5. ¿Ñee zedandá dxi gusaana de guni sufrirnu la?
¿Xiñee risaca respuesta stiʼ pregunta riʼ?
Ora guni crenu zaree ca sufrimientu nuu, zacané ni laanu guibáninu galán ne qué zaníʼ íquenu ni cadi jneza de Dios.
Guníʼ ique ndiʼ
Stale binni ñuulaʼdxiʼ nibee ca sufrimientu ni nuu, peru qué zanda diʼ gúnicabe ni. Guníʼ ique ca ni chiguzéʼtenu riʼ:
Neca maʼ nanna ca doctor ca stale de guendahuará...
... rati stale binni lu guidubi Guidxilayú pur guendahuará de corazón.
... guiráʼ iza rati stale millón de binni pur cáncer.
... «lu guidubi Guidxilayú nuu stale guendahuará malu ni ricá. Laaca maʼ bihuinni stale guendahuará ni ricá ne cahuinni ca guendahuará ni guníʼ íquecabe maʼ gastiʼ», guníʼ doctor David Bloom ca diidxaʼ riʼ lu ti revista científica ni láʼ Frontiers in Immunology.
Neca nuu guidxi napa stale bueltu...
... guiráʼ iza rati millón de xcuidihuiiniʼ, jmaruʼ si ca lugar jma pobre ni nuu lu Guidxilayú.
... stale millón de binni nabánicaʼ ra gastiʼ drenaje.
... stale millón de binni qué gápacaʼ nisa.
Neca maʼ stale tu nanna gunáʼ nga ca derechu napa binni...
... ndaaniʼ stale guidxi rutoocabe binni lu stobi. Según ti informe bidii Naciones Unidas, ndaaniʼ stale guidxi qué ruteguyoocabe ca binni ni rutoo stobi. Zándaca qué runi ca gobiernu ca ni purtiʼ qué gánnacaʼ xi cayúnicabe o purtiʼ qué gápacaʼ bueltu para gúnicaʼ ni.
PARA GÁNNALUʼ JMA
Guyé lu sitiu jw.org ne biiyaʼ videu ni láʼ Xii nga Reinu stiʼ Dios
Ni rusiidiʼ Biblia
Rizaalaʼdxiʼ Dios laanu
Racaná Dios ora ruuyaʼ cayuni sufrirnu.
Qué huayuni Dios «menu ne qué huabixhiláʼdxibe sufrimientu stiʼ ca binni ni cuquiichinácabe; ne qué huadxiidechebe laacaʼ. Ora bicaacaʼ ridxi laabe, bicaadiágabe laacaʼ» (SALMO 22:24).
«Laga culaatu guiráʼ ni riguu xizaa laatu luguiabe, purtiʼ rizaaláʼdxibe laatu» (1 PEDRO 5:7).
Qué zuni sufrirnu para siempre
Cayuni prometer Biblia laanu zabee Dios ca sufrimientu stinu.
Zuchaa Dios «nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ» (Apocalipsis 21:3, 4).
Zabee Dios guiráʼ ca cosa ni rucaa laanu guni sufrirnu
Zaquiiñebe Reinu stibe, ne casi ná Biblia, laani nga ti gobiernu ni dxandíʼ.
«Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadiʼdiʼ ni lu náʼ sti guidxi. [...] Ne laasini ziaanani para siempre» (DANIEL 2:44).