Jiobá bidii laanu ti dxiiñaʼ nabé risaca

¹ Nabé guyuulaʼdxiʼ apóstol Pablu dxiiñaʼ bidii Dios laa, dede biiyabe ni casi ti dxiiñaʼ ni jma risaca (2 Cor. 4:7). Ora bíʼnibe dxiiñaʼ riʼ, biʼniʼ huantarbe stale guendananá ne dede guzanándacabe laabe. Neca zaqué qué nusaanabe de nucheechebe diidxaʼ ne bíʼnibe ni ra tiica guyuube. Ne laaca guyuu xquendanabani Pablu lu guendanagana ora bicheechebe diidxaʼ ndaaniʼ stale guidxi ne ora gudíʼdibe nisadóʼ para yegúnibe dxiiñaʼ ca. Ximodo zanda gúninu casi biʼniʼ Pablu ne gusihuínninu rusisácanu dxiiñaʼ stinu de gucheechenu diidxaʼ yaʼ (Rom. 11:13). Xi rusihuinni gástiruʼ sti dxiiñaʼ jma risaca que laani yaʼ.

² Ti dxiiñaʼ ni jma risaca. Guiráʼ cani rusisaca binni guidxilayú redané cani stale guendanagana, ne qué randa diʼ rapa binni guiráʼ ni racalaʼdxiʼ ne qué rindaa diʼ cani. Peru dxiiñaʼ ni nápanu riʼ, zulá ni laanu ne zulá ni cani rusíʼdinu (1 Tim. 4:16). Dxiiñaʼ riʼ racaneni ca binni ni dxandíʼ riuulaʼdxiʼ guiziidiʼ de Jiobá gusaanacaʼ guiráʼ ni bíʼnicaʼ dxiqué ne guicaacaʼ guendanabani ni qué zaluxe (Rom. 10:13-15). Ne ora gusisácanu dxiiñaʼ riʼ ribáninu jma nayecheʼ ne nánnanu qué zandaa zacaanu stale ndaayaʼ (1 Cor. 15:58).

³ Gusihuínninu rusisácanu dxiiñaʼ bidii Dios laanu. Rusihuínninu rusisácanu xiixa ora gúninu intiica si pur laani. ¡Pabiáʼ galán nga iquiiñenu tiempu ne stipa stinu para gusisácanu Jiobá! (Efe. 5:16, 17.) Pur modo riquiiñenu tiempu stinu zusihuínninu pa rusisácanu jma guizíʼdinu de Jiobá o ca bidxichi stinu. Cumu nápatu xiixa ni nabé risaca ni caquiiñeʼ ganna binni la? zucheechenu diidxaʼ ne stale gana ne zuyúbinu modo guinínenu laacabe ora tiica si.

⁴ Ora nabé rusisaca binni xiixa riguuni ti lugar ra ganda guʼyaʼ xcaadxi binni ni ne qué rucaachiʼ ni. Pa guidúʼyanu dxiiñaʼ ni bidii Dios laanu riʼ casi ti cosa guizáʼ risaca la? zusihuínninu ni lu xquendanabáninu (Mat. 5:14-16). Cumu nuunu nayecheʼ pur dxiiñaʼ ni nápanu riʼ la? zúninu casi biʼniʼ apóstol Pablu ne zuyúbinu guinínenu binni ora tiica si purtiʼ zacá zusihuínninu guizáʼ rusisácanu dxiiñaʼ riʼ.