Riguu Jehová ndaayaʼ ca ni ribiguetaʼ xquidxi

STALE hermanu ni yendeza sti guidxi ra nuu bueltu maʼ bibiguétacaʼ xquídxicaʼ. Cumu nadxiicabe Jehová né prójimo stícabe la? maʼ yendézacabe ra caquiiñeʼ jma publicador (Mat. 22:37-39). ¿Xi sacrificiu maʼ bíʼnicabe, ne ximodo maʼ guluu Jehová ndaayaʼ laacabe yaʼ? Guzéʼtenu xi bizaaca caadxi hermanu de Camerún ti país ni riaana África occidental.

«TI LUGAR GALÁN PARA GACA PESCA»

Lu iza 1998, ti hermanu láʼ Onésime biree de Camerún ne yendeza catorce iza ndaaniʼ sti guidxi. Ti dxi nuube ra reunión, bizeeteʼ ti hermanu ti ejemplu ora caníʼ de predicación: «Guxuíʼlunu cayuni chupa hombre guuzeʼ gadxé gadxé lugar ne tobi de laacabe jma canaazeʼ benda. ¿Cadi dxandíʼ ni cadi canaazeʼ ca ñé ra nuu xhamigu la?».

Ora binadiaga Onésime ejemplu ca la? guníʼ ique guibiguetaʼ Camerún, ra caquiiñeʼ jma hermanu para gudii estudiu binni. Peru guyuube xizaa cadi guiaabe xquídxibe sti biaje purtiʼ maʼ stale iza de bireebe de raqué. Nga runi guyebe Camerún xhoopaʼ beeu para gúʼyabe pa ziaabe ne lu iza 2012 gudixe íquebe chindézabe raqué.

Sicaríʼ guníʼ Onésime: «Gupa xidé bineʼ huantar calor ne modo nabani binni raqué. Gupa xidé gurieeʼ lu banguʼ ni nachonga sti biaje ra Yoo sti Reinu». Ne dede cuxídxihuiinibe guniʼbe: «Laga jma cucaadiagaʼ ni cayete ra reunión maʼ qué ñétenaladxeʼ ca banguʼ ni naguudxi que».

Lu iza 2013, bichaganáʼ Onésime Géraldine, guleza gunaa riʼ gaʼ iza Francia peru biguetabe Camerún. ¿Ximodo guluu ndaayaʼ Jehová laacabe pur gudixhe íquecabe gúnicabe jma lu xhiiñaʼ yaʼ? Sicaríʼ guníʼ Onésime: «Guyuudu Escuela para Evangelizadores del Reino ne despué bínidu dxiiñaʼ Betel. Iza gudiʼdiʼ ca guyuunisa gande binni de congregación stidu, yanna huaxa nga nuaaʼ lugar ra jma galán para gacaniáʼ binni» (Mar. 1:17, 18). Sicaríʼ guníʼ Géraldine: «Qué lica niníʼ iqueʼ pa nicaaʼ stale ndaayaʼ».

GACANENU BINNI GACA DISCÍPULO RUSIECHEʼ NI LAANU

Judith, ti hermana ni yendeza Estados Unidos racalaʼdxiʼ guni predicar jma, sicaríʼ guniʼbe: «Ora rigannaʼ familia stinneʼ ni nabeza Camerún ne guibiguetaʼ Estados Unidos, ruunaʼ purtiʼ rusaanaʼ binni ni cudieeʼ estudiu raqué». Neca zacá qué nabe guibiguétabe xquídxibe. Nápabe ti dxiiñaʼ nabé galán ne bueltu ni riáxabe riquiiñebe ni para cheʼ bixhózebe doctor ndaaniʼ guidxi Camerún. Peru gúpabe confianza Jehová ne biguétabe xquídxibe. Guniʼbe bibánabe ca cosa galán ni gúpabe Estados Unidos. Gunábabe Jehová guiaabe xquídxibe sti biaje ne guluu ti superintendente ne xheelaʼ gana laabe.

