NI RINABADIIDXAʼ CA JOVEN
¿Ñee malu nga guni coquetearneluʼ tuuxa la?
¿Ximodo nga guni coquetearnécabe tuuxa?
Caadxi binni ná, ora runi coquetear tuuxa rusihuinni, pur cani riníʼ ne pur cani runi, riuulaʼdxiʼ tuuxa. ¿Ñee malu nga la? Coʼ, cadi malu diʼ ni. Ti baʼdudxaapaʼ láʼ Ann guníʼ: «Guiníʼ íquenu maʼ huaniisiluʼ ne maʼ nápaluʼ gana guichaganaluʼ ne riuuláʼdxiluʼ tuuxa. Pa qué guni coquetearluʼ, ¿ximodo gánnaluʼ ni runi sentirbe pur lii yaʼ?».
Lu artículo riʼ zaninu de ora runi coquetearné tuuxa ti binni peru cadi cá ique gapa ti noviazgu.
«Gadxé nga gudiiluʼ ti tratu especial tuuxa purtiʼ nápaluʼ gana né laa ne gadxé nga gusiécheluʼ laabe ne despué guninaluʼ ladxidoʼbe purtiʼ cadi cá íqueluʼ xiixa né laabe» (Deanna).
¿Xiñee nuu tu runi ni?
Nuu tu runi coquetear para si guni sentir galán. Ti baʼdudxaapaʼ láʼ Hailey ná: «Ora gudiiluʼ cuenta rulabi binni lii pur laani rudiiruʼ gana guʼnuʼ ni».
Peru pa gucaaluʼ tuuxa guiníʼ ique riuuláʼdxiluʼ laa ne cadi dxandíʼ ni la? zusihuínniluʼ qué runi respetarluʼ ni runi sentir binni ca. Ne laaca zusihuínniluʼ riníʼ íqueluʼ casi ti baʼduʼ. Biblia ná «guendahuati ca nga ni rusiecheʼ» ca binni ni riníʼ ique casi ti baʼduʼ (Proverbios 15:21).
Nga runi Hailey guníʼ: «Zándaca guzulú guni coquetearluʼ sin gudiiluʼ cuenta, peru stale biaje cadi galán modo riluxe ni».
¿Xi guendanagana zápaluʼ pa gúniluʼ ni?
Binni ni runi coquetearné tuuxa qué runi respetar binni laa.
«Cani runi coquetear rusihuínnicaʼ qué gápacaʼ confianza laca laacaʼ ne riníʼ íquecaʼ casi baʼduʼ. Ora guni coquetearné tuuxa baʼdudxaapaʼ naa runeʼ sentir caguítesibe naa ne cadi dxandíʼ ni runi sentirbe pur naa» (Jeremy).
Biblia ná: «Pa nadxii lu stobi la? [...] qué zuyubu para lii siouʼ» (1 Corintios 13:4, 5).
Guníʼ ique ndiʼ: ¿Xi diidxaʼ cadi naquiiñeʼ guiniʼluʼ o xi cadi naquiiñeʼ gúniluʼ para cadi gusihuínniluʼ riuuláʼdxiluʼ guni coquetearluʼ yaʼ?
Tu runi coquetear runiná sti binni.
«Ora rudiee cuenta riuulaʼdxiʼ tuuxa hombrehuiiniʼ guni coquetear, maʼ que riuuladxeʼ guidxaagaʼ laa. Runeʼ sentir nuube guiníʼnebe naa purtiʼ si gunaa naa. Ca binni ni runi coquetear la? qué rizaaláʼdxicaʼ lii ne rúnicaʼ ni para si guni sentircaʼ galán» (Jaqueline).
Biblia ná: «Naquiiñe uyubi nu acané nu stobi ne cadi uyubi nu para laasi nu» (1 Corintios 10:24).
Xi raʼbuʼ: ¿Ñee huayuu dxi guiníʼ íqueluʼ riuulaʼdxiʼ tuuxa lii ne despué gudiiluʼ cuenta de que coʼ la? Pa maʼ bizaacaluʼ zacá, ¿ximodo biʼniʼ sentirluʼ? ¿Xi zanda gúniluʼ para cadi guninaluʼ sti binni yaʼ?
Zaca nagana para lii guidxélaluʼ ti binni ni dxandíʼ gannaxhii lii pa nisi runi coquetearluʼ.
«Naa la? qué ñuuladxeʼ nichaganaʼyaʼ tuuxa ni riuulaʼdxiʼ guni coquetear. Qué lica nireeniáʼ laa. ¿Ximodo zanda gunebiaʼyaʼ chaahueʼ ti hombrehuiiniʼ ne gapaʼ confianza laa pa cadi dxandíʼ ni runi sentir pur naa yaʼ?» (Olivia).
Lu Biblia bicaa rey David, qué riuulaʼdxiʼ guidxaaga «cani rucaachi’ tu laa» (Salmo 26:4).
Guníʼ ique ndiʼ: Pa runi coquetearluʼ, ¿tu clase binni zuyadxí lii yaʼ? ¿Ñee nuuluʼ chuulaʼdxiʼ tipu binni ca lii la?