Cani cadi naquiiñeʼ guʼnuʼ ora gudiiluʼ estudiu

Cadi guiniʼluʼ stale. Cadi guiníʼ íqueluʼ lii naquiiñeʼ gusiéneluʼ guiráʼ ni. Casi Jesús la? bíʼnibe pregunta para gacanebe binni guiene ni racaláʼdxibe gánnacaʼ (Mt 17:24-27). Ora guinabadiidxanu estudiante stinu xiixa racané ni laacaʼ chuuláʼdxicaʼ ni caziidicaʼ ne racané ni laanu gánnanu xi creencia nápacabe ne pa cayénecabe ni cadúʼndanenu laacabe (be yaza 253 párr. 3, 4). Ora guinabadiidxaluʼ estudiante stiluʼ xiixa cadi guireeluʼ gana nagueenda, guleza guicábibe. Pa qué ganda guicábibe lii la? cadi gábiluʼ laabe xi nuuluʼ guicábibe, gunabadiidxaʼ laabe xcaadxi cosa para ganda guiénebe xi racaláʼdxiluʼ gánnabe (be yaza 238 párr. 1, 2). Guníʼ biaʼ ganda guiene estudiante stiluʼ ti ganda guiénebe ni nacubi caziidibe (be yaza 230 párr. 4).

Cadi guchéndaluʼ binni ora gusiéneluʼ laa. Cadi gábiluʼ laabe guiráʼ ni nánnaluʼ de tema ni caniʼtu ca (Jn 16:12). Bisiene chaahuiʼ puntu ni jma risaca zeeda lu párrafo ca (be yaza 226 párr. 4, yaza 227 párr. 1). Cadi guzeeteluʼ stale cosa de ni caniʼtu ca neca ruluíʼ risaca cani, purtiʼ raca nagana para binni ganna gunáʼ nga ni jma naquiiñeʼ guiziidiʼ (be yaza 235 párr. 3). Pa maʼ biene estudiante stiluʼ ni cusiéneluʼ ca la? gudiʼdiʼ lu sti párrafo.

Cadi gúʼndaneluʼ binni stale información. Ni racaláʼdxinu nga chindanu ndaaniʼ ladxidóʼ binni, cadi neza guʼndanésinu laabe xiixa (Lu 24:32). Bidii lugar guihuinni poder ni napa Stiidxaʼ Dios ra gusiéneluʼ ca textu ni jma risaca zeeda lu ndaa ni cayuundatu (2Co 10:4; Heb 4:12; be yaza 144 párr. 1-3). Biquiiñeʼ ejemplu ni cadi nagana (be yaza 245 párr. 2-4). Cadi guiaandaʼ lii, cada estudiante ridxaagalú guendanagana ora maʼ caziidiʼ ne napa creencia stiʼ, bisiidiʼ laabe biaʼ rábiluʼ zanda guiénebe. Gunabadiidxaʼ laabe ca ndiʼ: «Xi riníʼ íqueluʼ de ni bizíʼdinu yannadxí». Xi rusiidiʼ ni laanu de Jiobá. Ximodo raʼbuʼ zanda gacané conseju riʼ lii pa guʼnuʼ ni nani (be yaza 238 párr. 3-5; yaza 259 párr. 1).