¿Xi bizaaca Judith yaʼ? Sicaríʼ guniʼbe: «Lu chonna iza gucaniáʼ tapa binni chúʼnisa». Ne despué guca nombrarbe precursora especial. Bichaganabe Sam-Castel, ne tiempu riʼ maʼ viajante laacabe. ¿Xi bizaaca bixhózebe yaʼ? Bidxela Judith ne familia stiʼ ti hospital ndaaniʼ sti guidxi ni nuu dispuestu guni operar bixhózebe sin quíxecabe. Galán biree operación que.

BIIYACABE MODO GUCANÉ JEHOVÁ LAACABE

Ti hermanu láʼ Víctor yendeza ndaaniʼ guidxi Canadá. Despué de biindabe ti artículo ni biree lu Torre stiʼ ni rapa ni caníʼ pa naquiiñeʼ peʼ cheʼ binni scuela roʼ, guníʼ íquebe xi gúnibe, biziidibe ti dxiiñaʼ ne maʼ qué ñebe universidad. Sicaríʼ guniʼbe: «Yanna maʼ napa ti dxiiñaʼ ne cayuneʼ ni jma riuuladxeʼ: gacaʼ precursor». Despué bichaganabe Caroline ne guyécabe Camerún. Dxi nuucabe raqué yegánnacabe sucursal ni nuu lugar que ne guluu ca hermanu que gana laacabe guni servircabe Camerún. Sicaríʼ guníʼ Víctor: «Bidiʼdu cuenta zanda guni servirdu raqué ne cumu nabaninedu ni caquiiñesidu la? gucuaadu invitación que». Neca huará Caroline gudixhe íquecabe guni servírcabe raqué.

Guca Víctor ne Caroline precursor regular para gacanecaʼ binni ni racalaʼdxiʼ guiziidiʼ jma de Biblia. Ti tiempu bibaninécabe ca ahorro ni nápacabe despué guyécabe Canadá yegunicabe dxiiñaʼ chupa chonna beeu, biguétacabe Camerún ne biʼniʼ servírcabe de precursor. ¿Ximodo guluu Jehová ndaayaʼ laacabe yaʼ? Guyécabe Escuela para Evangelizadores del Reino. Despué gúcacabe precursor especial ne yanna maʼ nácacabe siervu de construcción. Sicaríʼ guníʼ Víctor: «Ra bisaanadu guiráʼ ni nápadu, bidúʼyadu ximodo gucané Jehová laadu».

GÁCANENU BINNI GACA DEDICAR JEHOVÁ RUSIECHEʼ NI LAANU

Lu 2002, ti hermanu láʼ Alain, cayuni estudiar universidad ndaaniʼ guidxi Alemania, biindabe tratadu ni láʼ Joven, ¿qué harás con tu vida? ne bicaani laabe ugaandabe xcaadxi meta. Lu iza 2006, guyebe Escuela de Entrenamiento Ministerial ne biseendacabe laabe Camerún, guidxi ra gúlebe.

Bidxélabe ti dxiiñaʼ ne despué bidxélabe stobi ra biáxabe jma, peru guyuube xizaa gusaana de gúnibe jma lu xhiiñaʼ Reinu. Nga runi, ora gúdxicabe laabe pa zácabe precursor especial, gucuaabe invitación que. Gudxi jefe stiʼ Alain laa zaguixe laabe jma peru qué ninabe. Despué bichaganabe Stéphanie, ti hermana ni guleza caadxi iza Francia. ¿Xi guendanagana bidxaagalú Stéphanie dxi bibiguetaʼ Camerún yaʼ?

