Bisihuinni Empatía
Ni rizaaca
Pa siempre ridúʼyanu maʼ gadxé xcaadxi de laanu la? zanda guiníʼ íquenu cadi jneza ni cayúnicabe. Dede zanda gueeda guiníʼ íquenu jma risácanu que laacabe. Pa guiníʼ íquenu zacá la? zaca nagana para laanu gusihuínninu empatía, ni caninu nga zaca nagana para laanu chuʼnu xlugar xcaadxi. Ne nin zudiʼnu cuenta maʼ cuzulú cayápanu prejuiciu.
Conseju zeeda lu Biblia
«Laguiechené ca ni nuu nayecheʼ; laguunané ca ni cayuunaʼ» (ROMANOS 12:15).
¿Xi riníʼ ni? Zanda gusiénenu conseju ca né chupa si diidxaʼ: gusihuínninu empatía. Ne para ganda gúninu ni naquiiñeʼ chuʼnu xlugar tuuxa ne guni sentirnu ni cayuni sentir.
Ximodo racané gusihuínniluʼ empatía
Ora riuʼnu xlugar xcaadxi, rudiʼnu cuenta cadi gadxé diʼ laanu de laacaʼ. Rudiʼnu cuenta laaca runi sentírcabe modo runi sentirnu. Tutiica si nácanu, racané empatía ca laanu guiénenu nácanu ti familia naroʼbaʼ. Ne ra jma gúninu stipa para guidúʼyanu tobi si laanu de xcaadxi, zacaneni laanu cadi guni juzgarnu laacaʼ.
Laaca racaneni laanu guni respetarnu xcaadxi. Ti gunaa láʼ Anne-Marie, de Senegal, siempre biʼniʼ menu ca grupu de binni ni qué rusisaca xcaadxi laacaʼ. Laabe cayábibe laanu xi guleendube ra bisihuínnibe empatía: «Ora biiyaʼ pabiáʼ racaná ca binni riʼ, guníʼ iqueʼ ximodo ñuneʼ sentir pa ñuaaʼ xlugárcabe. Ne bidieeʼ cuenta qué risacaʼ diaʼ jma que laacabe ne qué huayuneʼ gastiʼ para guisacaʼ jma que laacabe». Nga runi, pa gúninu stipa guiénenu guendanagana stiʼ binni la? ziénenu laacabe jma ne qué zuni criticarnu laacabe.
Ni zanda gúniluʼ
Cadi gúʼyaluʼ ca cosa ni runi lii gadxé de xcaadxi ne biiyaʼ xi runi lii tobi si né ti grupu de binni ni qué riaba lii. ¿Ximodo raʼbuʼ runi sentírcabe ora rizaaca ca ndiʼ?
Racané empatía ca laanu guiénenu guiranu nácanu ti familia.
Ora ronécabe familia stícabe.
Ora rilúxecabe ti dxi dxiiñaʼ nadipaʼ.
Ora ridxaagacabe ca xhamígucabe.
Ora rucaadiágacabe música ni jma riuuláʼdxicabe.
Yanna biʼniʼ stipa chuʼluʼ lugar stícabe. Guníʼ ique ndiʼ:
¿Xi ñuneʼ pa nucaa tuuxa naa niníʼ iqueʼ qué risacaʼ?
¿Ximodo ñuneʼ sentir pa ñuni juzgar tuuxa naa sin ñunibiáʼ naa?
Pa ñacaʼ de grupu ca, ¿ximodo ñuuladxeʼ ñuni tratárcabe naa?