2 ndaa: Modo chuʼnu listu para gúʼndanenu binni

Gúʼndanenu binni modo ganda iniisi jma lu Stiidxaʼ Dios

¹ Gusiidichaahuinu ora maʼ caninu de Biblia la? riniʼni jma que gúʼndasinu ne uyúbinu ca textu ni cadi cá xi nacaʼ luni. Naquiiñeʼ gusíʼdinu jneza ti chindani ndaaniʼ ladxidóʼ ni cayúʼndanenu ca. Para ganda gúninu ni la? naquiiñeʼ guʼndachaahuinu ne gúʼyanu xi caquiiñebe ti ganda acanenu laabe (Pro. 15:28).

² Ximodo chuʼluʼ listu dede ante. Primé la? guniʼné Jiobá pur ni cayúʼndaneluʼ ca ne ni caquiiñebe. Gunabaʼ laabe acanebe lii ti ganda chindaluʼ ndaaniʼ ladxidóʼ ni caziidiʼ ca (Col. 1:9, 10). Para gánnaluʼ xidé caníʼ ndaa ca la? ucuaa chupa chonna minutu ne biiyaʼ lá ndaa ni chiguundatu ca, biiyaʼ xi ná ca letra yaaseʼ ni nuu luni ne ca dibuju ni zeeda luni. Gunabadiidxaʼ laaca lii «Xipeʼ ndiʼ caníʼ ndaa riʼ», pa gúniluʼ ni la? zaniʼluʼ de nipeʼ cuzeeteʼ ndaa ca ora maʼ cayuundaneluʼ laabe.

³ Biindachaahuiʼ ni zeeda lu cada párrafo. Biyubi cani icábibe ne bizaa raya xaʼnaʼ ca diidxaʼ ni jma rieeteʼ luni. Biyubi ca textu ni chiguundatu ca, ne bichaagani ne ni na párrafo ca ne gulí ni zaquiiñeluʼ ora chiguundanelu laabe. Zanda ucaaluʼ xiixa ni acaláʼdxiluʼ uriá yaza stiluʼ para iquiiñeluʼ. Ni caziidiʼ ca naquiiñeʼ gúʼyabe de que cani caziidibe zeedani de lu Stiidxaʼ Dios (1 Tes. 2:13).

⁴ Guʼnuʼ ndaa ca para laapebe. Yanna la? bizulú biindaʼ ndaa ca ne maca caníʼ íqueluʼ ni chiguundaneluʼ ca. Biyubi ni zándaca inabadiidxabe lii, ne biiyaʼ xi zándaca qué ziénebe o ni zaca nagana laabe gúnibe. Gunabadiidxaʼ laaca lii: «Xi naquiiñeʼ guiénebe o paraa naquiiñeʼ gúnibe dxiiñaʼ ti ganda iniisibe lu Stiidxaʼ Dios. Ximodo zanda chindayaʼ ndaaniʼ ladxidoʼbe». Ni icábilu de ca guendarinabadiidxaʼ riʼ la? zacá gúniluʼ ndaa ca. Ziuu ora zuyúbiluʼ ti ejemplu, modo usieʼnuʼ laabe xiixa o tuudxi guendarinabadiidxaʼ ni acané laabe guiénebe xidé caniʼtu o ti textu ni nannuʼ qué ziénebe (Neh. 8:8). Peru, cadi iniʼluʼ xiixa de ni cadi caníʼ ndaa ni cayuundaneluʼ laabe ca. Uzeeteluʼ cani maʼ biindatu ora ilúxetu la? zusientenaláʼdxini laabe cani jma risaca biziiditu.

⁵ ¡Guizáʼ riéchenu ora gúʼyanu cani nacubi ca cayúnicaʼ guiráʼ ni maʼ biziidiʼcaʼ ne usisácacaʼ Jiobá! (Fili. 1:11.) Pa racaláʼdxinu gúnicabe zacá la? naquiiñeʼ guʼndachaahuinu guiráʼ ora chigusíʼdinu binni de lu Biblia.