maʼ qué gápaluʼ stale dxiiñaʼ lade ca binni ridagulisaa, xiñee qué iquiiñeluʼ tiempu stiluʼ para gúʼndaluʼ jma de lu stiidxabe stúbiluʼ ne zaqueca gúʼndaneluʼ binnilídxiluʼ yaʼ. Pa huayaca nagana para lii gápaluʼ ti hora para gúʼniluʼ cani la? yanna nga jma jneza quixhe chaahuiluʼ tiempu stiluʼ para gúniluʼ cani.
Dede yanna caquiiñeʼ Jiobá lii para guiniʼluʼ de laa nezalú binni, purtiʼ nácaluʼ Testigu stibe (Isa. 43:10-12). Nápanu ti ndaayaʼ ni nabé risaca purtiʼ «tobi si runi né [n]u Dios dxiiñaʼ» (1 Cor. 3:9). Ziuʼnu jma gaxha de Dios pa qué gusaananu de gucheechenu diidxaʼ ne zacanenu cani guiréʼnenu guni zacaca.
Ni zacané lii ora chuʼluʼ triste
Zándaca pa pur maʼ cadi cayúniluʼ xiixa dxiiñaʼ ni gúpaluʼ ndaaniʼ xquidxi Dios maʼ guituíluluʼ o chuʼluʼ triste. O nabé ruyúbiluʼ ximodo gusihuínniluʼ biaʼsi ni cayúniluʼ. Zándaca laaca guidxiichineluʼ ca binnigola purtiʼ despué de gúdxiluʼ laacabe xi bizaacaluʼ biiyacabe maʼ qué zándaruʼ gúniluʼ dxiiñaʼ ni gúpaluʼ que. Pa zacá nuuluʼ la? qué zanda diʼ guiniisiluʼ lu stiidxaʼ Dios ne zaca nagana para lii gánnaluʼ xii nga ni jma jneza gúniluʼ. Guidúʼyanu ximodo zanda gacané ni bizaaca Job, Manasés ne José laanu.
Job guníʼ pur xcaadxi binni nezalú Jiobá ne laaca gúcabe binnigola ne juez, casi runi ca binni xquídxibe (Job 1:5; 29:7-17, 21-25). Peru dxi jma galán nabánibe, binítibe bidxichi stibe, guca huarabe dede guti ca xiiñibe; ne guyuu binni ni guníʼ zándaca qué rúnibe ni jneza. Nabé triste guyuu Job dxi guníʼ ca diidxaʼ riʼ: «Yanna maʼ ruxídxicabe naa, cani jma nahuiiniʼ para naa» (Job 30:1).
Job guníʼ qué liica gapa donda ne biyúbibe ximodo gusihuínnibe nezalú Dios rúnibe ni jneza (Job 13:15). Peru laabe gulézabe guni chaahuiʼ Dios guendanagana cadíʼdibe que, ne galán ni guleendube pur bíʼnibe zacá. Bidiibe cuenta caquiiñeʼ gulídxecabe laabe, jmaruʼ si pur ni guniʼbe ora gudíʼdibe lu ca guendanagana que (Job 40:6-8; 42:3, 6). Ne ora biluxe ca guendanagana stibe guluu Jiobá ndaayaʼ laabe purtiʼ qué nudxiibabe laca laabe (Job 42:10-13).
Zándaca maʼ cadi cayúniluʼ xiixa dxiiñaʼ ndaaniʼ xquidxi Dios pur xiixa cosa malu ni bíʼniluʼ, ne yanna riníʼ íqueluʼ pa ziuu dxi gutiidilaʼdxiʼ Jiobá ne ca xpinni Cristu stóndaluʼ ne pa zusiaandacabe ni. Bietenalaʼdxiʼ ni bizaaca Manasés, ti rey stiʼ Judá. Laabe «bíʼnibe stale cosa malu nezalú Jiobá, para guchiichibe laa» (2 Rey. 21:6). Peru Biblia na dxi gútibe biiyaʼ Dios laabe casi ti rey ni qué nusaana de ñuni ni nabe. Xiñee yaʼ.
Purtiʼ bidii Manasés lugar uguu jnézabe laa. Primé que la? qué ninabe nucaadiágabe cani guníʼ Jiobá, ne despué biseendaʼ Jiobá ca asiriu que ucaalucaʼ laabe, ne bindiibicaʼ laabe ne yenecaʼ laabe casi esclavu ndaaniʼ guidxi Babilonia. Dxi maʼ nuu Manasés raqué «bicuudxibe lú Jiobá Dios stibe, ne maʼ qué liica nudxiibabe laca laabe nezalú Dios stiʼ ca bixhozególabe. Ne qué nusaanabe de ñuni orarbe laa». Rey ca dxandíʼ guca arrepentir ne bisihuínnibe ni pur cani bíʼnibe, ngue runi bitiidilaʼdxiʼ Dios stóndabe (2 Cró. 33:12, 13).
Ora tuuxa xpinni Cristu maʼ qué gapa xiixa dxiiñaʼ ndaaniʼ xquidxi Dios la? nuu si biaje nga ribiguetaʼ guiráʼ ca dxiiñaʼ ca lu nácabe. Peru jma nga ribiguetaʼ cani lu nácabe chaahuidugá. Pa guicaaluʼ ca dxiiñaʼ ni gudiicabe lii ne gúniluʼ ni jneza la? zudiicabe lii jma dxiiñaʼ. Peru zadxaagaluluʼ guendanagana para gápaluʼ ca dxiiñaʼ. Zabeenduluʼ ni galán pa gúniluʼ stipa ne pa qué guireeluʼ gana.
