Ni riníʼ ique stale binni de oración
«Ora runeʼ orar, rudieeʼ cuenta nuu Dios gaxha de naa, naazebe naʼyaʼ ne racanebe naa ora qué gannaʼ pa ladu chaaʼ» (MARÍA).
«Guti xheelaʼ de cáncer despué de 13 iza de bidxiilú guendahuará riʼ. Rietenalaʼdxeʼ guiráʼ dxi runeʼ orar Dios, ne bineʼ sentir rucaadiágabe ne riénebe ni cadideʼ. Dede ratadxí ladxiduáʼ» (RAÚL).
«Ti regalu galán ni rudii Dios laanu nga oración» (ARNE).
Para María, Raúl, Arne ne xcaadxi binni, ti regalu stiʼ Dios nga oración. Ora runi orarcaʼ, runi sentircaʼ riníʼnecaʼ Dios, rudiicaʼ xquixe peʼ laabe ne ruyúbicaʼ modo gacanebe laacaʼ. Nánnacabe dxandíʼ rucaadiaga Dios oración. ¿Xiñee yaʼ? Purtiʼ Biblia ná: «Ndiʼ nga confianza ni nápanu ora guinínenu Dios: zanda guinábanu laa intiica cosa, peru gaca ni ni racalaʼdxiʼ, ne zucaadiaga laanu» (1 Juan 5:14).
Peru stale binni raca nagana para laa guni cré ni rusiidiʼ Biblia de oración. Steve bizeeteʼ: «Dxi napaʼ 17 iza, guti chonna xhamiguaʼ: tobi lu ti accidente né carru ne xhupa gúticaʼ ndaaniʼ nisadóʼ». ¿Xi biʼniʼ Steve yaʼ? Sicaríʼ guniʼbe: «Bineʼ orar Dios ne gunabadiidxaʼ laa xiñee bizaaca ngue, peru qué nicábibe naa. Nga runi gunabadiidxaʼ: “¿Risaca guneʼ orar la?”». Stale binni huayuni sentir zacá ne rinabadiidxacaʼ pa risaca guni orarcaʼ.
Peru nuuruʼ xcaadxi cosa ni rucaa binni guiníʼ ique cadi naquiiñeʼ guni orar Dios. Nuu tu laa ná, cumu nanna Dios guiráʼ cosa la? maʼ nánnabe xi guendanagana nápanu ne xi caquiiñenu. Nga runi riníʼ íquecaʼ, ¿xi para gábinu laabe xi cazaacanu?
Nuu tu laa riníʼ ique qué rucaadiaga Dios laa pur ca cosa ni cadi jneza biʼniʼ dxiqué. Sicaríʼ guníʼ Jenny: «Riníʼ iqueʼ qué risacaʼ. Huayuneʼ cosa ni cadi jneza ne despué gucaʼ arrepentir, nga runi riníʼ iqueʼ qué runeʼ merecer gucaadiaga Dios naa».
¿Lii xi riníʼ íqueluʼ? ¿Ñee laaca huaníʼ íqueluʼ zacá la? Pa zacá ni, ziécheluʼ ora gánnaluʼ ricabi Biblia ca pregunta stiluʼ. Zanda guni creluʼ ni rusiidiʼ Biblia de oración.a Zacané Biblia lii guicábiluʼ ca pregunta riʼ:
¿Dxandíʼ rucaadiaga Dios ca oración ni rúninu la?
¿Xiñee qué ricábibe caadxi oración?
¿Ximodo naquiiñeʼ guni orarnu para gucaadiágabe laanu?
¿Xi zabeenduluʼ pa guni orarluʼ?
a Lu Biblia riete stale oración ni biʼniʼ ca xpinni Dios, dede né caadxi oración ni biʼniʼ Jesús. Lu ca Escrituras Hebreas, ni runibiáʼ binni casi Antiguo Testamento, riete jma de 150 oración.