NI RINABADIIDXAʼ CA JOVEN
¿Xiñee naquiiñeʼ guni orarluʼ?
Según ti encuesta ni guca, 80% si de ca joven de Estados Unidos runi orarcaʼ Dios, peru galaa si de laacabe rúnicabe ni guiráʼ dxi. Zándaca nuu tu guinabadiidxaʼ: «¿Ñee para guni sentir si binni galán nga runi orar la?».
¿Xii nga guni orar binni?
Guni orar binni nga guiniʼné Jehová, Dios ni bizáʼ guiráʼ xixé ni nuu. Guníʼ ique ndiʼ: neca peʼ jma nandxoʼbe que binni, peru Biblia ná «cadi zitu diʼ nuube de cada tobi de laanu» (Hechos 17:27). Biblia cayuni laanu ti invitación nabé galán: «Laguidxiña ra nuu Dios ne laa zadxiña laatu» (Santiago 4:8).
¿Xi zanda gúniluʼ para chuʼluʼ gaxha de Dios?
Bi’ni’ orar. Sicaríʼ nga zanda guiníʼneluʼ laabe.
Bi’ni’ estudiar Biblia. Sicaríʼ nga casi ñaca caniʼné Dios lii.
Pa guiníʼneluʼ Dios ne gucaadiágaluʼ laabe ora guni estudiarluʼ Biblia, zacané ni lii gaca xhamíguluʼ laabe jma.
«Ti ndaayaʼ guizáʼ naroʼbaʼ nga guiniʼné binni Jehová, Dios ni jma nandxóʼ» (Jeremy).
«Riuaaʼ jma gaxha de Jehová ora güeniaʼ laa ni cayuneʼ sentir» (Miranda).
¿Ñee dxandíʼ rucaadiaga Dios naa la?
Neca runi creluʼ Dios ne runi orarluʼ laa, zándaca gaca nagana para lii guni creluʼ pa dxandíʼ rucaadiágabe lii. Peru Biblia ná naca Jehová ti Dios «ni rucaadiaga oración» (Salmo 65:2). Ne racaláʼdxibe guiníʼneluʼ laabe guiráʼ ni naguu xizaa lii. ¿Xiñee yaʼ? Purtiʼ rizaaláʼdxibe lii (1Pedro 5:7).
Guníʼ ique ndiʼ: ¿Nabé seguidu riníʼneluʼ ca xhamíguluʼ la? Zaqueca cadi gusaana de guiníʼneluʼ Dios. Ne ora guiníʼneluʼ laabe guníʼ labe, Jehová (Salmo 86:5-7; 88:9). Ne Biblia peʼ cayabi lii cadi gusaana de guni orarluʼ (1 Tesalonicenses 5:17).
«Ora runeʼ orar rueniáʼ bixhozeʼ ni nuu guibáʼ diidxaʼ. Rabeʼ laa guiráʼ ni nuu ndaaniʼ ladxiduáʼ» (Moises).
«Rabeʼ Jehová guiráʼ ni cazaacaʼ, cásica rabeʼ ni jñaaʼ ne ca xhamiguaʼ» (Karen).
¿Xi zanda guzeeteʼ lu ca oración stinneʼ?
Biblia ná: «Cadi chuʼtu xizaa. Lu intiica ni cadíʼditu lagabi Dios xi caquiiñetu, laguni orar, laguni rogar ne lagudii xquixe peʼ laa» (Filipenses 4:6).
¿Ñee riníʼ nga zanda guzéʼtenu lú Dios ca guendanagana stinu la? ¡Nga peʼ nga ni nani! Biblia ná: «Bilaa ni nualuʼ luguiáʼ Jehová ne laabe zanaazebe lii» (Salmo 55:22).
Peru cadi puru si de ca guendanagana stiluʼ zanda guiniʼluʼ lu ca oración gúniluʼ. Sicaríʼ guníʼ ti baʼdudxaapaʼ ni la Chantelle: «Huaxiéʼ galán pa cada ñuneʼ orar Jehová ñuneʼ ni para si guinabaʼ laa gacané naa». Laaca gúnibe: «Naa la? rabeʼ primé nga naquiiñeʼ gudiʼnu xquixe peʼ Jehová ne pa gúninu ti lista la? zudiʼnu cuenta zanda gudiʼnu xquixe peʼ Jehová pur stale cosa».
Guníʼ ique ndiʼ: ¿Xii nga ca cosa ni nápani lu xquendanabániluʼ ni rucaa lii gudiiluʼ xquixe peʼ Jehová? Zanda guzeeteluʼ chonna cosa lu oración stiluʼ yannadxí ne gudiiluʼ xquixe peʼ Jehová pur laacani.
«Dede ti cosa sencillu, casi guyadxinu ti guieʼ sicarú zanda gucaani laanu guni orarnu Jehová ne gudiʼnu xquixe peʼ laa» (Anita).
«Guníʼ ique ti versículo ni zeeda lu Biblia ni jma riuuláʼdxiluʼ o xiixa ni bizáʼ Jehová ni rucaa lii guidxagayaaluʼ. Ne despué bidii xquixe peʼ laabe pur laani» (Brian).