4 ndaa: Ximodo usíʼdinu ni cayúʼndanenu chuʼ listu dede ante
Gúʼndanenu binni modo ganda iniisi jma lu Stiidxaʼ Dios
1 Ora ni cayúʼndanenu ca chuʼ listu dede ante, guzaa raya xaʼnaʼ cani icabi ne iníʼ ique ximodo zanda iníʼ cani sin guʼndaʼ la? jma nagueenda zaniisibe lu Stiidxaʼ Dios. Nga runi, ora maʼ bizulúpetu bíʼndatu la? biindané laabe idubi ti ndaa para usiidiluʼ laabe ximodo gúnibe ni. Ne jma galán nga gúʼndatu idubi ti capítulo o ndaa stiʼ ti folletu.
2 Uzaabe raya xaʼnaʼ cani ne ucaabe. Bisiene binni cayuundaneluʼ ca ximodo idxélabe cani naquiiñeʼ si icábibe stiʼ ca endarinabadiidxaʼ ni maca neni. Biluíʼ laabe folletu o libru stiluʼ ra cayuundatu ca para gúʼyabe ximodo ruzaaluʼ raya xaʼnaʼ ca diidxaʼ si ni jma naquiiñeʼ. Laga cayuundatu la? zándaca gúnibe cásica modo ruʼnuʼ ne uzaabe raya xaʼnaʼ si cani zacané laabe guietenaláʼdxibe ni icábibe (Luc. 6:40). De racá unabaʼ laabe icábibe sin gúʼndabe ni. Zacá nga zánnaluʼ pabiáʼ nga cayénebe ni cayuundatu ca.
3 Stobi ni naquiiñeʼ gúnibe para chuʼbe listu nga guʼndaʼ chaahuibe ca textu ni cadi cá xi nacaʼ (Hech. 17:11). Ni cayuundaneluʼ ca naquiiñeʼ guiénebe de que cada textu caníʼ ni cuzeeteʼ párrafo ca. Naquiiñeʼ usiidiluʼ laabe gánnabe xi ucaabe ne chupa chonna si diidxaʼ uriá yaza ra cayuundatu ca. Ora maʼ bisiene chaahuiluʼ laabe de que ndaaniʼ Biblia nga caree iráʼ cani caziidibe la? gudxi laabe uzeetebe ni na ca textu ca ra icábibe ora maʼ cayuundatu.
4 Gánnabe xi chiguieeteʼ ne guietenaláʼdxibe ni biziidibe. Ante guzulube gúʼndabe para chuʼbe listu la? galán nga gánnabe xidé chiguieeteʼ ra chiguundatu. Para gánnabe la? zanda gúʼyabe xi láʼ capítulo stini, xi na ca subtítulo neni ne gúʼyabe ca dibuju stini. Ora maʼ bilúxebe idubi ni, naquiiñeʼ cueebe chupa minutu para guietenaláʼdxibe ni jma risaca zeeda luni, zanda iquiiñebe cuadru para guietenalaʼdxiʼ binni ni biziidiʼ, pa neni. Ne ni zacané laabe guiaananebe cani biziidibe nga iniʼbe cani chupa chonna biaje.
5 Usiidiluʼ ni cayuundaneluʼ ca ganna chuʼ listu dede ante la? zacaneni laabe icábibe jneza lu ca endaridagulisaa stinu, ne zaqueca ziaabe gúʼndabe. Gúnibe cani zacá la? zaquiiñeʼ cani laabe neca maʼ bilúxeluʼ de ruundaneluʼ laabe Biblia.