Carta stiʼ Grupu ni Zaniruʼ

Bíchidu ne bizánadu ni nadxiidu:

Jnézapeʼ modo rusihuinni Jiobá, Bixhózenu ni nuu guibáʼ, nadxii binni. Nga runi Biblia na: «De Dios nga reeda enda ranaxhii» (1 Juan 4:8). Neca nácabe Dios ni jma napa poder la? Biblia cadi na diʼ: «Dios nga poder» o «Dios nga stipa». Ora runi mandarbe binni, rusihuínnibe dxandíʼ nadxiibe laacaʼ, ne nga nga ni jma rucaa laanu guidxíñanu laabe.

Galán nga qué rucaa Jiobá ca xpinni guni ni na, casi runi ti xaíque ni racalaʼdxiʼ guni binni ni na. Laabe racaláʼdxibe gúninu ni nabe purtiʼ nadxiinu laabe de guidubi ladxidoʼno. Zacá zusihuínninu racaláʼdxinu guni mandarbe laanu, purtiʼ nanna dxíchinu jnézapeʼ modo rúnibe ni ne dxandíʼ nadxiibe binni. Ne zacá rihuínnini dede dxi bizulú guyuu binni ndaaniʼ Guidxilayú.

Qué nucaa diʼ Jiobá Adán ne Eva gúnicaʼ ni nabe; sínuque bidiibe lugar laacaʼ quixhe íquecaʼ xi gúnicaʼ. Pa ñaca dxandíʼ ñannaxhiicabe Jiobá ne nudiicabe xquíxepeʼ laabe pur guiráʼ ni bidiibe laacaʼ, qué nudiicaʼ lugar nucaa Binidxabaʼ laacaʼ nucheenecaʼ Jiobá.

Gudiʼdiʼ si iza, sicaríʼ guníʼ Moisés lu ti libana ni bidii nezalú ca israelita dxi maʼ chigati: «Biiyaʼ, caguixheʼ nezaluluʼ yannadxí guendanabani ne ni jneza, guendaguti ne ni cadi jneza» (Deut. 30:15). Guidxi que naquiiñeʼ cuí ximodo racalaʼdxiʼ guibani. Zaqueca gudxi Josué ca israelita que: «Pa cadi jneza para laatu gúnitu ni na Jiobá la? lacuí yannadxí tu racaláʼdxitu gúnitu ni na». Guidxi que bicabi Josué: «Qué ziuu dxi guiníʼ íquedu gusaanadu Jiobá». (Jos. 24:15, 16). Laanu laaca zacá riníʼ íquenu. Nadxiinu Jiobá ne qué ziuu dxi guiníʼ íquenu gusaananu laabe.

Laanu, ca xpinni Cristu, guirutiʼ riguixhe xi gúninu. Nécapeʼ rudii ca binnigola ca laanu conseju ni caquiiñenu o rulídxecaʼ laanu nuu tiru la? qué rábicabe laanu ximódopeʼ naquiiñeʼ guibáninu o quíxhecabe xi naquiiñeʼ guni crenu. Sicaríʼ bicaa apóstol Pablu: «Cadi cuyubi du quixhe du xi guni cre tu, purti ma zuhuaa chaahui tu lu ni runi cre tu. Ni cuyubi du la? nga acané du guieche tu» (2 Cor. 1:24).

Jma nayecheʼ riuunu ora rúninu xiixa cosa purtiʼ racaláʼdxinu gúninu ni ne cadi pur cucaabe laanu. Jiobá cayabi laanu gúninu ni jneza purtiʼ nadxiinu laa. Rihuinni zacá ni pur ca diidxaʼ ni bicaa Pablu riʼ: «Zaqueca pa niguiize irá ni napa lu ca pobre para ño caʼ, ne dede nudiee cuerpu stinne nicá gui, peru qué ñanaxhiee laaca la? abati niquiiñe ni naa» (1 Cor. 13:3).

Nabé nayecheʼ riuu Jiobá ora ruuyaʼ millón de ca bíʼchinu ne bizáʼnanu cayúnicaʼ ni nabe purtiʼ nadxiicaʼ laabe de guidubi ladxidoʼcaʼ.

Ne laaca nánnanu guizáʼ nadxii Jiobá guiráʼ ca xpinni. Ne lade ca xpínnibe ca nuutu laatu, ca xcuidi, hombrehuiiniʼ ne dxaapahuiiniʼ purtiʼ lugar de ñannaxhiitu guidxilayú malu riʼ ne guiráʼ ni nuu luni la? nadxiitu Jiobá. Laganna dxichi laadu laacaʼ guizáʼ nadxiidu laatu (Luc. 12:42, 43).

Cumu nadxiitu Jiobá, laatu ca bíchidu, ca bizánadu ne cani nahuiiniʼ la? iza gudiʼdiʼ ca bíʼnitu 1,748,697,447 hora ra bicheechetu ca diidxaʼ nacubi ne galán. Ne laaca pur nadxiitu laabe guyuu 7,782,346 ni bicheeche diidxaʼ lu guidubi naca Guidxilayú. Nayecheʼ guyuʼdu ora bíʼyadu guyuunisa 268,777 binni, ne zacá bisihuínnicaʼ maʼ bidiicaʼ laacaʼ Dios. Ne lade ca binni ca guyuu stale hombrehuiiniʼ ne dxaapahuiiniʼ. Nga rusihuinni guyuunisa biaʼ 5,168 xpinni Cristu cada semana. ¡Nabé rusiecheʼ nga ladxidoʼno!

Ca dxi nagana nabáninu riʼ, cada tobi de ca xpinni Dios cadxaagalunu guendanagana, rizanándacabe laanu, raca huaranu, ne stale tu laa maʼ nagola. Peru maʼ gudixhe íquenu qué chuʼ dxi guireʼnu gana de gúninu ni na Dios. Cadi guiaandaʼ laatu guizáʼ nadxiidu laatu (Heb. 10:39; 2 Cor. 4:16).

Ca bíʼchitu ne bizáʼnatu,

Grupu ni zaniruʼ stiʼ ca Testigu stiʼ Jiobá