Yanna, guidúʼyanu ejemplu stiʼ José, xiiñiʼ Jacob. Dxi nápabe 17 iza bitoo ca bíʼchibe laabe casi esclavu (Gén. 37:2, 26-28). Laabe qué niníʼ íquebe pa ñuni ca bíʼchibe laabe zacá. Peru neca zaqué bidxiilube guendanagana que ne cumu guluu Jiobá ndaayaʼ laabe la? «lu nabe bisaana xpixuaanabe guiráʼ ni nuu ralidxi» (Gén. 39:2). Despué biseguyoocabe laabe, peru laaca qué nusaanabe de ñúnibe ni na Jiobá ne guiráʼ ora guluu ndaayaʼ laabe. De raqué gúpabe xcaadxi dxiiñaʼ ndaaniʼ lidxi guiibaʼ ra guyuube que (Gén. 39:21-23).
José qué ñanna diʼ xiñee gupa guendanagana. Laabe jneza bíʼnibe ca dxiiñaʼ ni gúpabe. Peru pur ni bíʼnibe que biquiiñeʼ Jiobá laabe para gunda bilá ca familia ra chigale ni za de gunaa ni guníʼ Dios gueeda que (Gén. 3:15; 45:5-8). Nécapeʼ qué zaquiiñeʼ diʼ Jiobáʼ laanu casi biquiiñebe José que la? ejemplu stibe ca rusiidiʼ ni laanu Jiobá nga rudii dxiiñaʼ ca xpinni. Nga runi, naquiiñeʼ gúninu casi biʼniʼ José ne gudiʼnu lugar iquiiñeʼ Dios laanu ora tiica si.
Biziidiʼ de ca guendanagana guidxaagaluluʼ
Job, Manasés ne José bidxaagalucaʼ guendanagana. Peru guiónnacabe bidxiilúcabe ca guendanagana ni bidii Jiobá lugar guizaacacabe ne biziidicabe stale cosa de laacani. Yanna lii yaʼ, xi zanda guiziidiluʼ de ca guendanagana ni guidxaagaluluʼ yaʼ.
Biʼniʼ stipa pur gúʼyaluʼ xi cusiidiʼ Jiobá lii. Pur ca guendanagana ni bidxaagalú Job jma guníʼ ique laca laa ne maʼ qué ñuuyabe gunáʼ nga ni jma risaca. Peru bichaabe modo guníʼ íquebe purtiʼ guluu jneza Jiobá laabe ne diidxaʼ nadóʼ, ne sicaríʼ guniʼbe: «Guniéʼ, peru qué ñénediaʼ» (Job 42:3). Pa nuuluʼ triste purtiʼ maʼ qué gápaluʼ xiixa dxiiñaʼ ndaaniʼ xquidxi Dios la? cadi guicá íqueluʼ lii jma que biaʼ naquiiñeʼ, ne guníʼ ique jneza (Rom. 12:3). Neca qué guiéneluʼ xiñee cazaacaluʼ xiixa, zándaca nuu Jiobá gacané lii guʼnuʼ ca cosa ca jma jneza.
Bidii lugar uguu jneza Jiobá lii. Zándaca guníʼ ique Manasés nabé naná modo guluu jneza Jiobá laa. Neca guníʼ íquebe zacá la? bidiibe lugar uguu jneza Dios laabe, guca arrepentirbe ne bisaanabe ca cosa malu bíʼnibe. Neca guiníʼ íqueluʼ cadi galán modo guluu jnézacabe lii la? cadi gudxiibaluʼ laca lii nezalú Jiobá ne laabe zusisácabe lii (1 Ped. 5:6; Sant. 4:10).
Cadi guireeluʼ gana ne bichaa modo riníʼ íqueluʼ. Pur guiráʼ ni bizaaca José ñándaca ñaca nanaláʼdxibe ca bíʼchibe ne nuquíxebe laacaʼ ni bíʼnicaʼ laabe. Peru lugar de nga bíʼnibe ni jneza ne bilaseláʼdxibe ca bíʼchibe (Gén. 50:15-21). Pa cadxiichiluʼ pur xiixa ni bíʼnicabe lii la? cadi guireeluʼ gana, bichaa modo riníʼ íqueluʼ ne bidii lugar gusiidiʼ Jiobá lii.
Ñee gúpaluʼ xiixa dxiiñaʼ lade ca binni ridagulisaa la? Pa zacá ni, bidii lugar gudii Jiobá lii xcaadxi dxiiñaʼ. Biʼniʼ stipa pur chuʼluʼ jma gaxha de Jiobá ne bichaa cani runi sentirluʼ sin guireeluʼ gana ne cadi gudxiibaluʼ laca lii. Gucuaa intiica dxiiñaʼ gudiicabe lii. Ne gunna dxichi «Jiobá qué rucueeza ni galán para cani canazá sin donda» (Sal. 84:11).
[Ni caníʼ yaza 30]
Biʼniʼ orar Dios de guidubi ladxidoʼloʼ ti iguidxi fe stiluʼ
[Dibuju/foto ni zeeda lu yaza 31]
Ziuʼnu jma gaxha de Dios pa qué gusaananu de gucheechenu diidxaʼ
[Dibuju/foto ni zeeda lu yaza 32]
Bidii lugar gudii Jiobá lii xcaadxi dxiiñaʼ