Zedandá dxi maʼ qué ziuu guerra ne maʼ qué zadinde binni

ZUNDUUXEʼ DIOS CA GOBIERNU

Zunduuxeʼ Dios ca gobiernu nuu lu guidxilayú riʼ lu ti guerra ni láʼ Armagedón (Apocalipsis 16:16).a Ora guedandá dxi ca, guiráʼ ca gobiernu o ca «rey nuu lu guidubi guidxilayú» zaca reunircaʼ lu «guerra ni chigaca dxi roʼ stiʼ Dios ni jma napa poder» (Apocalipsis 16:14). Ne racá nga zunduuxeʼ Dios guiráʼ ca guerra ca.

Gunitilú si Dios guiráʼ ca gobiernu ca, zucuibe Reinu o gobiernu stibe. Zuni mandar Reinu riʼ dede guibáʼ ne qué ziuu dxi guinitiluni (Daniel 2:44). Maʼ gulí Dios Jesucristu para gaca Rey lu Reinu riʼ (Isaías 9:6, 7; Mateo 28:18). Ne laani nga Reinub ni gudxi Jesús ca discípulo stiʼ guinábacaʼ lu oración sticaʼ (Mateo 6:9, 10). Ti gobiernu si zuni mandar lu guidubi guidxilayú ne Jesús zaca xaíque stini.

Gadxé peʼ zaca Jesús de ca gobiernu nuu lu guidxilayú riʼ, purtiʼ laabe zaquiiñebe poder stibe para gacanebe binni. Cumu runi Rey riʼ ni jneza ne runi tratar guiráʼ binni igual la? nga runi qué zúnibe menu guirutiʼ neca naca de gadxé raza, gadxé guidxi o gadxé modo biniisi (Isaías 11:3, 4). Ora guni mandar Jesús lu guidxilayú riʼ, maʼ guirutiʼ zuyubi gaca respetar ca derechu stiʼ, purtiʼ Jesús zudii ni caquiiñeʼ cada binni. Biblia ná: «Zulabe binni pobre ni cucaa ridxi gacanécabe laa, ne ca binni ni naca humilde ne guiráʼ ca ni qué gapa tu gacané laa […]. Zulabe laacaʼ de ca ni cuquiichináʼ laacaʼ ne de ca binni qué iquiiñeʼ» (Salmo 72:12-14).

Zunidé Reinu stiʼ Dios guiráʼ ca guiibaʼ ni huaquiiñeʼ binni para guuti xcaadxi (Miqueas 4:3). Laaca zunitiluni guiráʼ ca binni malu ni qué gusaana de tinde ne ca ni runiná ca binni nachaʼhuiʼ (Salmo 37:9, 10). Hombre, gunaa ne xcuidi zápacaʼ paz ne guirutiʼ zuniná laacaʼ ra tiica checaʼ (Ezequiel 34:28).

Ora guni mandar Reinu stiʼ Dios lu guidxilayú riʼ guiráʼ binni zabani galán. Maʼ qué ziuu ca guendanagana ni rucaa binni tinde casi guendapobre ne guendarindaana. Ziuu stale guendaró lu guidubi guidxilayú ne guiráʼ binni zapa lidxi (Salmo 72:16; Isaías 65:21-23).

Zabee Reinu stiʼ Dios guiráʼ ca guendanagana ni rapa binni ora raca guerra. Cadi zusiándasibe ra gucaná binni, sínuque laaca zabeebe ca guendahuará ni runiná xquendabiaanicaʼ, casi ansiedad ne depresión. Ne zandísabe ca ni maʼ guti para guibánicaʼ lu guidxilayú riʼ (Isaías 25:8; 26:19; 35:5, 6). Ziuu ca familia ca tobi si sti biaje ne maʼ qué lica zietenaláʼdxicaʼ ca cosa feu ni gudíʼdicaʼ tiempu guca guerra (Apocalipsis 21:4).

ZABEE DIOS PECADU

Zacané Reinu stiʼ Dios binni guni adorarcaʼ Jehová,c tobi lucha Dios ni dxandíʼ, purtiʼ nácabe ti Dios «ni rannaxhii ne ni riguixhedxí» ladxidóʼ binni (2 Corintios 13:11). Zusiidiʼ Jehová binni guibani né paz (Isaías 2:3, 4; 11:9). Ne ca ni guzuubaʼ stiidxaʼ Dios la? maʼ qué zácacaʼ binni ruchee, sínuque maʼ zácacaʼ binni perfectu (Romanos 8:20, 21).

ZUNITILÚ DIOS BINIDXABAʼ NE CA DEMONIO STIʼ

Zunitilú Reinu stiʼ Dios Binidxabaʼ ne ca demonio stiʼ, ne maʼ qué zucaacabe binni tinde ne guni guerra (Apocalipsis 20:1-3, 10). Cumu maʼ qué ziuucabe lu guidxilayú riʼ la? «ziuu stale paz» (Salmo 72:7).

Gunna dxichi zunduuxeʼ Dios ca guerra ne ca guendaridinde ni cayaca lu guidxilayú riʼ, purtiʼ zanda gúnibe ni ne racaláʼdxibe gacanebe binni.

• Napa Dios poder para gunduuxeʼ ca guerra ne ca guendaridinde ni nuu ne nánnabe ximodo gúnibe ni (Job 9:4). Para laabe gastiʼ ni nagana (Job 42:2).

• Qué riuulaʼdxiʼ Dios guʼyaʼ cayacaná binni (Isaías 63:9). Ne «nanaláʼdxibe tutiisi ni nadxii guendaridinde» (Salmo 11:5).

• Siempre runi cumplir Dios ni riníʼ ne qué zanda gusiguii (Isaías 55:10, 11; Tito 1:2).