Xii nga ni rusiecheʼ lii
1. Xi naquiiñeʼ gusiecheʼ laanu cada guiluxe beeu.
1 Xi rusiecheʼ lii ora rudiiluʼ guiʼchiʼ ra rucaaluʼ pabiáʼ dxiiñaʼ rúniluʼ cada beeu (Gál. 6:4). Pa nácanu precursor especial ni rucheeche diidxaʼ ti gayuaa treinta hora o pa nácanu tobi de cani rucheeche diidxaʼ biaʼ quince minutu la? guiranu naquiiñeʼ guiéchenu purtiʼ cayúninu xhiiñaʼ Jiobá de guidubi ladxidoʼno (Sal. 100:2).
2. Xi razón nápanu para gudiʼnu Jiobá ni jma risaca para laanu.
2 Jiobá nga naquiiñeʼ gudiʼnu ni jma risaca nápanu, purtiʼ laabe nga bizaʼbe guibáʼ ne Guidxilayú (Mal. 1:6). Cumu nadxiinu Jiobá la? bidii stiidxanu laabe gúninu ni nabe lu guidubi naca xquendanabáninu. Nga runi, nabé nayecheʼ riuʼnu ora guiluxe ti dxi o ti beeu, purtiʼ maʼ biquiiñenu cani jma galán nápanu lu xhiiñaʼ Jiobá, casi tiempu stinu, cani nánnanu gúninu ne stipa stinu (Pro. 3:9). Peru pa xquendabiaaninu gabi laanu zanda gudiʼnu Jiobá jma la? naquiiñeʼ gúninu ni cayábini laanu ne guyúbinu ximodo zanda gúninu ni jma jneza (Rom. 2:15).
3. Xiñee cadi jneza guchaaganu ni rúninu né ni runi sti binni.
3 Cadi guchaaganu ni rúninu né ni runi sti binni. Cadi jneza diʼ nga guchaaganu ni rúninu né ni runi sti binni o guchaaganu cani rúninu yanna né cani bíninu dxi gúpanu jma stipa. Modo nabani binni málasi ruchaa, ne gadxé gadxé nga ni nanna cada tobi de laanu guni. Stale biaje, ora guchaaganu ni rúninu né ni runi sti binni rucaa nga laanu gucaa íquenu tiidinu lú o guiníʼ íquenu qué iquiiñenu (Gál. 5:26; 6:4). Lugar de nuchaaga Jesús ni runi tuuxa né ni runi sti binni la? laabe gúdxibe laacaʼ jneza nga biaʼ gunda bíʼnicaʼ (Mar. 14:6-9).
4. Xi rizíʼdinu de ejemplu ra bizeeteʼ Jesús de ca talentu que.
4 Lu ejemplu ra bizeeteʼ Jesús de ca talentu que guniʼbe gucuaa cada tobi de ca esclavu que dxiiñaʼ biaʼ laa (Mat. 25:15). Ora bibiguetaʼ xpixuaanacabe para guʼyaʼ dxiiñaʼ bíʼnicabe, guníʼ jneza guca cani purtiʼ bíʼnicabe ni né gana ne biaʼ gunda. De raqué gúdxibe cada tobi de laacaʼ sicaríʼ: «Biuu, guieche nia lii» (Mat. 25:21, 23). Nga runi, pa gucheechenu diidxaʼ né gana la? laaca zusiéchenu ladxidóʼ Dios ne ziuʼnu nayecheʼ.