Ximodo zanda gápanu paz neca cayaca guerra ne cadinde binni
Gary, ni guca soldadu, guníʼ: «Dxiqué qué ñeneʼ xiñee napa binni guendanagana ne xiñee rizaaca cosa malu lu guidxilayú riʼ. Peru ra biindaʼ Biblia bieneʼ ni ne yanna maʼ nuudxí ladxiduáʼ purtiʼ nannaʼ zuni Jehová Guidxilayú riʼ ti lugar ra guibani binni galán».
Cadi Gary si huayuni sentir zacá. Guidúʼyanu ximodo huayacané Biblia xcaadxi binni gápacaʼ paz.
NI RUSIIDIʼ BIBLIA: «Lii, Jehová, nacháʼhuiluʼ ne nuuluʼ listu para guni perdonarluʼ» (Salmo 86:5).
XIMODO RACANENI LAANU: «Guizáʼ riguixhedxí ca diidxaʼ riʼ ladxiduáʼ purtiʼ rusiidicani naa naca Jehová ti Dios ni riá. Ne nannaʼ racaláʼdxibe guni perdonarbe naa pur guiráʼ ca cosa ni bineʼ dxi guyaaʼ lu guerra» (Wilmar, Colombia).
NI RUSIIDIʼ BIBLIA: «Chiguzayaʼ ti guibáʼ cubi ne ti guidxilayú cubi; ne maʼ guirutiʼ tu zietenalaʼdxiʼ guiráʼ cosa guyuu dxiqué ne maʼ qué zuninácani ladxidóʼ binni» (Isaías 65:17).
XIMODO RACANENI LAANU: «Qué ganda guiaandaʼ naa guiráʼ ca cosa feu ni gudideʼ dxi gucaʼ soldadu, guizáʼ runinácani xquendabiaaneʼ ne napaʼ depresión. Peru textu riʼ rusiidiʼ naa huidxe si zabee Jehová guiráʼ ca cosa ni runiná xquendabiaaneʼ ne maʼ qué lica zietenaladxeʼ cani. ¡Guizáʼ maʼ cabezaʼ guedandá dxi ca!» (Zafirah, Estados Unidos).
NI RUSIIDIʼ BIBLIA: «Ca dxi guni mandarbe zadale ca ni nachaʼhuiʼ, ne ziuu stale paz dede dxi maʼ qué chuʼ beeu» (Salmo 72:7).
XIMODO RACANENI LAANU: «Guizáʼ racané ca diidxaʼ ni zeeda lu textu riʼ naa. Huidxe si maʼ qué ziuu guerra ne maʼ qué zuni sufrir binni, ne zatadxí ladxidoʼno purtiʼ maʼ qué ziuu gastiʼ ni guniná familia stinu» (Olexandra, Ucrania).
NI RUSIIDIʼ BIBLIA: «Zabani ca gueʼtuʼ stiluʼ […]. Laguibani ne lagucaa ridxi de guendanayecheʼ, laatu ca ni naca yudé!» (Isaías 26:19).
XIMODO RACANENI LAANU: «Ndaaniʼ guidxi Ruanda biiticabe stale binni ni nuu lu tribu stiʼ tutsi, dede né familia stinneʼ. Peru textu riʼ racaneni naa guiníʼ iqueʼ zabiguetaʼ zuuyaʼ laacabe sti biaje. Guizáʼ maʼ racalaʼdxeʼ gunadiagaʼ stídxicabe» (Marie, Ruanda).
NI RUSIIDIʼ BIBLIA: «Maʼ xcaadxi si tiempu cayaadxaʼ, ne maʼ qué ziuu binni malu […]. Peru ca ni nadóʼ zacaacaʼ guidxilayú, ne zabánicaʼ nayecheʼ purtiʼ ziuu stale paz» (Salmo 37:10, 11).
XIMODO RACANENI LAANU: «Neca maʼ cadi cayaca guerra xquidxeʼ, peru cayácaruʼ cosa ni cadi jneza ne nuu binni malu. Textu riʼ rudiini stipa naa purtiʼ nannaʼ cayuuyaʼ Jehová guirani ne riénebe naa. Ne laaca cayábibe laanu huidxe si zabeebe guiráʼ ca cosa ni rucaa laanu guni sufrirnu ne maʼ qué zietenaláʼdxinu cani» (Daler, Tayikistán).
Ca binni ni bizéʼtenu lu revista riʼ nuucabe lade ca millón de testigu stiʼ Jehová ni huayacané Biblia laacaʼ gápacaʼ paz tiempu riʼ. Zándaca dxiqué guca nanaláʼdxicabe binni de sti guidxi, sti tribu o sti raza, peru maʼ gucané Biblia laacabe gannaxhiicabe (Efesios 4:31, 32). Laadu, ca testigu stiʼ Jehová qué runi apoyardu ra cadinde binni ne qué riuʼdu lu política (Juan 18:36).
Laadu, ca testigu stiʼ Jehová nácadu ti familia ni nuu lu guidubi guidxilayú ne racanésaadu (Juan 13:35). Casi Olexandra, gunaa ni bizéʼtenu lu ca párrafo ni gudiʼdiʼ que, laabe ne béndabe gupa xidé bireecabe de xquídxicabe purtiʼ cayaca guerra raqué. Laabe guniʼbe: «Casi peʼ yendadu sti guidxi, nagueendaca bidxaagalú ca testigu stiʼ Jehová laadu. Pur gucanécabe laadu gunda biʼniʼ sentirdu galán ne qué ñaca nagana para laadu guiaʼdu guidxi que».
Cayuni invitardu lii ca reunión stidu, ra zaziidiluʼ ximodo zanda gápaluʼ paz yanna ne xi chiguni Dios para guedané paz lu guidxilayú riʼ. Guyé lu jw.org ne biyubi ti lugar ra raca reunión gaxha de ra nabézaluʼ o gunabaʼ guʼndanécabe lii Biblia sin quíxeluʼ. Ziganna ti testigu stiʼ Jehová lii ne zuundanebe lii folletu ¡Zanda guibániluʼ nayecheʼ!