Zedané Reinu stiʼ Dios stale guendariuudxi

Reinu stiʼ Dios, gobiernu ni maʼ xadxí de cabézanu para guni mandar lu guidubi Guidxilayú, maʼ cadi candaa zacané ni laanu guibáninu né stale guendariuudxi ne chuʼnu tobi si. Ne Salmo 72:7 cayuni prometer laanu, «ziuu stale guendariuudxi» ndaaniʼ Guidxilayú riʼ. Peru ¿padxí guzulú guni mandar Reinu stiʼ Dios yaʼ? ¿Ximodo chigúnibe ni? Ne ¿ximodo zanda gacané Reinu riʼ lii yaʼ?

¿PADXÍ GUEEDA REINU STIʼ DIOS CA YAʼ?

Biblia maca guníʼ zazaaca stale cosa ni zadxagayaa binni ne zeeda gaca cani ti «seña» ni gusihuinni mayaca guedandá Reinu stiʼ Dios. Ne laaca zahuinni seña riʼ pur ca guerra gaca ndaaniʼ stale guidxi, pur guendarindaana, guendahuará, stale xu ne ra guidale cosa malu (Mateo 24:3, 7, 12; Lucas 21:11; Apocalipsis 6:2-8).

Ne sti profecía ná: «Jma nagana zaca ni ora mayaca izaa xhi guidxilayú. Purti zuyubi binni para laa si, ne nisi bidxichi zacá ique caʼ. [...] Ma qué zuzuuba ca stiidxa jñaa ca ne bixhoze caʼ ne qué zulabi ca laacabe. Zabani ca modo na ique caʼ ne nin zanna ca pa nuu Dios. Qué zanaxhii ca binni ne qué ziá ca irutiʼ, ne nisi zazá ca zaníʼ ca binni. Qué zanda ucueeza ca laca laaca de guni ca ni na ique caʼ. Zuniná cabe binni ne zaca nanalaʼdxi cabe irá ni jneza [...], ne zudxiiba cabe laca laacabe. Zuyubi cabe ni chuʼlaʼdxi cabe lugar de nuyubi cabe Dios» (2 Timoteo 3:1-4). Dxandíʼ, siempre huayuu binni zacá, peru qué huayuu dxi guidálecabe casi yanna.

Bizulú guca cumplir ca profecía riʼ lu iza 1914. Ne dede caadxi historiador, políticu ne escritor riniʼcaʼ dxandíʼ bizulú bichaa guidxilayú lu iza ca. Guzéʼtenu ti ejemplu, historiador danés Peter Munch bicaa: «Ra bizulú guerra que lu iza 1914, raqué nga bichaa modo nabani binni guidxilayú. Ante de iza ca, ruluíʼ ziyaca chaahuiʼ modo nabani binni, [...] peru despué guyuʼnu lu ca tiempu nabé nagana, ra nabé ridxibi binni ne nanaláʼdxicaʼ ne gastiʼ seguridad».

Peru laaca nuu noticia galán, cásica riuu calma despué de tiidiʼ bi yooxhoʼ. Seña ni bizéʼtenu que cusihuinni ni mayaca guni mandar Reinu ca lu guidubi Guidxilayú. Ora bizeeteʼ Jesús de seña ca laaca bidiibe detalle galán riʼ: «Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (Mateo 24:14, TNM).

Laadu, ca testigu stiʼ Jiobá, de ni jma rinínedu binni nga de ca noticia galán ca. Pur nga, revista stidu ni jma runibiáʼ binni, láʼ ni Torre stiʼ ni rapa. Ni caníʼ de Reinu stiʼ Jiobá. Lu ca yaza stini riete xi guiráʼ chiguni Reinu stiʼ Dios ca lu Guidxilayú ne pur binni.

¿XIMODO GUZULÚ GUNI MANDAR REINU STIʼ DIOS LU GUIDXILAYÚ RIʼ?

Para guicábinu pregunta riʼ, guidúʼyanu tapa cosa nabé risaca:

1. Qué zudii Reinu riʼ lugar chuʼ nin ti políticu stiʼ guidxilayú riʼ guni mandar lu gobiernu stiʼ.

2. Ca líder políticu stiʼ guidxilayú riʼ zuyúbicaʼ modo para cadi gundaacaʼ poder nápacaʼ ne zacaláʼdxicaʼ guni búrlacaʼ Reinu stiʼ Dios (Salmo 2:2-9).

3. Zunitilú Reinu stiʼ Dios ca gobiernu ni qué náʼ gundaa poder nápacaʼ (Daniel 2:44; Apocalipsis 19:17-21). Últimu guendaridinde ni gaca lu guidubi Guidxilayú riʼ, Biblia ribee lá ni Armagedón (Apocalipsis 16:14, 16).

4. Cani guni decidir guni mandar Reinu stiʼ Dios laacaʼ, zalacaʼ lu Armagedón ne zabánicaʼ ndaaniʼ ti guidxilayú cubi ra ziuu guendariuudxi. Biblia ruzeeteʼ zácacabe stale binni o ti gran muchedumbre, zándaca millón de binni (Apocalipsis 7:9, 10, 13, 14).

¿XIMODO ZANDA GACANÉ REINU RIʼ LII YAʼ?

Tobi de ca primé cosa ni naquiiñeʼ gúninu para gácanu tobi de cani guni mandar Reinu stiʼ Dios nga, guizíʼdinu de Dios ne de Jesús. Lu ti oración ni biʼniʼ Jesús Dios, guníʼ: «Ne zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ» (Juan 17:3, TNM).

Gunibiaʼnu Dios racané ni laanu de stale modo. Guidúʼyanu chupa si de laani. Primé la?, racané ni laanu iguidxi fe ni nápanu Dios. Fe riʼ, ni nápanu pur ca prueba maʼ bidúʼyanu, rucaa ni laanu guni crenu dxandíʼ nuu Reinu stiʼ Dios ne mayaca guni mandar ni lu Guidxilayú (Hebreos 11:1). Ne guiropa la?, rucaa ni laanu gannaxhiinu jma Dios ne binni. Guendarannaxhii ni nápanu Dios rucaa ni laanu guzúʼbanu stiidxabe de guidubi ladxidoʼno, ne guendarannaxhii ni nápanu binni, rucaa ni laanu chinándanu conseju stiʼ Jesús ni runibiaʼnu casi Regla de Oro: «Laguni tratar xcaadxi cásica ñuuláʼdxitu ñuni tratárcabe laatu» (Lucas 6:31, TNM).

Dios ni bizáʼ laanu racalaʼdxiʼ ni galán para laanu, cásica ti padre ni nadxii xiiñiʼ. Ne racaláʼdxibe guni disfrutarnu de «guendanabani, ni dxandíʼ guendanabani», casi ruzeeteʼ Biblia (1 Timoteo 6:19, TNM). Modo nabáninu yanna riʼ, cadi sicaríʼ ndiʼ nga guendanabani. Millón de binni naquiiñeʼ gudxiilucaʼ para ganda guibánicaʼ. ¿Ximodo nga guendanabani ni dxandíʼ ca yaʼ? Guidúʼyanu caadxi cosa sicarú ni zuni Reinu stiʼ Dios pur binni.