Sicaríʼ guníʼ Stéphanie: «Gucaʼ huaraʼyaʼ ne gupaʼ caadxi alergia peru bidxelaʼ ti tratamientu ne bineʼ sentir galán». Guluu Jehová ndaayaʼ guendaxheelaʼ riʼ purtiʼ biʼniʼ huantarcaʼ. Sicaríʼ guníʼ Alain: «Dxi yeguni predicardu Katé, ti guidxihuiiniʼ ni nuu zitu, bidxéladu caadxi binni ni racalaʼdxiʼ guni estudiar Biblia. Bidiʼdu estudiu laacabe pur teléfono. Chupa de ca estudiante ca guyuunisa ne guca formar ti grupu de publicador raqué». Stéphanie guníʼ: «Ni jma rusiecheʼ laadu nga gacanedu binni gunibiáʼ Jehová ne gudiicaʼ xpídacaʼ laabe. Ne zacá peʼ runi sentirdu dede dxi nuudu Camerún». Tiempu riʼ, cayuni servir Alain ne Stéphanie de circuito.

«BÍNIDU NI CAQUIIÑEʼ GÚNIDU»

Guyuunisa Gisèle dxi cayuni estudiar Medicina ndaaniʼ guidxi Italia. Nabé bidxagayaabe purtiʼ huaxiéʼ si cosa nabaniné guendaxheelaʼ de precursor ni bidii estudiu laabe ne racaláʼdxibe guni predicarbe jma. Nga runi neca riebe scuela gúcabe precursora regular.

Racalaʼdxiʼ Gisèle guibiguetaʼ Camerún para guni jma lu xhiiñaʼ Dios peru caníʼ íqueruʼ ni. Sicaríʼ guniʼbe: «Zuniteʼ permisu ni napaʼ para cuezaʼ Italia ne napa xidé gusaana ca xhamiguaʼ ne ca familia stinneʼ ni nabeza Italia». Neca zacá, lu beeu mayo de 2016 biguétabe Camerún. Ti tiempu despué, bichaganabe Léonce, ne gudxi sucursal laacabe chécabe guidxi Ayos ra caquiiñeʼ jma publicador.

¿Ximodo nabani binni raqué yaʼ? Sicaríʼ guníʼ Gisèle: «Stale biaje rié biaaniʼ raqué chupa chonna semana ne qué randa runi cargardu teléfono stidu. Nga runi stale biaje cadi cá guí teléfono stidu. Biziideʼ guneʼ guendaró lu dé ne ricaadu nisa huaxhinni purtiʼ óraca maʼ huaxiéʼ binni». Gisèle guníʼ xi gucané laacaʼ guni huantarcaʼ: «Biʼniʼ huantardu purtiʼ gucané espíritu stiʼ Jehová laadu, gucané familia ne ca xhamígudu laadu ra biseendacaʼ ti ndaa bueltu para laadu».

¿Ñee biecheʼ Gisèle pur biguetaʼ xquidxi la? Laabe guniʼbe: «Biecheʼ purtiʼ nga nga ni jma galán. Nacubi yendadu raqué gúpadu caadxi guendanagana ni gulee gana laadu. Peru dxi maʼ qué niníʼ íquedu cani, naa ne xheelaʼ bidiʼdu cuenta ngue nga ni jma jneza bínidu. Gúpadu jma confianza Jehová ne biʼniʼ sentirdu nuudu jma gaxha de laabe». Guyé Léonce ne Gisèle Escuela para Evangelizadores del Reino ne yanna maʼ nácacabe precursor especial temporal.

Cásica rudxiilú ti pescador intiica guendanagana para guinaazeʼ stale benda la? ca hermanu ni ribiguetaʼ xquidxi, nuucaʼ dispuestu gúnicaʼ stale sacrificiu para gacanecaʼ binni guiziidiʼ de Reinu stiʼ Dios. Nanna dxíchinu qué zusiaandaʼ Jehová ni maʼ biʼniʼ ca publicador riʼ ne zaguube ndaayaʼ laacaʼ purtiʼ cusisácacaʼ labe (Neh. 5:19; Heb. 6:10). Pa nabézaluʼ ndaaniʼ sti guidxi ne nánnaluʼ caquiiñeʼ jma publicador ndaaniʼ xquídxiluʼ, ¿ñee zanda guibiguétaluʼ la? Pa gúniluʼ ni la? cadi guiaandaʼ lii zaguu Jehová ndaayaʼ lii (Prov. 10:22).