Stale tu cayuniná ti guendahuará guendabiaaniʼ sticaʼ
«Neca gastiʼ cadi cayuneʼ nisi maʼ cadxibeʼ».
«Ora ruluíʼ nuaaʼ gana, maca nuaaʼ xizaa. Neca nuaaʼ nayecheʼ peru casi ora nuu xiixa ni rabi naa ziuaaʼ triste».
«Runeʼ stipa guiníʼ iqueʼ cosa si ni cazaaca dxi nuaaʼ, peru nuu dxi riníʼ iqueʼ stale cosa ni zándaca gueeda guizaaca despué».
Nga nga ca diidxaʼ ni guníʼ chupa chonna binni ni cayuniná xiixa guendahuará guendabiaaniʼ sticaʼ. ¿Ñee laaca cayuni sentirluʼ casi laacabe o runibiaʼluʼ tuuxa ni cadxaagalú tipu guendanagana ca la?
Pa zacá ni, ¿ñee nannuʼ cadi lii si nga cazaacaluʼ ni la? Lu guidubi Guidxilayú nuu stale binni ni cayuniná xiixa guendahuará guendabiaaniʼ sticaʼ o cayacanacaʼ purtiʼ nuu tuuxa binni ni nadxiicaʼ ni cadiʼdiʼ lu guendanagana ca.
Maʼ nánnanu lu ca últimu dxi riʼ «jma nagana zaca tiempu ne nadipaʼ zaca para binni guni huantar ni», nga runi nuu stale cosa ni runiná laanu (2 Timoteo 3:1). Maʼ guníʼ Organización Mundial de la Salud, lade xhono binni lu guidubi Guidxilayú, nuu tobi ni napa xiixa guendahuará ni cayuniná guendabiaaniʼ stiʼ. Ne pur pandemia stiʼ COVID-19, lu 2020 que jma bidale guendahuará ni rábicabe ansiedad ti 26 porciento ne caadxi guendahuará casi depresión grave bidale ti 28 porciento.
Dxandíʼ, risaca nga gánnanu pabiáʼ cadale ca guendahuará ca. Peru ni jma risaca nga gánnaluʼ xi zanda gúniluʼ lii ne familia stiluʼ para guni sentirtu galán.
¿Ximodo nga ora nazaaca nuu guendabiaaniʼ stiʼ tuuxa?
Ora nazaaca nuu guendabiaaniʼ stiʼ ti binni la? runi sentir galán ne zanda guni guiráʼ dxiiñaʼ stiʼ guiráʼ dxi ne gastiʼ qué zucueeza laa. Zanda gudxiilú ca guendanagana guidxaagalú, zanda guni stale lu xhiiñaʼ ne zuni sentir nayecheʼ.
¿Ximodo nga ora cayuniná ti guendahuará guendabiaaniʼ stiʼ tuuxa?
QUÉ RINÍʼ DIʼ nga qué gápabe huantar.
NI RINÍʼ NI nga nápabe ti guendanagana ne caquiiñeʼ chebe doctor, purtiʼ nabé runinani binni ne ruchaani modo riníʼ ique ne maʼ qué randa rucueeza ni runi sentir ne ni runi.
Pur guendahuará riʼ, stale binni maʼ qué riná guieeguʼ xcaadxi ne maʼ qué runi ca cosa ni caquiiñeʼ guni guiráʼ dxi.
Zanda guninani tutiica binni, gastiʼ naca panda iza napa, padé laa, xi raza stiʼ, xi religión stiʼ, pa guzá scuela o pa coʼ, pa ricu o pa pobre laa.
Biyubi tu gacané lii
Stale biaje nagueendaca rihuinni maʼ cuchaa tuuxa modo laa, modo ró, zándaca maʼ huaxiéʼ rasi o rasi stale. O zándaca maʼ napa dxi runi sentir tuuxa nisi cadxibi, o nuu xizaa o triste. Pa nga nga ni cazaacaluʼ o tuuxa de ca binni ni runibiaʼluʼ la? zándaca caquiiñeʼ cheluʼ o cheʼ binni ca doctor para guihuinni xi cayaca ne guicaa tratamientu stini. Peru ¿tu zanda gacané lii yaʼ?
Sicaríʼ guníʼ Jesucristu, hombre ni jma nuu xpiaaniʼ ni huabani lu Guidxilayú: «Ca binni nazaaca cadi caquiiñeʼ checaʼ ra nuu doctor, peru ca ni huará caquiiñeʼ checaʼ» (Mateo 9:12). Ora cheʼ tuuxa ra nuu ti doctor ni rudii tratamientu para guendabiaaniʼ stiʼ binni la? chaahuidugá zuni sentir jma galán, maʼ zanda guni ca cosa ni runi dxiqué ne zabani jma nayecheʼ. Pa cudiiluʼ cuenta huaraluʼ yanna o maʼ napa dxi de runi sentirluʼ zacá la? jma galán guyúbiluʼ ti doctor para gacané lii.a
Cadi ti libru de medicina nga Biblia, peru zanda gacané ni laanu para chuʼ guendabiaaniʼ stinu nazaaca. Lu revista riʼ zeeda caadxi artículo ni caníʼ ximodo zanda gacané Biblia laanu para gudxíʼlunu ca guendahuará ni cayuniná guendabiaaniʼ stiʼ binni tiempu riʼ. Canábadu lii gúʼndaluʼ ca ni.
a Qué ruzeeteʼ diʼ revista Torre stiʼ ni rapa xi tratamientu peʼ naquiiñeʼ guicaa tuuxa. Cada binni caquiiñeʼ guʼyaʼ chaahuiʼ xi naquiiñeʼ guni ante guicaa ti tratamientu.