Biyubi gápaluʼ xhamígulu’ ti cadi guni sentirlu’ nuulu’ stúbiluʼ | Zanda gacané Biblia lii

Lu iza 2023, caadxi binni ni nanna de salud bidiica’ cuenta naquiiñe’ gúnica’ xiixa para gacanecaʼ ca binni ni runi sentir nuu stubi, ti cadi gacanaca’. ¿Zanda gudxiilúcabe ni la?

• «Ora tuuxa runi sentir nuu stubi ne guixele’ de binni la? raca huará ne runiná ni laa. Peru zanda gudxíʼlunu cani pa guirá’ dxi gúninu stipa chu’nu gaxha de ca xhamígunu» (Vivek Murthy, director general de Salud Pública de Estados Unidos).a

Cadi caquiiñe pe’ chu’ binni stubi para guni sentir guiruti’ nuu gaxha de laa. Zándaca ziuu ora zuni sentir tuuxa nuu stubi neca nuu lade stale binni. Neca gadxé nga ni rucaa tobi guni sentir nuu stubi, peru ca conseju ni zeeda lu Biblia zanda gacanécani laanu cadi guni sentirnu stúbinu. Ne laaca zanda gacané Biblia laanu para chu’nu jma gaxha de ca xhamígunu.

Zanda gacané ca ni zeeda lu Biblia lii

Biyubi modo güilu’ diidxa’. Ndi’ riní’ cadi puru lii siouʼ guini’lu’; laaca caquiiñe’ guiziidilu’ gucaadiágaluʼ. Ra jma guizaalá’dxilu’ ti binni, jma zaca xhamígulu’ laa.

• Textu sti’ Biblia: «Siempre laguizaalaʼdxiʼ binni, ne cadi guicá íquetu puru si ni caquiiñetu» (Filipenses 2:4).

Biyubi gápalu’ jma xhamígulu’. Biyubi gaca xhamígulu’ ca ni jma huaniisi para lii o ca ni jma nahuiini’ para lii, ca ni naca de gadxé cultura o de sti guidxi.

• Textu sti’ Biblia: «Laguxheleʼ ladxidoʼto» (2 Corintios 6:13).

Pa racalá’dxilu’ gánnalu’ jma de ximodo gápalu’ xhamígulu’, biinda’ artículo ni lá’ «Cómo saciar la sed de amistad».