Guiranu zanda guinabadiidxanu ni

María ne Juana nga ti guendaxheelaʼ ni runi stipa para guni predicar ca binni de guidxi Filipinas ni riguni dxiiñaʼ ndaaniʼ guidxi ra nabézacaʼ. Lu pandemia stiʼ COVID-19, bizulú María bidii estudiu binni ni nabeza ndaaniʼ guidxi ra nabézacaʼ ne zaqueca binni ni nabeza ndaaniʼ sti guidxi. ¿Ximodo bíʼnibe ni yaʼ?

Rinabadiidxaʼ María ca binni ni rudii estudiu: «¿Ñee runibiaʼluʼ tuuxa ni ñuulaʼdxiʼ ñuni estudiar Biblia la?». Pa guicabi ca binni ca runibiaʼcaʼ tuuxa la? rábibe laacaʼ pa zanda gunibiaʼbe binni ca. Stale biaje huabeendú María ni galán ora rinabadiidxabe nga. ¿Xiñee yaʼ? Purtiʼ ca binni ni rusisaca Stiidxaʼ Dios racaláʼdxicaʼ gábicaʼ familia sticaʼ ne ca xhamígucaʼ ni caziidicaʼ. Guidúʼyanu ni guleendú María.

Tobi de ca binni ni rudiibe estudiu ni lá Jazmín, biluíʼ laabe tapa binni ni racalaʼdxiʼ guni estudiar Biblia. Ne Cristina, nga tobi de ca binni riʼ, guizáʼ riuuláʼdxibe guicaabe estudiu dede gunábabe gudiicabe laabe estudiu chupa biaje lu ti semana. Ora gunabadiidxaʼ María laabe pa runibiaʼbe tuuxa ni ñuulaʼdxiʼ ñuni estudiar Biblia la? bicabi Cristina: «Runebiaʼyaʼ pue, ca xhamigaʼ». Lu chupa chonna semana si, binibiáʼ María tapa de ca xhamiga Cristina ni racalaʼdxiʼ guni estudiar Biblia. Despué, gudxi Cristina laabe nuu xcaadxi binni ni racalaʼdxiʼ guicaa estudiu. Ne ca binni que laaca gúdxicaʼ María runibiaʼcaʼ xcaadxi binni ni laaca racalaʼdxiʼ guicaa estudiu.

Laaca gucalaʼdxiʼ Cristina guiziidiʼ familia stiʼ ni ná Biblia, nabeza ca binni que ndaaniʼ guidxi Filipinas. Ngue runi guníʼnebe Andrea, xiiñibe. Primeru ga que guníʼ ique Andrea: «Naca ca Testigu ti secta. Qué runi crecaʼ Jesús ne Antiguo Testamento si riquiiñecaʼ». Peru primé biaje bidiicabe laabe estudiu bidiibe cuenta cadi jneza modo riníʼ íquebe. Ne cada biaje guicaabe estudiu, riniʼbe: «Pa nga nga ni ná Biblia la? ¡dxandíʼ ni!».

Gudiʼdiʼ si ti tiempu, laaca bizulú bidii María estudiu chupa xhamiga Andrea ne ti compañera ni runiné dxiiñaʼ. Laaca napa Andrea ti stiaʼ ni qué ruuyaʼ, lá Ángela, ne ora maʼ cacaa Andrea estudiu maʼ cucaadiágabe peru qué rudii María cuenta pa cucaadiágabe. Ti dxi, gudxi Ángela Andrea gabi María laaca racalaʼdxiʼ guicaa estudiu. Guizáʼ riuulaʼdxiʼ Ángela guicaa estudiu. Nin ti beeu de cacaabe estudiu maʼ nánnabe stale textu de memoria, ¡gunábabe guicaabe estudiu tapa biaje lu ti semana! Ne gucané Andrea laabe para gaca conectarbe lu ca reunión ca pur videollamada.

Ora maʼ cacaa Cristina estudiu, Josué, xheelabe, maʼ cucaadiaga. Ora bidii María cuenta la? gunabadiidxaʼ laabe pa ñuuláʼdxibe nidxíñabe. Josué bicabi: «Ajaʼ, chigucaadiagasiaʼ peru cadi guinabadiidxaluʼ naa pacaa maʼ qué zucaadiaʼgaʼ». Peru nin gaayuʼ minutu caʼruʼ tidiʼ maʼ biʼniʼ Josué stale pregunta jma que ni maʼ biʼniʼ Cristina ne guniʼbe laaca racaláʼdxibe guicaabe estudiu.

Pur pregunta ni cadi nagana biʼniʼ María, stale binni bizulú biʼniʼ estudiar Biblia. Ngue runi biyúbibe ximodo gudii caadxi hermanu ne hermana estudiu caadxi de ca binni que. ¡Biaʼsi 28 binni de tapa guidxi nga bizulú bidii María estudiu!

Jazmín, primé estudiante ni bizéʼtenu que, guyuunisa lu beeu abril iza 2021 ne Cristina guyuunisa lu beeu mayo 2022 ne maʼ bibiguétabe ndaaniʼ guidxi Filipinas ra nuu familia stibe. Laaca guyuunisa xhupa xhamiga Cristina ne xhupa xhonna beeu despué, guyuunisa Ángela ne yanna maʼ naca precursora regular. Ne Josué, xheelaʼ Cristina, Andrea, xiiñicabe, ne zaqueca xhupa xhonna binni caziidirucaʼ de Jehová.

Lu primé siglu que stale binni biziidiʼ ca noticia nacubi stiʼ Reinu ne nagueendaca guníʼnecaʼ familia sticaʼ ne ca xhamígucaʼ de laani (Juan 1:​41, 42a; Hech. 10:​24, 27, 48; 16:​25-33). Galán guinabadiidxaluʼ ca estudiante stiluʼ o xcaadxi binni ni riuulaʼdxiʼ guiziidiʼ de Stiidxaʼ Dios: «¿Ñee runibiaʼluʼ tuuxa ni racalaʼdxiʼ guiziidiʼ de lu Biblia la?». Ra gúniluʼ pregunta riʼ, zándaca zadxélaluʼ binni ni naʼ guicaa estudiu.